Comerz eletronich

De pici pacli da Paisc fora dl'UE: la tassa taliana é gnüda sburlada, mo da messé inant se müda döt
L'aplicaziun dla tassa taliana de 2 euro por de pici pacli da Paisc fora dl'UE da n valur sot a 150 euro vëgn sburlada ai 30 de jügn dl 2026. Chësc é gnü anunzié dal Ministere dles finanzes (MEF) por ti dé la poscibilité ai sistems informatics doganai da se adaté. Mo chësc n'é nia döt: dal 1. de messé dl 2026 jarál en forza a livel europeich n daz pauscial de 3 euro sön marcianzia te de pici pacli sot a 150 euro mená diretamënter a consumadësses y consumadus tl'UE. La mosöra fej pert dla reforma doganala europeica y mira a limité le vantaje competitif atual de spediziuns bunmarcé che vëgn dantadöt dal comerz online extraeuropeich. Chësc ó dí en pratica che: por che che cumpra ite sön plataformes fora dl'UE sarál ciamó plü important da controlé indortöra da olache le patüc vëgn, tan che döt vëgn inultima a costé y cares che é les condiziuns de cumpra.
https://www.mef.gov.it/ufficio-stampa/comunicati/2026/Comunicato/

Dërc dles porsones söl iade

Le Parlamënt europeich aprovëia normes nöies sön i pachec de iade turistics
Le Parlamënt europeich á dé fora normes nöies por i pachec de iade turistics, a chi che an ti dij ince "all inclusive", por renforzé la sconanza dles consumadësses y di consumadus. Les regoles nöies stlarësc damí canche na combinaziun de sorvisc é n pachet turistich, dantadöt pro les prenotaziuns online, y aumentëia insciö la trasparënza por les porsones che fej n iade. Pro les novités plü importantes tochel che al vëgn renforzé le dërt de retrata, tan inant che al speta: les consumadësses y i consumadus pó refodé i bons y ciafé zoruch i scioldi tl tëmp de 14 dis. Sce i bons vëgn azetá ái na validité limitada y mëss a vigni moda gní rembursá sce ai ne vëgn nia adorá. Implü vëgnel amplié la poscibilité da anulé n iade zënza cosć de anulaziun, sce al vëgn a se le dé situaziuns straordinares che ne reverda nia ma le post de destinaziun mo ince chël de partënza.
Les normes nöies jará en forza do che ares é gnüdes adotades formalmënter y publicades tla Gazëta ofiziala: i Stac comëmbri á 28 mëisc de tëmp por les atué tl dërt nazional y spo ciamó 6 mëisc por les apliché tla pratica.

https://www.europarl.europa.eu/news/de/press-room/20260306IPR37536/neue-vorschriften-zum-schutz-von-pauschalurlaubern

Trafich tl'aria

Razionamënt dl cherosen te n valgügn aeroporc talians: al podess ester dificoltés por che che mëss tó le fligher
Chisc dis él gnü anunzié n razionamënt dl ciarburant di fligri te cater aeroporc talians: Bologna, Milano Linate, Treviso y Aunejia. Chësta mosöra y d'atri svilups eventuai coliá ala situaziun tl Oriënt Vijin podess porté a limitaziuns operatives ti proscimi mëisc, dantadöt pro i jori nia prioritars. Jori intercontinentai, chi tla lerch de Schengen y n valgönes categories prioritares - sciöche por ejëmpl aeroambulanzes, jori de Stat y jori sura les trëi ores - vëgn deperpo garantis.
Por les consumadësses y i consumadus él d'importanza fondamentala che i dërc dles passajieres y di passajiers tl'UE ne se müdes nia: sce n jore vëgn anulé mëss la compagnia chirí fora sce rembursé la cherta de iade anter set dis o sce pité le trasferimënt dl iade sön n jore alternatif olache al mëss gní garantí inant l'assistënza te aeroport, sciöche por ejëmpl i pasć, y scinacaje n hotel y i trasferimënc. Te certi caji pól ince speté na compensaziun de scioldi, mo al é da tó en conscidraziun che te zircostanzes straordinares n'é les compagnies de jore nia obliades da paié. Dötes chëstes informaziuns é da ciafé tla seziun Luftverkehr/Trasporto aereo sön la plata web dla Zentrala di Consumadus europeica.

https://www.euroconsumatori.org/de/flugreisen

Caje dl mëis

Na consumadëssa taliana â cumpré n MacBook Pro tres n marketplace dla Lituania. N de ára ciafé l'avis de notificaziun y deache ara ê a ciasa éra atira jüda fora da porta a orëi pié do le pachet, mo süa spediziun n'ê ignó da spié.
Insciö ára atira contaté la plataforma, che ti á lascé alsavëi ciamó en chël de, che ara â damané do pro le sorvisc de curier che ti â confermé che la consegnaziun ê gnüda fata. Porchël á la plataforma convalidé le paiamënt y á refodé dötes les atres reclamaziuns. Intratan s'á la consumadëssa intenü che le venditur â indô publiché la venüda dl medemo produt cun les medemes imajes. Ara ti á ince segnalé chësc ala plataforma che á atira fat a na moda che an ne podess nia plü odëi l'inserat.
Deache al n'ê nia meso da ciafé na soluziun á spo la consumadëssa contaté la Zentrala di Consumadus europeica (ZCE) Talia che ti á mené inant le caje ala ZCE Lituania. Deache trames les Zentrales é antergnüdes deboriada á la plataforma inultima messü ti rete döta la soma de cumpra ala consumadëssa.