Finanziell unterstützt durch
die Europäische Union
Europäisches Verbraucherzentrum Italien Büro Bozen

Verbrauchertelegramm Europa-Ausgabe Ma 2020

Beilage zur ladinischen Europa-Ausgabe Nr. 38 - Redaktion: Europäisches Verbraucherzentrum


IADI Y COVID-19

Les domandes che vëgn fates sovënz ala ZCE

Dal scomenciamënt dl'emergënza dl coronavirus é feter 2.000 consumadus gnüs dala Zentrala di Consumadus Europeica (ZCE) Talia cun domandes sön les apostaziuns de iadi y vacanzes. Al é gnü fora che vigni situaziun mëss gní valutada a pert, ajache les mosöres tutes a livel nazional y internazional n’é nia anfat y pó gní sotmetüdes tresfora a mudaziuns. Porimpó vëgnel tres indô fat les medemes domandes a chëres che al é gnü dé na resposta te forma de na lista de domandes fates sovënz (FAQ) da ciafé sön le sit web dla ZCE. Porchël sce i orëis fá na domanda ala ZCE ciarede denant sön le sit sce la resposta é iló. Les FAQ gnará ajornades tresfora y adatades ala situaziun iuridica che se svilupëia.


TRADING ONLINE

Metede averda a ci che i ëis sparagné!

Cun la crisa economica che al é porvia dla pandemia dl Covid-19 y le momënt de gran malsegurëza di marciá ciara tres de plü consumadus da otimisé sü sparagns investon tl trading online. Porimpó él da mëte averda, canche an baia de produc finanziars y investimënc, ajache an risćia da desfá i sacrifizi de na vita cun püc click. Les sozietés che promöi chisc produc o investimënc podess ne avëi nia l’autorisaziun dala Comisciun Nazionala por la Sozieté y la Börsa (CONSOB) da gestí üsc sparagns. La ZCE Talia ves spliga co reconësce les plataformes de trading online falzes: https://bit.ly/2xMnO5p.


METEDE AVERDA ALA TRAPOLADA!

Metede averda ai sic de streaming falc

Avisa sëgn, canche la maiú pert dles porsones passa döt so tëmp te ciasa y tröc á vëia da ti ciaré a n film, él tres de plü consumadus che salta te sic streaming che pé debann mo é na trapolada. I consumadus ciafa fora de nia da paié prësc 400 euro y ne sá nia co fá. La ZCE aconsiëia da ne paié nia y da ne se lascé nia sprigoré dales manaciades che chisc sic fej tles e-mails de amonimënt. Contatede la ZCE sce i dubitëis y ëis domandes (info@euroconsumatori.org).


CAJE DL MËIS
Ala fin dl 2019 â n consumadú sloven comané n per de sneakers da 580,00 euro da n sit talian. Le consumadú â bele tut demez l'etichëta canche al s’â intenü che le venditur ti â mené le model falé y insciö âl ortié zoruch i cialzá. Porimpó s’á le venditur online refodé da azeté la retüda dl consumadú cun la motivaziun che i cialzá "n’ê nia plü te sües condiziuns originales", ajache le cumpradú sloven â tut demez l'etichëta.
Le consumadú é jü dala Zentrala di Consumadus Europeica (ZCE) Slovenia, che s’á ortié inant a nos la reclamaziun. I un tut sö contat cun le cumpradú y ti un dit che le compradú n’orô nia se trá zoruch dal contrat, mo ma fá avarëi so dërt de garanzia, ajache al ti ê gnü ortié le cialzá falé. Tl caje de garanzia ne mëss la marcianzia nia gní ortiada tles condiziuns originales. Püch dedô á la ZCE Talia ciafé la resposta dl venditur: al azetâ la restituziun y ti á retü al consumadú la soma de 580,00 euro.