Verbrauchertelegramm Europa-Ausgabe Utober 2021
Beilage zur ladinischen Europa-Ausgabe Nr. 78 - Redaktion: Europäisches VerbraucherzentrumDËRT DE RETRATA
Ci che al foss bun da savëi de chësc vers
Canche an cumpra valch online vára tla maiú pert di caji da trá zoruch la cumpra debann. Chësc funzionëia por mirit dl dërt de retrata che vel te döta l'Uniun Europeica (UE): la porsona che vënn mëss informé aladô la porsona che cumpra; chësta pó s'anuzé de chësc dërt tl tëmp de 14 dis da canche al ti é gnü consegné le produt. Sce an ó sfruté chësc dërt él da ti notifiché por scrit la retrata al venditur. Al é damí s'anuzé dl model che le comerziant mëss mët a desposiziun sön la plata web; scenó pón ince desćiarié debann nosta lëtra model. Por se trá zoruch ne mëssel nia gní dé dant na rajun. Le patüc mëss gní mené derevers tl tëmp de 14 dis da canche al é gnü comuniché la retrata. Le comerziant mëss spo rembursé le prisc de cumpra te 14 dis da canche al ti é gnü notifiché la retrata, tan inant che al é bele gnü mené derevers le patüc.IADI CUN LE FLIGHER
Consëis y informaziuns sön i cufri
Sce an pënsa al peso ... ci podessel pa sozede cun nosc cufer? Al podess ne rové nia a destinaziun, rové massa tert o ester gnü danejé. Te chisc caji él atira da fá na reclamaziun pro la portina Lost & Found dl aeroport! Mo chësc ne basta nia: ne stede a se desmentié da ti mené diretamënter na reclamaziun por scrit ala compagnia de jore tl respet di termi preodüs. Mo les cosses podess pö ince jí sciöche ares messass y porchël él important da ciaré da tigní fora certes situaziuns adora assá: canche i prenotëis controlede sön le sit dla compagnia de jore tan y ci sort de cufri che an pó se tó te fligher, ci sort de cosses che an pó se tó para y ci sort nia, adorede poscibilmënter n cufer stabil y saurí da reconësce, metede jö na lista de ci che é te cufer y fajede fotografies por che ara vais da desmostré les condiziuns de ci che i se ëis tut para. Por de plü informaziuns.GEOBLOCKING
Cumpré ite online zënza confins
I sun ausá da cumpré ite online y al é oramai tler che an pó por ejëmpl s'anuzé de n sorvisc danesc diretamënter dal canapé de nosta ciasa. Mo al n'é nia dagnora sté insciö, al contrar ... Por nes conzed chësc ál orü ester normes iuridiches europeiches, la Diretiva Sorvisc y le Regolamënt dl Geoblocking, emaná do da n prozes lunch dales istituziuns dl'UE. Insciö él bele da n valgügn agn che degun fornidú de comerz eletronich ne pó stlüje fora da sües ofertes consumadësses o consumadus sön la basa de süa residënza o zitadinanza y gnanca i mené inant a plates spezifiches de d'atri Paisc o ti mëte sö plü de stletes condiziuns zënza iustificaziun. Por de plü informaziuns: https://bit.ly/3nY2dyN.CAJE DL MËIS
Cumpré ite online é scëmpl, comot y asvelt. Mo indere pó le shopping online ascogne ince de burtes sorpreses. Na consumadëssa á cumpré online n fonin da n comerziant dër conesciü. Le produt ti é efetivamënter gnü consegné mo indere ára tut la dezijiun da s'anuzé dl dërt de retrata. Le comerziant ti á dé les istruziuns por mené derevers le fonin y la consumadëssa á fat avisa döt cant sciöche al ti ê gnü splighé y ti á mené zoruch le produt al mitënt. Deache la consumadëssa ne ciafâ nia derevers sü scioldi ára damané do informaziuns y é gnüda sura che le pacl ê rové a destinaziun öt. Ince sce ara ti â scrit zacotan de e-mail al comerziant, n'éra nia stada bona da ciafé na soluziun a süa reclamaziun. Porchël ára tut la dezijiun da contaté la Zentrala di Consumadus Europeica (ZCE) Talia che ti á mené inant le caje al Luxemburg olache al é la sënta legala dl comerziant. Ala consumadëssa ti él spo gnü retü l'import. Chësc é ince sté poscibl porvia dles copies dla documentaziun da pert dla consumadëssa: ara â orü che le pacl gniss pesé denant che gní mené demez al comerziant y â ince fotografé le contignü dl pacl sides canche ara l'â ciafé che ince denant che al gniss mené derevers.