Verbrauchertelegramm Europa-Ausgabe Utober 2025

Beilage zur ladinischen Europa-Ausgabe Nr. 78 - Redaktion: Europäisches Verbraucherzentrum

IADI

Straufunghes por infraziuns stradales foradecá

Vigni ann ciafa le Zënter di Consumadus Europeich (ZCE) Talia cënc y cënc de segnalaziuns che reverda les sanziuns por infraziuns stradales foradecá. Canche an ciafa na te comunicaziun él sigü damí da mëte averda, mo ignoré na sanziun eventuala la cancelan y tolon y jon impara por dagnora minan che al sides na trapolada n'é nia na buna idea. Chësc vel ince sce le destinatar n'é mai jü tl Paisc che á dé fora la sanziun. Al ne sozed nia dainré che al vëgnes fat fai da lí la targa (les targhes talianes y franzejes por ejëmpl se somëia y al pó ester che les autorités ais fat confujiun). Porchël sce an ciafa na straufunga da foradecá, olache an sá da ne avëi nia fat ci che l'autorité dij, fossel bun da se mëte en contat cun l’autorité de referimënt y damané do ci che al é sozedü.

COMERZ ELETRONICH

La Comisciun europeica cuntra le trapolades online

La normativa UE, y plü avisa le i.d. “Digital Services Act”, prevëiga che les plataformes online y i motors d'inrescida da de gran dimenjiuns se crüzies da stravardé i consumadus dales trapolades arbassan i prighi coliá ala difujiun de contignüs ilegai. La Comisciun europeica ti á porchël damané a Apple App Store, Booking.com, Bing, Google Play y Google Search ci mosöres che ai tol por ti ester ai prighi liá ales trapolades finanziares. Danter les trapolades plü conesciüdes él por ejëmpl les app ingianoses che pé app dla banca o de trading y les ofertes de sojornanza falsificades.

CHARGEBACK

Falimënt Fly Go – Vára ciamó da se fá rete i scioldi?

Do la daurida dla prozedöra de insolvënza ti confrunc dl sit de apostaziun di jori Fly Go Voyager Srl da pert dl tribunal competënt de Bucarest, é tröc consumadus tla burta situaziun d'avëi paié por chertes de jore che ai n'á mai ciafé. Le termo por ti damané la retüda al tribunal competënt é bele tomé, porimpó él ciamó la poscibilité da tó pert ala prozedöra de chargeback. Chësc stromënt, desponibl por che che á paié cun la cherta de credit o d'atres metodes de paiamënt che le prevëiga, conzed da ti damané al'emitënta dla cherta l'anulamënt dla transaziun y la retüda dles somes paiades ite y pîta na majera probabilité da ciafé zoruch i scioldi te n tëmp do la rata cört.

CAJE DL MËIS
D'aurí dl 2024 â na consumadëssa taliana sotescrit n abonamënt a n'app de yoga y fitness de n fornidú todësch. D'aurí dl 2025 ti êl gnü damané da paié 119,99 euro ajache so abonamënt ê gnü renové automaticamënter. La consumadëssa â atira damané che al ti gniss retü i scioldi y che al gniss desdit l'abonamënt, ajache al ne ti ê nia gnü dit che al gnô renové automaticamënter. Aladô dl’aziënda ê la soma gnüda calcolada sciöche al alda, ajache l'abonamënt n'ê nia gnü desdit denanche al gniss renové. Aladô dl articul 65-bis dl Codesc dl consum indere, mëss i profescionisć ti dí ai consumadus cina canche ai pó desdí formalmënter y sce ai ne ortia nia chësta comunicaziun mëssi ti conzede ai consumadus da se retrá te vigni momënt cina che le contrat toma zënza spëises. La consumadëssa á damané do aiüt pro le Zënter di Consumadus Europeich (ZCE) Talia y la reclamaziun ti é gnüda ortiada al ZCE Germania, che á contaté l'aziënda y arjunt che al ti gniss retü la soma intiera ala consumadëssa.