Verbrauchertelegramm Europa-Ausgabe Forá 2023

Beilage zur ladinischen Europa-Ausgabe Nr. 14 - Redaktion: Europäisches Verbraucherzentrum


GARANZIA

Co fá sce l’auto é gnü cumpré foradecá

Le marcé digital di auti de secunda man, cun sües poscibilités de confrunt dles ofertes ince a livel internazional, á n rode tres plü important y fej a na moda che al sides plü saurí y interessat da cumpré n auto foradecá. Ince les regoles anfat che vëgn apliché sön le marcé unich pó daidé tó la dezijiun da importé n veicul da foradecá. La garanzia legala vëgn por ejëmpl aplicada te döta l'UE y pó gní fata avarëi sura le confin fora. Porimpó vál debojëgn por ci che reverda l’auto da adoté n’atenziun particolara ales modalités d’aplicaziun dla garanzia legala. Liede sön le sit dla Zentrala Europeica di Consumadus (ZEC) cares che é les regoles de comportamënt plü importantes da tigní a mënt pornanche al vëgn sö n defet de conformité.

Metede averda da ne gní nia trapolá

La trapolada dl tractor

Bele dan da val’ agn â la Zentrala Europeica di Consumadus ciafé segnalaziuns da porsones che orô cumpré n tractor o n’atra mascin sön internet, mo che é gnüdes trapolades y â pordü tröc scioldi. Sëgn pél che chësta trapolada sides indô atuala. I trapoluns savaiëia sovënz da ester n'aziënda che esist davëi y cheriëia n so sit web che pé tl pröm de na dërta aziënda, avisa sciöche ince les ofertes pé de dërtes. Liede sön le sit web dla ZCE co fá por schivé chëstes trapolades.

PACHEC TURISTICS

Arbassé le prisc: sce le pachet n’é nia conform porvia dl Coronavirus

La Curt de Iustizia dl’Uniun Europeica á dan da püch tut na dezijiun sön la plüra (C-396/21) che reverdâ i pachec turistics fac tratan le coronavirus. N per de consumadus todësc ê piá ia ai 13 de merz dl 2020 por na vacanza ales Canaries, canche al ê jü en forza mosöres de contignimënt dl Covid plü rigoroses: les spones dl mer ê gnüdes stlütes y an ne podô nia plü sté defora do na certa ora; a chësta moda ne ái nia plü podü jí fora de süa ciamena ater co por mangé. L’azes ales nodadoies y ai scagns da sté a sorëdl ê proibí y le program d’animaziun ê gnü anulé. Ai 18 de merz dl 2020 ê i dui todësc gnüs informá che ai messâ ester arjigná ca da lascé l’isola te vigni momënt y, le de do âi spo messü jí zoruch tla Germania. I consumadus â damané na retüda dl 70% dl prisc che l’organisadú dl pachet â refodé, aratan che al n’ess nia la responsabilité de ci che ê sozedü. La CIUE á sëgn stabilí che ince sce n defet de conformité di sorvisc turistics tl pachet depënn da restriziuns en forza tl post de destinaziun por contrasté la defujiun de na maratia infetiva, á le cliënt le dërt a n prisc arbassé de so pachet turistich. L’imputabilité dl organisadú te chësc contest ne á degöna importanza deache por ci che reverda le dërt de na reduziun dl prisc prevëiga la diretiva na responsabilité ogetiva dl organisadú.

CAJE DL MËIS
Danter les tröpes scincundes de matrimone á na consumadëssa austriaca ciafé cater bons da indöt 1.600 euro por cumpré mebli te na botëga taliana. Ara á ponsé che i bons ess, sciöche al sozed tl’Austria, na validité lungia y orô aspeté le dërt momënt por i adoré. Impormó canche ara â ciafé l’oget che ti plajô davëi y â orü tó un di bons por le cumpré, s’âra intenü che al ê scrit iadedô che al valô ma n ann y ê bele scadü. La consumadëssa â porchël damané aiüt ala Zentrala Europeica Consumadus (ZEC) Austria, che â contaté la ZEC Talia por ciafé informaziuns sön la situaziun iuridica tla Talia. I consulënc dla ZCE Talia á confermé la legalité dl termin fissé dal'aziënda taliana, mo á a vigni moda contaté la botëga de mebli por damané n arlungiamënt dla validité. Dedô á le venditur davëi conzedü n arlungiamënt dl bon, che desmostra ince che ti tröc agn de ativité dla Rëi dles Zentrales di Consumadus Europeiches s’ál svilupé na colaboraziun por le plü positiva y bona cun les aziëndes.