Finanziell unterstützt durch
die Europäische Union
Europäisches Verbraucherzentrum Italien Büro Bozen

Verbrauchertelegramm Europa-Ausgabe Nuvëmber 2022

Beilage zur ladinischen Europa-Ausgabe Nr. 87 - Redaktion: Europäisches Verbraucherzentrum


VOUCHER COVID DL 2020

I bons tomá mëss gní retüs

Al é oramai passé 30 mëisc da canche al é gnü dé fora i pröms voucher por iadi straicá porvia dl covid aplican le decret "Cura Italia" laota en forza. Ara nen vá dantadöt de chi voucher dá fora por contrac de iade che ê programá dai 11 de merz ai 30 de setëmber dl 2020 y che é gnüs anulá cina ai 31 de messé dl 2020, porvia dl’imposcibilité gnüda a se le dé dedô (lockdown, stlüta dl hotel, proibiziun de iade, cuarantena por positivité covid…). La validité de chisc voucher ê gnüda arlungiada de plü iadi tres lege, impröma a 18, spo a 24 y ala fin a 30 mëisc. I pröms voucher toma sëgn finalmënter y i operadus dl setur messess porchël i rete automaticamënter te 14 dis. Al vá a vigni moda debojëgn che les porsones interessades se crüzies da ortié süa domanda de retüda. De plü informaziuns é da ciafé chiló.


ABONAMËNC DIGITAI

Metede averda!

Ti ultimi agn é l’oferta di sorvisc digitai gnüda svilupada cotan, cun dagnora de plü sorvisc pitá cun n abonamënt, impede i bëgn fisics o la cumpra de lizënzes de software. I ejëmpli é tröc y vá dal streaming de video o musiga, al abonamënt de foliec o revistes on-line, mo ince ala cumpra de software tres planns anuai o mensii che conzed d’avëi dagnora la verjiun plü ajornada.
Sovënz mantëgnon sorvisc che an n’adora nia o de chi che al ne vá nia plü debojëgn. Vignun costa püc euro, mo adöm feji la desfarënza te tacuin! Le consëi é chël da tigní tres sot control les sotescriziuns, controlé sovënz ci che vëgn trat jö automaticamënter y desdí i sorvisc nia adorá o che ne vá nia debojëgn. Liede sön le sit dla Zentrala di Consumadus Europeica (ZEC) a ci che i messëis ciamó mëte averda.


COMERZ ELETRONICH

Na majera proteziun por les consumadësses y i consumadus che cumpra dales botëghes sön Shopify

Ti pröms dui agn de pandemia é les cumpres online gnüdes cotan deplü te döta l'Uniun Europeica. Porimpó él ince jü sö les lamentanzes dla jënt por ci che reverda val’ pratiches ingianoses adorades da val’ comerzianc che laora s’anuzan dla plataforma Shopify. Por ci che reverda les lamentanzes che la ECC-Net á ciafé, adorâ val’ comerzianc pratiches comerziales ingianoses: al ne gnô por ejëmpl nia dé dant n contat dla botëga.
Do n dialogh de 18 mëisc danter la Comisciun Europeica, la rëi sön la cooperaziun por la sconanza di consumadus (CPC Network) y Shopify, él gnü arjunt n’acordanza por mioré la segurëza di consumadus y dles consumadësses dl‘UE che cumpra da botëghes sön la plataforma. De plü informaziuns ciafëise sön: https://www.euroconsumatori.org/it/news_it/792..

CAJE DL MËIS
Na consumadëssa olandeja, sön le iade tla Talia, á albü n problem pro na portina dl’autostrada: ara n’ê nia bona da paié ajache la cherta de credit ne gnô nia azetada. Do val’ menüc s’â ala fin la stangia impó alzé por che i auti sciafiass da passé y la consumadëssa ê jüda inant zënza paié.
Do da val’ mëisc â la consumadëssa ciafé na comunicaziun da pert dla sozieté de recuperada di credic inciariada dal gestur dles autostrades y ara se â atira cruzié da paié ci che ara ê debit tres la banca. Dui mëisc plü tert â la consumadëssa olandeja ciafé indô na domanda de paiamënt por n’avëi nia paié. Ajache la consumadëssa s’â ma anuzé n iade su dl’autostrada, ára contaté la recuperada de credic por ciafé stlarimënc. Ajache ara ne ciafâ nia na resposta éra jüda dala Zentrala di Consumadus Europeica (ZCE) Olanda che á damané do aiüt pro ala ZCE Talia. Chëst’ultima s’á dé da fá: al é gnü fora che le paiamënt tres la banca n’ê nia gnü assozié sciöche al alda ala posiziun de debit dla consumadëssa. La secunda domanda de paiamënt é gnüda anulada y la consumadëssa n’á nia plü ciafé d’atres domandes de paiamënt.