Verbrauchertelegramm Europa-Ausgabe Forá 2020
Beilage zur ladinischen Europa-Ausgabe Nr. 14 - Redaktion: Europäisches VerbraucherzentrumDËRC DI CONSUMADUS
Plü trasparënza, plü dërc: New Deal por le bëgn di consumadus
Cun le scomenciamënt dl ann nü él jü en forza la diretiva (UE) 2019/2161, che messará gní tuta sö dai Stac comëmbri cina le 2021 y mira a modernisé les normes dl'UE por ci che reverda la sconanza dles consumadësses y di consumadus a öna cun l'evoluziun digitala.Tl dagní messará les plataformes dl e-commerce informé le consumadú sce la porsona che vënn é n privat o n comerziant y avisé le cumpradú che tl pröm caje ne vel nia les normes por la sconanza di consumadus. Implü messará les plataformes online dé dant sce ares é responsables por la consegnaziun dl patüc comané y eventualmënter por la gestiun dles modalités de restituziun tl caje de retrata.
Danter les atres novités preodüdes él la scombatüda cuntra les rezenjiuns falzes, la proibiziun dl'adoranza di bot por automatisé la cumpra online y stromënc legai nüs por les vitimes de pratiches comerziales nia iüstes che é gnüdes constatades dal'autorité competënta.
Por de plü informaziuns sön le new deal ciarede sön la plata internet dla Zentrala di Consumadus Europeica (ZCE).
ECC-NET
Barat dl patüc cumpré y dërt de retrata tl’UE
Öna dles domandes che vëgn dër gonot fata dales consumadësses y dai consumadus é sce an á le dërt da baraté le patüc che an á cumpré o cinamai sce an pó se trá derevers dal contrat. I colegs dla Zentrala di Consumadus Germania á fat n ressumé dla situaziun iuridica tl'UE. Tl caje de cumpres online á les consumadësses y i consumadus tl'UE le dërt da se trá generalmënter derevers tl tëmp de 14 dis, a condiziun che le patüc sides gnü cumpré ite da n comerziant de profesciun y nia da na porsona privata. Sce le patüc é indere gnü cumpré te na botëga ne n'án degun dërt de retrata o de barat. Ma tla Lituania vára da dé zoruch te na botëga le patüc cumpré y nia adoré tl tëmp de 14 dis dala data de cumpra y ciafé derevers i scioldi. Mo tla maiú pert di Paisc europeics él tröpes botëghes y ciadënes de botëghes che ti vëgn adincuntra a süa clientela y ti pîta la poscibilité da baraté le patüc cumpré. Por de plü informaziuns ciarede do sön la plata internet dla Zentrala di Consumadus Europeica Germania.ECC-NET
La Rëi dles Zentrales di Consumadus Europeiches mët a jí la campagna nöia por sü 15 agn
La Rëi dles Zentrales di Consumadus Europeiches ECC-Net festejëia so 15ejim ann d’ativité cun na campagna d'informaziun che se dá jö por dodesc mëisc alalungia cun argomënc d'interes por les consumadësses y i consumadus d'Europa: i dërc di passajiers, le geoblocking, l'e-commerce é ma n valgügn temesc de chësta scomenciadia.I contignüs dla campagna é a desposiziun sön i canai social dla Zentrala di Consumadus europeica Talia:
Facebook - Twitter: @ECCItaly - Instagram: ecc.italy - Youtube.
CAJE DL MËIS
N consumadú talian â prenoté sön internet n jore cun na compagnia de fligri irlandeja cun l'opziun priority boarding cun dui cufri a man lapró. Le de che al é pié ia ál fat le check-in tl aeroport y á paié la tarifa preodüda; mo chësc n'ê nia döt. Al á ince messü paié na tassa de 25 euro por le secundo cufer a man. Le consumadú s'á bëgn lascé sö, mo por nia. Sön le gate ti él gnü splighé che la tassa ne n'ê nia da paié y che al ess podü damané la retüda ala compagnia de jore. Le consumadú á fat sciöche al ti ê gnü dit, mo la resposta é stada na delujiun: n iade che les tasses é gnüdes paiades, ne póres nia plü gní retüdes.
Insciö s'á le consumadú adressé ala Zentrala di Consumadus Europeica (ZCE) Talia che ti á mené inant le caje ala ZCE Irlanda. La ZCE Irlanda é stada bona da ciafé na resposta positiva te püces edemes y al consumadú ti él gnü retü la tassa che al â paié zënza rajun.