Finanziell unterstützt durch
die Europäische Union
Europäisches Verbraucherzentrum Italien Büro Bozen

Verbrauchertelegramm Europa-Ausgabe Jená 2021

Beilage zur ladinischen Europa-Ausgabe Nr. 7 - Redaktion: Europäisches Verbraucherzentrum


E-COMMERCE

Retüda tres chargeback

Ci pón pa fá sce an ne ciafa nia ci che an á comané online y le venditur ne se ret nia i scioldi? Che che á paié cun cherta de credit la davagna cun le chargeback. Por damané do le chargeback pón ortié la domanda diretamënter ala sozieté dla cherta de credit cun chëra che an á paié. Ince sce les sozietés dles chertes de credit n'á nia bria da aprové la prozedöra sce al ne vëgn nia ortié la marcianzia, desmostra l'esperiënza dla Zentrala Europeica di Consumadus (ZEC) che i consumadus á te tröc caji recuperé sü scioldi a chësta moda. De plü informaziuns é da ciafé sön le sit dla ZCE.


PRATICHES COMERZIALES INGIANOSES

Straufunga da miliuns a Apple

L'Autorité de verda dl marcé (AGCM) ti á dé na sanziun aministrativa de 10 miliuns de euro a Apple por pratiches comerziales ingianoses. Tl reclam de val’ modí de smartphone á l'aziënda sotrissé dantadöt l'impermeabilité a na profondité dl'ega danter 1 y 4 metri cina a 30 menüc. Ci che i consumadus ne savô nia, é che le test dla resistënza al'ega é ma gnü fat te laboratore y nia te na situaziun de adoranza normala. Implü stlujô fora l'aziënda te sües condiziuns la garanzia di dagns gaujá da licuig, ince sce ara fajô reclam che le produt tignî l’ega (https://bit.ly/37sNrr9).


IADI

L'app Re-Open EU nöia

N'app nöia debann sön les regoles de carantena y de iade é gnüda ajuntada dan da püch sön la plataforma "Re-open EU", che é danman da jügn incá y pîta informaziuns ajornades sön les mosöres sanitares y les restriziuns de iade te düc i stac mëmbri, sciöche ince tl'Islanda, tl Liechtenstein, tla Norvegia y tla Svizera.
Les informaziuns é da ciafé te düc i 24 lingac ofiziai dl'UE y pîta n aiüt prezius por düc i utënc che mëss rodé tl'Europa, ince sce al é le Coronavirus. L'app pó gní adorada sön düc i injins Android y IOS (reopen.europa.eu/).

CAJE DL MËIS
Bele ala fin dl 2019, â na consumadëssa taliana aposté da n operadú todësch n iade all-inclusive tla Tailandia, paian feter 3.500 euro. La vacanza ess messü mëte man ai 23 de merz. Al scomenciamënt de merz á la consumadëssa capí che ara n'ess a vigni moda nia podü pié ia porvia dles limitaziuns fates fora dal govern talian. Insciö ára anulé le iade fajon referimënt al fat che ara ne sciafiâ da pié ia, mo l'organisadú ti á respognü che aladô dl contrat fossel sté da paié le 90% dl prisc sciöche penala de straicada, ajache al ê n'oferta speziala che ne podô nia gní apostada danü y retüda. Ince canche al é gnü dejaconsié ti Paîsc Todësc, atira dan le scomenciamënt dl iade preodü, düc i iadi foradecá y le iade ne podô daldöt nia gní fat, ne s'á l'organisadú nia lascé baié sö.
La consumadëssa s'á adressé ala Zentrala di Consumadus Europeica (ZCE) di Paîsc Todësc. Do so intervënt á l’organisadú finalmënter azeté da rete la soma a rates. Al scomenciamënt de dezëmber nes á la consumadëssa ajorné sön la situaziun: la soma ê gnüda retüda daldöt.