Verbrauchertelegramm Europa-Ausgabe Nuvëmber 2025

Beilage zur ladinischen Europa-Ausgabe Nr. 87 - Redaktion: Europäisches Verbraucherzentrum

COMERZ ELETRONICH

"Amazon Haul" – Co stára pa cun i dërc dles consumadësses y di consumadus, i cosć doganai y les cumpres impulsives?

Da otober incá él a desposiziun ince tla Talia Amazon Haul, le portal low-cost dl gigant online di Stac Unis. Cun Amazon Haul ne cumpron indere nia plü da Amazon Europe (cun sënta tl Luxemburg), mo tla maiú pert di caji da na filiala di Stac Unis, la Haul Global (Amazon Export Sales LLC); implü á Amazon ince preodü che comerzianc terzi pois pité produc da vëne. La cumpra ne vëgn porchël nia plü a se le dé tl'Uniun Europeica, y ince la spediziun dl produt vëgn fata da Paisc fora dl'UE. Ince sce al messess gní garantí le dërt de retrata y la garanzia legala, podessel ester problems da fá avarëi sü dërc, dantadöt tl caje de chestiuns de strit o restituziuns. Al podess ester da paié spëises por mené derevers le patüc plü altes co le prisc de cumpra de produc bunmarcé o che al ne vëgnes nia apliché de facto la garanzia legala. N ater aspet che n'é nia da sotvaluté é che al podess gní apliché cosć surapró (cosć doganai) che podess ester a ciaria dles consumadësses y di consumadus.

IADI

La discusciun sön la reforma di dërc dles passajieres y di passajiers di fligri vá inant

La Comisciun di Trasporc dl Parlamënt Europeich á dan da püch dé jö süa usc sön les diretives de tratativa sön la reforma dl Regolamënt sön i dërc dles passajieres y di passajiers di fligri ciaran da mantigní i dërc preodüs tl regolamënt atual y poscibilmënter da i amplié, deperpo che les mudaziuns portades dant cina sëgn dal Consëi di Ministri dl trasport vá dl ater vers. La Comisciun di Trasporc oress dantadöt mantigní danterater le limit d'intardiamënt de trëi ores do da chëres che an pó spo damané n'indenisaziun, anfat cara che é la destanza dl jore, y fej ince la proposta da fá na lista de zircostanzes ezezionales olache les sozietés de jore n'á nia bria da paié indenisaziuns. La discusciun danter les istituziuns dl'UE vá inant y al n'é nia ciamó tler co y can che ares rovará a öna por adoté le Regolamënt nü. Intratan vál inant na scomenciadia dles zitadines y di zitadins europeics sön chësc tema dal titul "Save your right, save your flight" (Ciarede de Osc dërt, ciarede de Osc jore), cun le fin da defëne les regoles varëntes che vel atualmënter.

REGOLAMËNT ECODESIGN

Atach USB-C vëgn ince obligatore por aparac da ciarié

Le regolamënt dl'UE sön l'ecodesign vëiga danfora che al mëss ince ester dala pert dl aparat da ciarié n atach USB-C. Incina sëgn valô chësc ma por la pert dl aparat. Le regolamënt nü ó standardisé i aparac da ciarié scrion dant por la maiú pert de chisc (ince por chi wireless y les staziuns da ciarié) zënza limic de potënza almanco un n atach USB-C y na maiú efiziënza energetica. Implü portará ite le regolamënt nü, che jará en forza ala fin dl 2028, le logo nü "Common Charger" cun chël che ara jará da reconësce saurí i aparac da ciarié interoperabli.

CAJE DL MËIS
N consumadú spagnol â comané azessurs por guant te n shop online talian y i â paié cun na cherta de credit virtuala. La marcianzia comanada ne ti é indere mai gnüda consegnada y sües reclamaziuns, olache al damanâ che le patüc ti gniss consegné o che al ti gniss retü le prisc paié, n'á mai ciafé na resposta y cinamai l'account, che le consumadú â cherié sön la plata web dl'aziënda por fá l'ordinaziun, ê sparí. Le consumadú á porchël damané do l'aiüt dla Zentrala di Consumadus Europeica (ZCE) Spagna che ti á mené inant le caje ala ZCE Talia. Por mirit dl intervënt dla ZCE Talia ti á l'aziënda retü döt le prisc de cumpra al consumadú y ti á cinamai pité n bon de sconto por se scusé dles scecaries che é gnüdes adaldé.