Finanziell unterstützt durch
die Europäische Union
Europäisches Verbraucherzentrum Italien Büro Bozen

Verbrauchertelegramm Europa-Ausgabe Ma 2021

Beilage zur ladinischen Europa-Ausgabe Nr. 39 - Redaktion: Europäisches Verbraucherzentrum


MASCHERES FFP2

A ci che an dess mëte averda por cumpré produc sigüsc

Les mascheres FFP2 fej oramai pert de nosta vita da vigni de y al é da se les vistí te tröc seturs. Mo indere él tres indô da aldí ti media che al vëgn secuestré mascheres deache ares ne ti corespogn nia ai criters dla classificaziun FFP2 ince sce al é lassura na merscia CE: insciö podessel ester che ares ne scones nia assá les porsones cuntra le prigo d'infeziun. NANDO, le stromënt online dla Comisciun Europeica pó nes daidé capí sce an pó ti avëi crëta a nosta maschera FFP2. Al basta püc clics sön la plata web dla banca dac NANDO. De plü informaziun podëise lí te nosta comunicaziun stampa sön nosta plata internet.

VOUCHER COVID

Can dessel pa gní retü i scioldi?

Che che â prenoté na vacanza por Pasca dl 2020 á messü renunzié a chësta porvia dla pandemia. Normes de lege d'emergënza ti â dé ai operadus turistics la poscibilité da dé fora voucher impede rembursé les vacanzes anulades; tröc ne n'é indere cina sëgn nia stá bogn da adoré sü voucher y se damana sce ai pó damané che al ti vëgnes retü i scioldi.
Ince sce sön na bona pert di voucher dá fora dl 2020 él na validité de 12 mëisc, vëgn süa validité arlungiada a 18 mëisc dala data d'emisciun tres la converjiun te lege dl decret Rilancio; chësta converjiun vëiga ince espressamënter danfora che i contrac che ess messü gní ademplis danter i 11 de merz y i 30 de setëmber dl 2020 y é gnüs desliá cina ai 31 de messé dl 2020 pó gní rembursá sce ai n'é daldöt nia gnüs adorá o é gnüs adorá ma en pert. Por de plü informaziuns: https://www.euroconsumatori.org/it/news_it/639.
Porater él da s’aspeté n’atra mudaziun a dann dles consumadësses y di consumadus. Cun la converjiun te lege dl decret “Sostegni” preodüda tla secunda pert dl mëis de ma, gnará la validité di voucher plü dessigü arlungiada a 24 mëisc y tl medemo tëmp gnarál ince sburlé la poscibilité che al vëgnes retü i scioldi: https://www.euroconsumatori.org/it/news_it/646.

METEDE AVERLA DA NE GNÍ NIA INGIANÁ
Nosta rubrica
L'internet é dër d'ütl por ciafé de vigni sort d'informaziuns, gní alsavëi noeles da döt le monn y resté tres ajorná cun nüsc interesc personai. Mo t'internet s'ascognel sambëgn ince tröc prighi sce an ne sá nia da adoré la rëi indortöra. Te nosta rubrica "Occhio alla truffa" ("Achtung Falle") ves cuntunse de fac veramënter sozedüs olache jënt é gnüda ingianada; insciö gnëise alsavëi sciöche ara podess jí y i podëis schivé da ciordé tla medema trapolada. Sce i clichëis sön chësc link podëise lí nosta rubrica:

CAJE DL MËIS
L'ann passé d'otober á n consumadú talian metü n inserat sön na plataforma online todëscia che aministrëia ofertes de afit y venüda de abitaziuns; al s'â daldöt lascé sön l'oferta dla plataforma che â trat so interes cun les parores "Ciafa sëgn debann n cumpradú o n afitadin". Defata s'á le consumadú intenü che so inserat n’â degöna faziun y insciö ál lascé da s'anuzé de chësc sorvisc. De jená indere él gnü sura che al parô che al ess sotescrit n abonamënt a paiamënt y che al messâ paié prësc 180 euro. Le consumadú á bëgn contesté la ghiranza de paiamënt mo le prisc da paié é jü sö a passa 400 euro porvia de d'atres spëises por la recuperada di credic.
Insciö á le consumadú contaté la Zentrala di Consumadus Europeica (ZCE) Talia che á porvé da recostruí le prozes de registraziun y é rovada ala conclujiun che les porsones che s'anüza de chësta plataforma ne vëgn efetivamënter nia informades te na manira tlera y coreta dl dovëi de paiamënt denanche stlüje jö le contrat. Sciöche al é sovënz pro chësta sort de problems che vá sura i confins fora ti é le caje gnü mené inant ai colegs dla ZCE Germania. Ai ti á fat capí al operadú dla plataforma le fat che tl momënt dla registraziun n'él nia informaziuns assá sön le dovëi de paiamënt. Impröma s'á l'imprenditur sambëgn paré mo i colegs dla Germaniá á tigní sön la süa y ala fin á l'imprendidur impó ciamó azeté da rete 417 euro.