Verbrauchertelegramm Europa-Ausgabe Jügn 2025

Beilage zur ladinischen Europa-Ausgabe Nr. 46 - Redaktion: Europäisches Verbraucherzentrum

DËRC DI PASSAJIERS Y DLES PASSAJIERES DI FLIGRI

Él prigo che la reforma dl regolamënt europeich preodüda sides n vare derevers?

Atualmënter vëgnel fat na discusciun a Bruxelles sön na proposta che fej sté dër ert la Rëi dles Zentrales di consumadus europeiches (ECC-Net): al é prigo che la reforma dl Regolamënt europeich sön i dërc di passajiers y dles passajieres di fligri n. 261/2004 sides n vare derevers por miliuns de porsones europeiches che tol le fligher. La Rëi critichëia dantadöt le fat che al vëgn preodü da paié indenisaziuns de scioldi impormó do da dër de gragn intardiamënc, chël ó dí sce le fligher á n intardiamënt de 5, 9 o cinamai 12 ores, aladô dla lontananza dl iade. Implü vëgnel ince baié che les sozietés de jore á tl dagní cina a 12 ores de tëmp por mëte a desposiziun n jore sostitutif do l'anulamënt de n jore y che la definiziun de zircostanzes "ezezionales" dess gní ampliada por ti tó jö ales sozietés de jore la responsabilité. A chësta moda él prigo che la maiú pert dla iurisprudënza dla Curt de iustizia europeica madorida ti ultimi 20 agn, che s'un á tut sura di passajiers y dles passajieres, ne veles insciö nia plü. Por deplü informaziuns.

APAJAMËNT DI STRIC ALTERNATIF

Adio ala plataforma ODR

La plataforma ODR ê gnüda istituida dl 2016 y ê por consumadus/consumadësses y comerzianc/comerziantes n post de consultaziun zentral por ciafé na soluziun extraiudiziala a stric che gnô da contrac de venüda o da sorvisc online. La Zentrala di consumadus europeica Talia fajô da punt de contat nazional dla plataforma ODR meton a desposiziun informaziuns sön le funzionamënt dla plataforma, sön i dërc di consumadus y dles consumadësses y sön d'atres prozedöres d'apajamënt di stric desponibles tl'UE, sciöche ince pitan assistënza da presenté na reclamaziun. Cina ai 20 de messé, canche al gnará stlüt te na manira definitiva la plataforma, él ciamó poscibl da ti damané assistënza al punt de contat nazional. La Comisciun europeica laora implü atualmënter por cherié n sit informatif nü che dëides consumadus y consumadësses chirí la manira plü iüsta y i organisms plü adatá por ciafé na soluziun a sü stric. Por deplü informaziuns.

L'AZES ALA IUSTIZIA T'EUROPA

Le portal E-JUSTICE é gnü renové dan da püch

Canche ara ne vá nia da ciafé a bones na soluziun a reclamaziuns sura i confins fora él la poscibilité da s'anuzé cina a n valur de 5000 euro dl prozedimënt europeich por de mëndres ghiranzes (por inglesc European Small Claims Procedure – ESCP). Chësc prozedimënt iudiziar é da garat te düc i stac comëmbri dl'UE (ater co tla Danimarca). Dlungia chësc él ince le comane de paiamënt europeich (European Payment Order- EPO), na prozedöra plü scëmpla por incassé na ghiranza de scioldi incontestada, plü avisa na soma de scioldi licuida y da paié (chësc ó dí che al é n'amunta determinada y nia liada a n termo o na condiziun), da na porsona o da n'aziënda che á süa sënta te n ater Paisc dl'Uniun Europeica (ater co tla Danimarca). Dötes les informaziuns importantes y i formulars da scrí fora é da ciafé sön le portal de iustizia europeich che é dan da püch gnü organisé daldöt danü.

CAJE DL MËIS
Dl 2023 orô na consumadëssa olandeja prenoté na cherta de jore sön la plata Internet de na compagnia de jore taliana, mo baldi n'êra nia jüda da stlüje jö le prozes de prenotaziun porvia de problems tecnics. Porimpó ti êl gnü trat jö ala consumadëssa le cost dla cherta dal meso de paiamënt che ara â dé dant. Ara á atira contaté la compagnia de jore che ti á lascé alsavëi che les chertes ne foss nia gnüdes emetüdes y che l'import ti foss insciö gnü retü te 48 ores. Ara á plü iadi porvé da contaté la compagnia mo al é sté döt por nia. Insciö á la consumadëssa tut sö contat cun la ZCE Paisc Basc che ti á mené inant la reclamaziun ala ZCE Talia: do che la ZCE Talia é antergnüda ti á la compagnia de jore tla rovada retü döta la soma ala consumadëssa olandeja.