Finanziell unterstützt durch
die Europäische Union
Europäisches Verbraucherzentrum Italien Büro Bozen

Verbrauchertelegramm Europa-Ausgabe Otober 2020

Beilage zur ladinischen Europa-Ausgabe Nr. 78 - Redaktion: Europäisches Verbraucherzentrum

COMERZ ELETRONICH

Social Commerce – n problem por la proteziun di dac?

Na varianta nöia dl shopping online, a chëra che an ti dij social-commerce, ti dá la poscibilité ales aziëndes da vëne sü produc y sü sorvisc sön plataformes dles rëis conesciüdes di media soziai. Le cliënt ne vëgn nia mené inant sön na plata web de shopping, mo al stlüj jö döta süa cumpra sön la plataforma dles rëis soziales. Mo chësta é na spada da dui tais por les consumadësses y i consumadus: da öna na pert vëgn le cumpré ite azeleré y scemplifiché de cotan, mo dal'atra pert vëgnel a se le dé de gran loces por ci che reverda la proteziun di dac. Sön i canai di media soziai ne vëgnel nia mostré sö produc a caje, deache chëstes anunzies é basades sön n algoritm che chir fora produc da mostré aladô de ci che les consumadësses y i consumadus marchëia cun "me plej", comentëia, partësc y ciara. Chësc á sciöche conseguënza le prigo da gní vitima de n marketing miré y agressif y tl peso di caji pó i dac memorisá ince rové tles mans falades. De plü informaziuns sön chësc argomënt ciafëise sön nosta plata internet sot a: https://bit.ly/33vCfbh.

IADI

Iade pauscial o iade individual?

La familia Crepaz y la familia Demez ó jí a se fá na vacanza ince sce al é le coronavirus. La familia Crepaz programëia n iade individual, chël ó dí che ara prenotëia düc i sorvisc de iade, sciöche por ejëmpl le jore y le hotel, pro fornidus desvalis. La familia Demez indere prenotëia por süa vacanza n iade pauscial olache dui o de plü sorvisc de iade vëgn prenotá te öna n'agenzia. Da chësc momënt inant ne mëss la familia Demez plü se cruzié de nia. Sce le jore ess da gní straiché, o le hotel da gní stlüt, spo fossel l'agenzia de iadi che se cruziass da organisé n'alternativa. Sce chësc ne vá nia da fá spo desdijará l'agenzia le iade y ti retará ala familia le prisc dl iade almanco sot forma de n bon. Y belavisa, sciöche le destin ó, vëgnel straiché tröc jori, döes edemes dan la partënza, porvia dl coronavirus. La familia Crepaz, mo gnanca la familia Demez, n'é bones da ciafé n jore sostitutif. La vacanza toma t'ega, cun la desfarënzia che la familia Crepaz mëss ti paié al hotel les tasses de anulaziun. Sce la familia Crepaz s'ess chirí fora n iade pauscial sciöche la familia Demez y ess prenoté düc i sorvisc cun un n organisadú ne foss chësc nia sozedü. De plü informaziuns sön i iadi pausciai ciafëise sön nosta plata internet sot a: https://bit.ly/30yTCWO.

CORONAVIRUS

Sce le iade vá atramënter de coche an se l'á imaginé

Cun le coronavirus mësson tres se n'aspeté öna, dantadöt en vacanza. Tla maiú pert di caji vára da ciafé na soluziun. Al é indere caji che vëgn atocá dassënn. Insciö, por ejëmpl n’é i cufri de n consumadú da Malta nia gnüs metüs sön le fligher y al á messü passé plü co n'edema amesa le Congo, che ê so tavert de iade, zënza sü cufri, te carantena. Na consumadëssa olandeja invers s'â tut para so iat en vacanza tl Cile. Do la vacanza êl gnü straiché zacotan de jori derevers y al n'ê nia alternatives che tignî cunt di tiers. Insciö éra stada sforzada da lascé so iat tl Cile. De plü informaziuns sön chisc caji ciafëise sön nosta plata internet (https://bit.ly/2St1jco). Anfat tan complicada che osta situaziun é, la Zentrala di Consumadus Europeica (ZCE) ciara dagnora da ves daidé ince tla situaziun plü ria.

Caje dl mëis
Baldi nia n caje su: n ël impara a conësce n'ëra tla rëi; chësta ti detlarëia so amur y inurcaltan dijera da avëi n problem y por ciafé na soluziun a chësc problem adorera scioldi da d'ël. Ara se trata de problems sciöche caji de maratia te familia, dificoltés finanziares o ince ma scioldi por podëi "finalmënter" jí a ciafé l'ël. Insciö éra ince stada te chësc caje che é gnü lauré fora dala Zentrala di Consumadus Europeica Talia (ZCE). Le consumadú á imparé a conësce n'ëra ruscia sön na plataforma por single y á avisa passé les fases descrites dessura. Do che al ti â bele trasferí de plü imporc da trëi zifres al'ëra, ál finalmënter contaté la ZCE che ti á splighé chësta forma de ingianades. Insciö éra jüda da tigní sö le consumadú denanche al ti trasferiss ciamó de plü scioldi ala trapolona.