Verbrauchertelegramm Europa-Ausgabe Messè/Agost 2026

Beilage zur ladinischen Europa-Ausgabe Nr. 55 - Redaktion: Europäisches Verbraucherzentrum

SEGURËZA DIGITALA

Stop ales apps "nudifier": l'UE proibësc i stromënc dl'IA che cheriëia imajes intimes zënza consëns
Cun le pachet de mosöres aprové dal Parlamënt europeich él gnü proibí tlermënter i sistems de inteliënza artifiziala, che vëgn adorá da generé contignüs sessuai zënza consëns, danter chisc ince les apps a chëres che al ti vëgn dit "nudifier".
Chëstes aplicaziuns é bones da cherié imajes, videos o audios che mostra les perts dl corp intimes o ativités sessuales evidëntes de porsones che ara vá da identifiché, ince sce düc chisc contignüs n'é daldöt nia reai.
Surapró vëgnel ince proibí sistems de IA che generëia material de maltratamënc sessuai de porsones de mëndra eté. I pitadus ne pó por prinzip nia mëte de te sistems sön le marcé tl'Uniun Europeica, ater co sce ai á a desposiziun mosöres de proteziun tecniches efiziëntes, che ne lascia nia pro na maladoranza de chësta sort. La proibiziun vel sambëgn ince por porsones che s'anüza de chisc sistems por de te fins.
Chësc é n segnal tler da pert dl'UE por na maiú proteziun dla dignité, dla sfera privata y dla segurëza dles porsones tl monn digital.
Por deplü informaziuns: https://www.europarl.europa.eu/news/it/press-room/20260611IPR45207/ia-via-libera-alle-misure-di-semplificazione-e-al-divieto-delle-app-nudifier

MARCIÁ DIGITAI

Sorvisc cloud y concorënza: l'Autorité Garanta dla Concorënza y dl Marcé inresc do sön Apple
L'Autorité Garanta dla Concorënza y dl Marcé (AGCM) á invié ia n prozedimënt cuntra Apple tl cheder dl Digital Markets Act (DMA).
Tl zënter él l'oblianza da ti garantí ai pitadus, che se fej concorënza de sorvisc cloud por cliëntes y cliënc privac, n azes efetif y debann (interoperabilité) a iOS y iPadOS, sciöche ince condiziuns che ti corespogn a chëres dl sorvisc iCloud de Apple.
Aladô dl'AGCM él indicaziuns che lascia ponsé che i pitadus concorënc ne ti pois nia pormez ales medemes funziuns hardware y software coche chëres che vëgn adorades da Apple por iCloud. Sciöche ejëmpl vëgnel nominé le backup intier de dac che é sön i aparac, che ne ti vëgn, sciöche an vëiga, nia metü a desposiziun ales medemes condiziuns ai sorvisc alternatifs.
Na majera interoperabilité ó por les consumadësses y i consumadus dantadöt dí na maiú liberté da chirí fora sorvisc digitai concorënc y manco dificoltés tecniches canche an passa a d'atri sorvisc cloud.
Por deplü informaziuns: https://www.agcm.it/media/comunicati-stampa/2026/6/IDMA1


COMERZ ELETRONICH
Retrata online plü scëmpla: sëgn él n "botun de retrata" nü
Dai 19 de jügn dl 2026 incá él plü scëmpl da eserzité le dërt de retrata sce an á cumpré ite valch online.
Cun l'articul nü 54-bis dl Codesc dl consum vëgnel introdüt na funziun de retrata speziala por i contrac stlüc jö online, a chëra che al ti vëgn sovënz dit "botun de retrata".
Le prinzip é scëmpl: sce ara vá da stlüje jö n contrat cun püc clics, mëssel ince ester saurí da se retrá.
Les plataformes online mëss porchël mëte a desposiziun na funziun, a chëra che an se fej saurí da ti podëi pormez, che ti conzed ales consumadësses y ai consumadus da chirí fora le contrat y da confermé süa orenté da se retrá. Do che la prozedöra é gnüda stlüta jö mëss l'aziënda mené atira na conferma dla retrata sön n portadú de dac che döra, por ejëmpl tres e-mail.
Importantes é ince les conseguënzes por che che ne se tëgn nia ales regoles: sce n'aziënda ne informëia nia coretamënter sön le dërt de retrata, se arlungëia le tëmp de retrata ordinar da 14 dis cina a dodesc mëisc. La mancianza de trasparënza ti pó gní cera a n'aziënda.
Por deplü informaziuns: https://www.euroconsumatori.org/it/news_it/964


CAJE DL MËIS
N consumadú â constaté che al ê gnü fat deplü cumpres in-app da so möt tres na cherta de credit che ê romagnüda salvada sön le smartphone. Deache al ê gnü recoveré te ospedal s'âl intenü impormó tert dles detraziuns da so cunt.
Mo deache le svilupadú dl jüch n'â nia respognü a süa domanda y ince la domanda de chargeback da pert dla banca ê gnüda refodada, á le consumadú contaté la Zentrala di consumadus europeica. Por mirit dl intervënt dla Rëi ECC ti él gnü retü incër 2.700 €.