Verbrauchertelegramm Europa-Ausgabe Setëmber 2025

Beilage zur ladinischen Europa-Ausgabe Nr. 71 - Redaktion: Europäisches Verbraucherzentrum


SMARTPHONES

Al é jü en forza les regoles dl'UE nöies sön l'etichëta energetica y le design ecologich

Dai 20 de jügn dl 2025 incá mëss düc i modei de smartphone y tablet nüs che röia sön le marcé europeich avëi n'etichëta energetica obligatoria - che ti somëia n pü' a chëra che vëgn bele adorada por i aparac de ciasa, la televijiun y d'atri injins. Implü mëss i produturs ti garantí ai sorvisc de reparaziun profescionai da ciafé da cumpré toc de sostituziun importanc por almanco set agn dala data dl'ultima comerzialisaziun. Ince les consumadësses y i consumadus ne dess nia messëi se stenté da ciafé toc de sostituziun d'usanza sciöche patris, monitors y aparac da ciarié.
La poscibilité da cuncé valch instësc gnará valutada tl dagní da n indesc de reparaziun. Aladô dles stimes dla Comisciun europeica tignará n smartphone y n tablet mesanamënter 4,1 agn y nia plü 3 agn, tres chëstes regolamentaziuns. De plü informaziuns sön chësc argomënt é da ciafé sot a Link.

PROTEZIUN DLES PORSONES DE MËNDRA ETÉ

Presentaziun de n prototip de na app por verifiché l'eté de che che s'anüza de Internet

Dan da püch á la Comisciun europeica presenté indicaziuns por la proteziun dles porsones sot ai 18 agn y ince n prototip de na app por verifiché l'eté por i sorvisc digitai. La app ti conzed a che che ó ti podëi pormez a contignüs por porsones adultes da desmostré da avëi complí i 18 agn, mo da mantigní impó deplëgn le control de vigni atra informaziun personala, sciöche por ejëmpl l'eté avisa o süa identité, tl respet complet dla privacy. La Danimarca, Grecia, Spagna, Francia y Talia sará i pröms Paisc che colaborará cun la Comisciun ala soluziun tecnica cun l'obietif da porté ite aplicaziuns nazionales por verifiché l'eté. Le prototip podará spo gní integré te na app nazionala o ince resté na app autonoma.

Comerz eletronich

Straufunga aministrativa a SHEIN por indicaziuns ambientales ingianantes y incompletes

L'Autorité garanta por la concorënza y le marcé (AGCM) ti á fat na straufunga de n miliun de euro a SHEIN por avëi adoté na strategia de comunicaziun che ingiana sön les carateristiches y la faziun ambientala de sü produc de guant. L'autorité á alzé fora le dovëi de diligënza che vel por l'aziënda deache ara laora te n setur, insciödit "fast und super fast fashion", che á dër n gran pëis por l'ambiënt.

CAJE DL MËIS
Na consumadëssa dala Germania â cumpré na cherta de jore da na sozieté de fligri taliana por joré dala Talia ala Germania cun süa möta de sis mëisc. Dui dis denant che le jore piass ia él gnü mudé le post dl dejore. Al ti é gnü metü a desposiziun n bus shuttle che piâ bele ia dales 5:30 da doman, cotan de ores dan l'orar de partënza preodü daimpröma, ci che ê dantadöt por na uma cun n pice pope bindebó na gran scecaria. Sciöche indenisaziun ti á la sozieté de jore pité ma n bon. Do che al é antergnü la Zentrala di consumadus Talia (ZCE) á la consumadëssa ciafé n'indenisaziun pausciala de 250 euro, sciöche al vëgn preodü dal regolamënt dl'UE sön i dërc di passajiers y dles passajieres.