Finanziell unterstützt durch
die Europäische Union
Europäisches Verbraucherzentrum Italien Büro Bozen

Verbrauchertelegramm Europa-Ausgabe Otober 2020

Beilage zur ladinischen Europa-Ausgabe Nr. 87 - Redaktion: Europäisches Verbraucherzentrum

CONCURSC DA PESĆ

Le smartphone "davagné" che i ne ciafarëis mai

La Zentrala di Consumadus Europeica Talia (ZCE) ciafa tre plü gonot telefonades da consumadus che arata da avëi davagné val’ pro n concurs sön social network conesciüs. Baldi s’intënn i consumadus massa tert che al se trata de na trapolada y al ti sá demorvëia canche al vëgn trat jö scioldi da süa cherta de credit. Ne dede mai ca no üsc dac personai no i dac de osta cherta de credit, sce i rovëis pro n te jüch da pesć! Sce i l’esses bele fat y i odëis che al ves röia da paié val’, cherdede sö le gestur de osta cherta de credit y damanede le chargeback (https://bit.ly/37uRcN5). Sön nosta plata web ciafëise de plü informaziuns sön i prighi tla rëi: https://bit.ly/35lnZBq.

GEOBLOCKING

L’ENEL ipormët da mudé le sistem de paiamënt

La ZCE á plü de n iade daidé consumadus de d’atri Paisc dl'UE che ne sciafiâ nia da paié les fatures dl’eletrizité dl'ENEL por sües secundes ciases tla Talia tres so cunt bancar ester. L’Autorité Garanta por la Concorënza y le Marcé (AGCM) é antergnüda dijon che l'eliminaziun dl geoblocking tl'adoranza de paiamënc tres la banca te euro é n obietif prioritar a livel europeich. L’AGCM ti á damané al’aziënda da ciafé soluziuns adatades y l'aziënda s’á tut dant da svilupé n sistem nü por conzede i paiamënc ince da n cunt bancar europeich cun IBAN ester. D’atres informaziuns é da ciafé sön nosc sit web: https://bit.ly/2Tgu6S1.


CYBERSEGURËZA

Informaziuns por se stravardé dales manaciades online

"Naota ponsé, spo fá" é n buniscimo moto che pó gní traslaté tl monn digital insciö "naota ponsé spo cliché". Sot le hashtag #ThinkB4UClick o #CyberSecurity, publichëia l'Agenzia dl'Uniun Europeica por la segurëza informatica (ENISA), dlungia d’atres istituziuns, tröc post interessanc che pîta na majera tlarëza sön i prighi tl monn online y tröpes informaziuns sön la segurëza digitala. Vigni ann d’otober, mët a jí l'ENISA (https://www.enisa.europa.eu/) le #CyberSecMonth, na campagna che döra n mëis, olache al vëgn metü a jí conferënzes y seminars sön la segurëza digitala te döta l’Europa. Ince por la ZCE Talia é i prighi tla rëi dagnora n argomënt atual. De plü informaziuns é da ciafé chiló: https://bit.ly/3o9I7PA.

CAJE DL MËIS
N consumadú austriach á aposté por sües vacanzes tla Talia n auto pro na sozieté d’imprëst d’auti taliana. Le contrat d’imprëst preodô na cuota personala por l’arobada y i dagns de 1.900 euro. Tratan la nöt ti él gnü tut al consumadú l’auto. Sambëgn ti le á le consumadú lascé alsavëi atira ala compagnia d’imprëst. Porimpó ne ti á la sozieté nia trat jö al consumadú 1900 euro, sciöche preodü tl contrat d’imprëst, mo 2800 euro, ajache la soma dada dant tl contrat ê zënza CVA. Implü ti á la sozieté fat paié ince d’atres tasses, sciöche por ejëmpl la tassa de registraziun. Le consumadú á tut la dezijiun da jí dala ZCE Austria, che ti á ortié inant le caje ala Zentrala Consumadus Europeica Talia (ZCE). Por mirit dl intervënt dla ZCE, che s’á anuzé ince dl ofize d’apajada europeich por le setur d’imprëst d’auti, é la pratica dl consumadú gnüda controlada danü. L’apajadú á tut la dezijiun da comané la retüda dla soma intiera, chël ó dí de 2800 euro.