Verbrauchertelegramm Europa-Ausgabe Merz 2021
Beilage zur ladinischen Europa-Ausgabe Nr. 14 - Redaktion: Europäisches VerbraucherzentrumABONAMËNC ONLINE
Arlungiamënt automatich y a chît
Stlü jö n abonamënt online é saurí: al tleca se scrí ite por ejëmpl a na revista spezialisada, confermé sü dac y an pó mëte man da lí. Mo an mëss mëte averda al arlungiamënt a chît y automatich dl abonamënt, sovënz ajunté tles condiziuns generales dl contrat. Val’ legisladus europeics – dantadöt l’Austria y la Francia– é antergnüs por che l’arlungiamënt a chît y automatich ti vëgnes stlarí damí ai consumadus a na moda che ai sciafies da se trá zoruch por tëmp y ora. De plü informaziuns ciafëise chiló: https://bit.ly/2NsCbDQ.Plataforma ODR
Da 5 agn en funziun
Ai 15 de fora á la plataforma ODR festejé i 5 agn de ativité. Ara se trata de n sit web interatif metü sö dala Comisciun europeica por ciafé na soluziun pro stritoc che vëgn da cumpres fates online, sides a livel nazional che sura i confins fora. Por adoré i sorvisc pitá dala plataforma ODR vára debojëgn da cherié n account, che conzed da ti rové pormez a n dashboard personal tres chël che al vëgn monitoré tan inant che la reclamaziun é. Por mëte a jí la prozedöra tlechel da scrí fora n formular. An podará chirí fora sce ortié na reclamaziun al venditur y damané l’intervënt de n organism de ADR (Ressoluziun Alternativa Stritaries) o sciacaré la ressoluziun diretamënter cun le venditur. De plü informaziuns ciafon chiló: https://www.euroconsumatori.org/it/82066/620.FACEBOOK Y PRIVACY
Sanziun da 7 miliuns dl’AGCM
Bele dl 2018 â l'Autorité Garanta dla Concorënza y dl Marcé sanzioné por 5 miliuns de euro Facebook Ireland Ltd. y süa sozieté uma Facebook Inc, do avëi ciafé sö che le colos di social ingiana i utënc y i baia sö da se scrí ite sön süa plataforma ne i informan nia atira y a na moda adatada – tratan l’ativaziun dl account – dl’ativité de racoiüda cun fins comerziai di dac che ai fornësc y, plü en general, di fins comerziai dl sorvisc. Por l’Antitrust é implü les informaziuns pitades da Facebook generiches y nia completes y ne pîta nia na dërta desfarënzia danter l’adoranza di dac che vá debojëgn por la personalisaziun dl sorvisc (cun l’obietif da alisiré la sozialisaziun cun d’atri utënc) y l’adoranza di dac por realisé campagnes de reclam mirades. Do avëi odü che les döes sozietés n’á nia publiché la detlaraziun de ratificaziun y n’á nia lascé ester la pratica ingianosa ciafada sö, á l'AGCM dé na sanziun de indöt 7 miliuns de euro. De plü informaziuns ciafon sön le sit dl’AGCM: https://bit.ly/3aLPx7b.
CAJE DL MËIS
Na consumadëssa taliana á sotescrit n abonamënt premium a paiamënt sön na plataforma online por single todëscia. Aladô dles acordanzes por le sorvisc essera messü paié püch demanco co 40 euro al mëis por n ann. Do diesc dis (le tëmp legal de retrata é 14 dis) ára indere tut la dezijiun da se trá zoruch dal contrat. L'operadú dla plataforma á ghiré che ara paiass por l’andoranza parziala dl sorvisc 323 euro, chël ó dí feter le 70% dla tarifa anuala, ince sce la consumadëssa ne s’â feter nia anuzé dl sorvisc. Ajache ara n’ê nia stada buna da arjunje n’acordanza cun l'operadú éra jüda dala Zentrala di Consumadus Europeica Talia, olache al ti é gnü splighé che la Curt de Iustizia dl‘Uniun Europeica â tut na dezijiun sön chesc tema ala fin dl ann passé. Aladô dla Curt mësson tigní cunt dl tëmp che an s’á anuzé dl sorvisc. Por mirit dl intervënt di colegs dla Zentrala di Consumadus Germania éra jüda da ti fá respeté daldöt chësc prinzip al operadú dla plataforma por single: la ghiranza de 323 euro é gnüda straicada.
De plü informaziuns sön la dezijiun dla Curt de Iustizia Europeica ciafon sön nosc sit web: https://bit.ly/3qKAtfx.