Finanziell unterstützt durch
die Europäische Union
Europäisches Verbraucherzentrum Italien Büro Bozen

Verbrauchertelegramm Europa-Ausgabe Merz 2020

Beilage zur ladinischen Europa-Ausgabe Nr. 23 - Redaktion: Europäisches Verbraucherzentrum


EDIZIUN SPEZIALA: CORONAVIRUS
Cai é pa i dërc di viagiadus?

L’emergënza Coronavirus porta pro, sides a livel nazional che internazional, al’aprovaziun de mosöres che limitëia la zircolaziun y á conseguënzes por che che â programé vacanzes y sojornanzes foradecá. La Zentrala di Consumadus Europeica (ZCE) spliga cai che é i dërc di viagiadus te de te situaziuns. Tignide cunt che vigni situaziun mëss gní valutada singolarmënter, ajache les mosöres aprovades a livel nazional y internazional n'é nia anfat y pó tresfora gní mudades.

Imprömadedöt messon desfarenzié danter consumadus che mëss renunzié al iade porvia de n provedimënt dles autorités competëntes, y consumadus che á tut la dezijiun da renunzié autonomamënter por precauziun.

Por ci che reverda le pröm caje ne podess le passajier avëi degun problem da ciafé zoruch la soma bele paiada ite por jori o mesi de trasport anulá. Sce le consumadú á cumpré n pachet turistich che prevëiga na sojornanza te raiuns sotmetüs a limitaziuns por rajuns de segurëza, pón s'anuzé dl regolamënt sön i pachec turistics y i sorvisc coliá, che prevëiga le dërt dl viagiadú da anulé le contrat tl caje de situaziuns straordinares nia da tigní fora, sciöche por ejëmpl epidemies, sce ares influenzëia negativamënter la vacanza o an ne sciafia nia da arjunje le post de destinaziun.

Sce le consumadú tol indere la dezijiun da renunzié al iade ince sce al n'é nia proibiziuns, n’él nia sigü che la soma vëgnes retüda. Sce la cherta é gnüda cumprada cun na tarifa che conzed la retüda, mëss la soma gní retüda aladô de ci che é preodü dales condiziuns de venüda dla cherta. Sce le passajier renunziëia a n jore ál ma le dërt da ciafé zoruch les tasses d'aeroport, tan inant che al renunziëia denanco fá le check-in.

Tl caje che an renunziëies a na sojornanza te na strotöra te n raiun olache al n'é nia gnü detlaré l’emergënza y al n'é nia gnü aprové na limitaziun, podarán anulé la sojornanza aladô de ci che é preodü dales condiziuns de apostaziun. De regola ne pó n’apostaziun de n hotel nia gní anulada debann, ater co sce al é gnü fat fora val' d'ater. Porimpó pó les compagnies, i hotí y i tour operator sambëgn pité na soluziun independentemënter dales condiziuns legales. Por ejëmpl che che á cumpré na cherta dla ferata de Trenitalia o Italo pó l’anulé y damané che ara ti vëgnes retüda sot forma de voucher (o, tl caje de trasport regional, che al ti vëgnes retü i scioldi).

Al momënt ne vára nia da preodëi cai Paîsc che scriará dant limitaziuns y cares che sará les limitaziuns por jí te chisc paîsc por i zitadins talians por limité la difujiun dl'epidemia de coronavirus. Sön le sit dl Ministere di Afars Esters ciafëise les informaziuns de iade atuales y les proibiziuns eventuales: http://www.viaggiaresicuri.it/. Che che á aposté o ó aposté n iade messess controlé tresfora la situaziun che pó se mudé te vigni momënt. Informesse pro les fontanes ofiziales, chël ó dí pro les autorités nazionales o locales o tres media de crëta.

De plü informaziuns é da ciafé sön le sit dla ZCE.