Verbrauchertelegramm Europa-Ausgabe Forá 2026

Beilage zur ladinischen Europa-Ausgabe Nr. 14 - Redaktion: Europäisches Verbraucherzentrum

IADI

Campionac mondiai dl palé ti USA, tl Messico y tl Canada: al é da mëte averda ai documënc de iade y ales chertes
Che che ó jí a ti ciaré ales partides di Mondiai dl palé 2026 dess planifiché avisa so iade y controlé adora assá i recuisic d'entrada che é atramënter da Paisc a Paisc. Por les zitadines y i zitadins talians ól ester autorisaziuns eletroniches a paiamënt sciöche l'ESTA por i USA y l'eTA por le Canada, y ince por le Messico él preodü prozedöres spezifiches. Al é important da damané chëstes autorisaziuns ma tres i ofizi statai ofiziai deache sön les plates web podessel se porté pro cosć y problems surapró da pert de intermediars che vëgn fora gonot ai pröms posć ti motors de inrescida. Ince por ci che reverda les chertes d'entrada por les partides él da mëte averda: al é assolutamënter ma da les cumpré tres i canai ofiziai dá dant dala FIFA. Deache les regoles d'entrada pó se mudé vëgnel aconsié da controlé tresfora la situaziun atuala sön la plata web ofiziala dl Ministere di afars cun l'ester Viaggiaresicuri.it .
https://www.viaggiaresicuri.it/home

MODA Y CONSUM

Shein: da tesć de Greenpeace vëgnel fora che al é sostanzes chimiches prigoroses tl guant
N'inrescida de Greenpeace Germania á analisé 56 toc de guant che vëgn venüs online da Shein te Paisc europeics desvalis, danter chisc él produc por porsones adultes y por mituns. I resultac mostra che te feter n terzo di articui controlá él na conzentraziun de sostanzes chimiches che vá sura i limic conzedüs dala normativa europeica REACH (danter chëstes él ftalac y PFAS che é liá a prighi potenziai por la sanité y al incuinamënt dl ambiënt).
L'inrescida stlarësc che al é tres ciamó problems liá ala segurëza chimica de produc dla ultra-fast-fashion. Chësc sciüra sö domandes sön la sconanza dles consumadësses y di consumadus, y sön les conseguënzes ecologiches de chisc modei de consum.
https://www.greenpeace.ch/static/planet4-switzerland-stateless/2025/11/9241ed86-shameonyoushein.pdf

DËRC DLES PASSAJIERES Y DI PASSAJIERS DI FLIGRI

I dërc dles passajieres y di passajiers: le Parlamënt europeich se damana da ne fá nia vari derevers
Le Parlamënt europeich á aprové süa posiziun sön la revijiun dles normes UE sön i dërc dles passajieres y di passajiers y alza ciamó n iade fora che tl cheder dla revijiun dles normes UE, mëssel gní mantigní y renforzé i dërc dles passajieres y di passajiers de jore. Les deputates y i deputac se damana dantadöt che al vëgnes mantigní le limo dles trëi ores de intardiada, cun chël che an á le dërt a na compensaziun economica, y che l’amunta de chësta romagnes anfat. Pro les propostes sostignides dal Parlamënt tochel surapró ciamó le dërt da se tó para debann sön le fligher n oget personal (na tascia, n rucsoch o n laptop) y n te pice cufer a man, por schivé cosć suplementars püch trasparënc. N ater punt reverda la scemplificaziun dles prozedöres: les sozietés de jore dess ti mëte a desposiziun ales passajieres y ai passajiers formulars bele scric fora por damané compensaziuns y retüdes.
https://www.europarl.europa.eu/news/de/press-room/20260116IPR32442/europaisches-parlament-will-bestehende-fluggastrechte-sichern

CAJE DL MËIS

N consumadú olandesc â comané da n'aziënda taliana chertes da carté da coleziun dal valur de passa 25.000 euro. Indere dala data da chëra che la marcianzia ê desponibla ne ti êra mai gnüda consegnada. L'aziënda ti â impormetü al consumadú che le prisc paié ti foss gnü retü, mo sozede ne sozezôl nët nia.
Insciö á le consumadú contaté la Zentrala di Consumadus europeica Olanda por ciafé assistënza. Le caje ti é inultima gnü ortié inant ala Zentrala di Consumadus europeica (ZCE) Talia. Por mirit dl intervënt dla ZCE Talia ti á l'aziënda retü al consumadú döta la soma che al â paié danfora.