Dërc dles passajieres y di passajiers tl trafich di fligri

L'AGCM sanzionëia eDreams por pratiches comerziales nia coretes

L'Autorité garanta por la concorënza y le marcé (AGCM) ti á fat na straufunga de 9 miliuns de euro a eDreams porvia de pratiches nia coretes liades ai abonamënc "Prime" y "Prime Plus" (provedimënt PS12853).
Le problem? I insciödic dark patterns adorá dal'aziënda, chël ó dí promoziuns che impormetô de gragn sconti (cina al 50%) zënza stlarí tlermënter i cosć automatics de renovamënt. Tl medemo tëmp êl ince ri da ester bogn da desdí porvia de strotöres dl menü complicades y dla presciun da adoré inant le sorvisc.
L'Autorité á constaté che les pratiches adorades ingiana y é agressives. Porchël ti él gnü fat na straufunga de 6 miluns de euro, a chëra che al é ciamó da injunté 3 miliuns de euro deache al é gnü arferé le dërt de retrata.
Metede porchël averda sce i ëis stlüt jö o sce i orëis stlüje jö n account "Prime".

https://www.agcm.it/media/comunicati-stampa/2026/2/PS12853

Telefonia y telecomunicaziun

Proposta da destëne fora "Roam like at Home" ai Balcans ozidentai

La Comisciun europeica á fat la proposta da destëne fora le sistem de "Roam like at Home" ai
Balcans ozidentai (l'Albania, la Bosnia-Herzegowina, le Kosovo, le Montenegro, la Macedonia dl Nord y la Serbia) y da fá tratatives sön acordanzes bilaterales.
Sce la proposta vëgn adotada, podarán cherdé sö, mené SMS y adoré dac mobii zënza messëi paié cosć de roaming surapró canche an é söl iade danter l'UE y i Balcans ozidentai paian ma les tarifes internes, sciöche al é bele aldedaincö danter i stac che fej pert dl'UE.
Por les consumadësses y i consumadus oress chësc dí che an n'á nia plü bria da se temëi da sorpreses desplajores sön la bolëta dl telefon, sce an é sön le iade o an é te chisc paisc por laur o stüde. La Consëi dl'UE mëss sëgn tó na dezijiun sce al ó autorisé les tratatives. Al paia porchël la mëia da se tigní ajorná sön i proscimi svilups.
https://ec.europa.eu/commission/presscorner/detail/de/ip_26_474

Social media

Aladô dla Comisciun europeica porta TikTok ala dependënza y mët tl prigo la sanité

Geniturs y porsones jones dess mëte averda: la Comisciun europeica ti tira dant a TikTok da jí cuntra le Digital Services Act (DSA). La rajun é n design che pó porté te na manira mirada ala dependënza, por ejëmpl tres scrollen zënza fin, autoplay y notificaziuns push che pó porté anuzadësses y anuzadus a sté tacá al'app por ores alalungia, dantadöt de nöt.
Chësc pó mëte al prigo le bëgnester fisich y la sanité psichica, dantadöt dles porsones plü jones. Aladô dla Comisciun mancel proteziuns efiziëntes sciöche palses obliades o controi adatá da pert di geniturs, scemia che i dac desmostra che al é veramënter certi prighi.
TikTok cioda sëgn da ciafé dër de gran sanziuns, cina al 6% dl faturé al livel mondial. Les consumadësses y i consumadus pó instësc fá valch decuntra: imposté limic de tëmp por l'adoranza dl'app, ativé la funziun Family Pairing y controlé l'adoranza. Tla Talia pón implü ince ti segnalé problems al'Autorité Garanta dla Concorënza y dl Marcé (AGCM) o al'Autorité por la sconanza di dac.
https://ec.europa.eu/commission/presscorner/detail/de/ip_26_312

Caje dl mëis

Na consumadëssa â n credit de 100 euro colié a so account pro na plataforma de prenotaziun de iadi olandeja. N bel de s'ára indere intenü che chësc credit ê gnü adoré, zënza so consëns, da fá döes prenotaziuns de jori tl'Indonesia a inom de porsones che ara ne conesciô nia.
La consumadëssa á atira contaté la plataforma de prenotaziun por ti segnalé ci che al ê sozedü y damané che so credit ti gniss indô dé zoruch, mo ara n'á mai ciafé na resposta concreta.
Sön na tara ára contaté la Zentrala di consumadus europeica (ZCE) Talia che á mené inant la reclamaziun ala ZCE Paisc Basc. Do chësc intervënt ti á la plataforma indô metü ala consumadëssa le credit de 100 euro te so wallet y ti á aconsié da ativé l'autentificaziun da dui faturs sides por l'account dla plataforma co por l'account e-mail, da mudé sües password y da ne adoré nia i medemi dac d'azes por deplü sorvisc.