Finanziell unterstützt durch
die Europäische Union
Europäisches Verbraucherzentrum Italien Büro Bozen

Verbrauchertelegramm Europa-Ausgabe Messè/Agost 2022

Beilage zur ladinischen Europa-Ausgabe Nr. 55 - Redaktion: Europäisches Verbraucherzentrum

VACANZES DA D’ISTÉ

I consëis dla ZCE por che che vá en vacanza

I sun feter amesa l’isté. I crüzi prinzipai por tröc é n aumënt general di prisc y i prisc di iadi n’é nia n’ezeziun. Mo avisa porchël él dërt da mëte averda por ne salté nia te situaziuns desplajores. Sce an á ciamó n voucher-covid dé fora tratan le lockdown dl 2020, pón le tó o aspeté che al vëgnes retü i scioldi, cossa che ne sozedará nia dan l’altonn. Sce an vá foradecá él fondamental da se informé sön i recuisic che vá debojëgn por jí te n Paîsc sön le sit www.viaggiaresicuri.it. Valuté da sotescrí na bona poliza de assiguraziun de iade y chirí fora tarifes che conzed da straiché le iade debann cina al momënt dla partënza, é döes de bones idees. De plü informaziuns ciafëise chiló: https://www.euroconsumatori.org/it/news_it/769.

DËRT DE RETRATA

Na dita ne respetëia nia le dovëi d’informaziun precontratual y l’AGCM la sanzionëia

Pro les cumpres online él sambëgn fondamental che le venditur ademplësces avisa so dovëi d’informaziun sön les condiziuns y carateristiches dl sorvisc pité. Sce chësc ne sozed nia, vëgn i dërc di consumadus defenüs dal AGCM. L’Autorité Garanta á dan da püch sanzioné na dita cun la sënta a Hong Kong por pratiches comerziales ingianoses y violaziun di dërc di consumadus pro les cumpres online: la dita pîta tres na plataforma aposta la poscibilité da cherié online so curriculum vitae personalisé, zënza indere dé informaziuns sön les carateristiches dl sorvisc, ne se tignin insciö nia ai dërc di consumadus. Por de plü informaziuns: https://www.euroconsumatori.org/it/news_it/774.

CABL DA CIARIÉ UNIVERSAL

Acordanza tl’UE por mëte sön düc i aparac l’atach USB-C

Da passa diesc agn damana le Parlamënt Europeich che düc i aparac sciöche smartphone y tablet vëgnes pitá cun le medemo atach da ciarié. Finalmënter é i rapresentanc dl Consëi dl‘UE y dl Parlamënt stá bugn da ciafé n’acordanza. Aladô dles sciazades dla Comisciun Europeica sparagnará i consumadus 250 miliuns de euro al ann; implü gnarál sparagné 11 miliuns de tonelades de refodam eletronich al ann. L’acordanza en chestiun arjunta chisc dis messará gní aprovada dal Parlamënt Europeich y dal Consëi dl’UE do la palsa da d’isté; i Stac mëmbri ará spo 24 mëisc por surantó la diretiva ti ordinamënc interns. De plü informaziuns ciafëise chiló: https://www.euroconsumatori.org/it/news_it/776.

CAJE DL MËIS
Aldedaincö tlechel n comane a usc y zënza gnanca messëi lascé da fá ci che an é tl laur da fá, pón por mirit dla tecnologia fá tröpes d’atres cosses tl medemo momënt, por ejëmpl ascuté musiga. Chësc é avisa ci che na consumadëssa ti â damané al’assistënta personala: da ascuté na ciantia. Daldô ti êl spo gnü araté na soma al mëis por avëi stlüt jö n abonamënt por ascuté musiga. La consumadëssa s’un â impormó anadé do 12 mëisc: dailó ti êl bele gnü metü sön le cunt feter 200 euro. Mo la consumadëssa â bele n abonamënt por ascuté musiga y ara n’â nia ciafé na confermaziun dl ordin por e-mail. Ince sce ara l’â segnalé al’aziënda de produziun ne jorâ nia da ciafé na soluziun: l’aziënda â respognü che avëi damané da ascuté chël toch â orü dí sotescrí automaticamënter l’abonamënt. Nia cis sigüda dla resposta ciafada é la consumadëssa jüda dala Zentrala di Consumadus Europeica Talia, che á ortié inant la pratica ai colegs dl ofize ZCE Lussemburgo. Por mirit dl intervënt dla ZCE á la consumadëssa ciafé zoruch döta la soma tres na cherta-scincunda digitala.