Finanziell unterstützt durch
die Europäische Union
Europäisches Verbraucherzentrum Italien Büro Bozen

Verbrauchertelegramm Europa-Ausgabe Messé/Agost 2020

Beilage zur ladinischen Europa-Ausgabe Nr. 55/62 - Redaktion: Europäisches Verbraucherzentrum


SAFER STREAMING

Na campagna d'informaziun dla Rëi dles Zentrales di Consumadus Europeiches (ECC-Net)

Al é dötaurela n boom a livel mondial dl streaming de films, propi ince porvia dl coronavirus. Mo metede averda ales ofertes debann che fej gola deache iadedô s'ascognel gonot abonamënc fac aposta por che an tomes te tënora.
I sic de streaming falc impiziëia les consumadësses y i consumadus cun na ligna de scenes en miniatöra o de video cörc de previjiun, mo por podëi spo ti ciaré al film vëgnel damané da se registré y stlüje jö n pice abonamënt de proa. Impormó do che an s'á registré vëgnon lassura che an ne ti pó nia pormez ai contignüs impormetüs. Mo deache an ne n'á paié nia se desmëntion saurí dla cossa, cina che do da n valgügn dis röiel adalerch na fatura de de plü cënc de euro.
Liede sön la plata internet dla Zentrala di Consumadus Europeica (ZCE) ciodí che al n'é nia da paié y ci che al é damí da fá.


FÁ IADI TL'UE

Cun la plataforma “Re-open EU” él plü saurí

L'isté é tëmp de vacanza y de iadi y almanco tl'UE pón finalmënter indô fá iadi sura i confins fora plü o manco lediamënter. La plataforma nöia “Re-open EU” cheriada dala Comisciun Europeica ves dëida planifiché osc iade, ves spliga por ejëmpl sce y canche al é da se vistí na maschera tl Paisc de destinaziun, sciöche ara é cun la destanza de segurëza, sce al é ciamó limitaziuns de iade parziales y ves dá ciamó cotan d'atres informaziuns pratiches sön le Paisc de destinaziun che vëgn tresfora ajornades. Insciö pó le turism europeich indô pié ia danü tl respet dles precauziuns sanitares che é debojëgn:


DËRC DI PASSAJIERS

I scioldi dla cherta de iade mëss gní retüs sce le jore vëgn straiché

An pó indô viagé lediamënter tl'UE y insciö él ince indô pié ia i iadi cun le fligher. Mo ci che é gnü desmentié tla situaziun d'emergënza di ultimi mëisc é che sce n jore vëgn straiché mëss les sozietés de jore rete le prisc dl jore - chësc é ci che vëgn odü danfora dal Regolamënt sön i dërc di passajiers de fligri. Ince l'Ënt Nazional por l'Aviaziun Zivil (ENAC) alza fora te n comunicat (https://bit.ly/2YnSMv9) che por i jori straicá do dai 3 de jügn che piâ ia dala Talia cun na destinaziun tl'UE n'él nia plü la poscibilité da se trá sotfora dal'oblianza da rete i scioldi sforzan sö n bonn. Sce la straicada vëgn lasciada alsavëi manco co 14 dis danfora y sce al n'é nia zircostanzes ezezionales él ince da paié na compensaziun. Por de plü informaziuns sön i dërc di passajiers consultede la plata internet dla ZCE.

CAJE DL MËIS
S'ëise impresté en vacanza n auto y ëise albü impara n inzidënt? Dailó messëise atira contaté le sorvisc cliënc dla compagnia d'imprëst, scrí fora sciöche al alda le formular de relaziun dl inzidënt, cherdé la polizia stradala y fá val' fotografies. Döt chësc é ince gnü fat da n consumadú polach che s'â impresté fora n auto tla Talia: canche al l'á dé jö él gnü informé che la cauziun ti foss impormó gnüda retüda canche ai foss stá bugn da stlarí sciöche l’inzidënt ê gnü a se le dé. I mëisc passâ y le consumadú ciafâ ma püces informaziuns sön la situaziun de licuidaziun dla prozedöra. Por chësta rajun é le consumadú jü dala Zentrala di Consumadus Europeica Polonia che ti á ortié inant la pratica ala ZCE Talia. Do l'intervënt dla ZCE éra jüda da desmostré la responsabilité dl inzidënt y al consumadú polach ti él gnü retü la cauziun y les spëises aministratives che al â messü ti paié ala compagnia d'imprëst, bëgn 900 euro.