Finanziell unterstützt durch
die Europäische Union
Europäisches Verbraucherzentrum Italien Büro Bozen

Verbrauchertelegramm Europa-Ausgabe Nuvëmber 2026

Beilage zur ladinischen Europa-Ausgabe Nr. 87 - Redaktion: Europäisches Verbraucherzentrum

TRAPOLARIES ONLINE

"I Navigati": na campagna sön la segurëza informatica cuntra les trapolaries online

Al é pié ia la campagna "I Navigati", sostignida da CERTFin deboriada cun la Banca d’Italia, l'Istitut por la verda sön les assiguraziuns IVASS, l'Assoziaziun bancara taliana ABI y banches desvalies, cun le patrozine dla Polizia de Stat, dl'Autorié por la proteziun dla privacy, dl'Agenzia por la segurëza informatica nazionala ACN y dl'Autorité por les garanzies tles comunicaziuns AGCOM, por sensibilité les zitadines y i zitadins, les families y les aziëndes sön i risć dles ingianades online, cun lapró ince chëres che s'anüza dl'inteliënza artifiziala. Al vëgn preodü materiai d'informaziun sön la plata web aposta y "Cybersecurity Open Days" tles banches.
Por de plü informaziuns:

PROTEZIUN DI DAC

Google: straufunga de 403 miliuns de euro por le tratamënt di dac de localisaziun

L'autorité irlandeja por la proteziun di dac ti á fat a Google na straufunga de 403 miliuns de euro por violaziuns cuntra la GDPR (General Data Protection Regulation) tl tratamënt de dac de geolocalisaziun dles anuzadësses y di anuzadus.
L'autorité por la proteziun di dac taliana á tut pert al prozedimënt tres le mecanism de cooperaziun preodü dal regolamënt europeich y á porté dant osservaziuns sön le classamënt dles violaziuns, sön les mosöres de coreziun y sön i criters por determiné la straufunga.
La dezijiun reverda ince i dac coiüs adöm tres funziuns sciöche "Web & App Activity" y "Location History".
Le caje desmostra coche les autorités nazionales pó cooperé canche na sozieté operëia te Stac comëmbri desvalis y le tratamënt di dac reverda anuzadësses y anuzadus te deplü Paisc.
Stlarimënt: la straufunga reverda ma la proteziun di dac personai y ne costituësc pordërt nia na dezijiun sön i contrac de consum de Google.
Por deplü informaziuns:

SOSTIGNIBILITÉ

Ecolabel UE: al crësc la crëta dles consumadësses y di consumadus tla merscia ambientala europeica

Na inrescida de Eurobarometer nöia publicada dala Comisciun europeica desmostra che les consumadësses y i consumadus conësc miú la merscia Ecolabel UE, adorada por identifiché i produc y i sorvisc conforms a criters ambientai, y ti á ince na majera crëta.
Aladô di resultac dl'inrescida:
arata l'81% dles consumadësses y di consumadus europeics che i produc Ecolabel UE ais na mëndra faziun sön l'ambiënt co produc analogs;
reconësc le 46% le logo, cun n aumënt de ot punc porcentuai ti confrunc dl 2023;
dij le 46% da cumpré gonot o datrai produc cun la merscia Ecolabel UE;
oress le 72% deslarié fora la merscia de cualité ince sön d'atres categories de produc.
L'inrescida mostra implü ciamó che al crësc tres deplü da domanda do produc da netijé, patüc tesciü y produc cosmetics cun chësta merscia.
Ara se trata ma de n ajornamënt informatif y nia de na norma nöia mo ara é te vigni caje de gran importanza deache ara reverda i stromënc che dëida les consuamdësses y i consuamdus valuté les carateristiches ambientales di produc y tó insciö les dërtes dezijiuns de cumpra.
Por deplü informaziuns:

CAJE DL MËIS
Tratan n iade de laur tla Germania á n consumadú talian messü sté chit de nöt a fossené benzin pro na corona de destribuziun automatica. Al á paié, mo baldi n'él gnü fora degun benzin dala pumpa. Impede ciafé derevers i scioldi, ti él gnü fora dala corona n bon dal medemo valur da dé fora avisa te chë staziun dal benzin.
Canche al é indô rové derevers a ciasa s'un ál capí che chël bon n'á pordërt degöna valüta ajache al ne foss nia plü tan tosc jü de chi versc. Porchël ál contaté le gestur dla staziun dal benzin y l'á perié che al ti retess i scioldi. Mo la resposta é stada negativa: al ti é gnü dit che al n'é nia poscibl da ciafé derevers scioldi contanc y gnanca da fá n trasferimënt bancar, an pó ma avëi benzin.
Chiló él antergnü la Zentrala di consumadus europeica (ZCE) Talia che ti á mené la pratica ales coleghes y ai colegs dla ZCE Germania che n'á nia pordü tëmp da sciacaré cun la staziun dal benzin mo s'á diretamënter adressé ala sënta zentrala dla ciadëna de destributurs. Chësta é stada avisa la dërta cossa da fá: la sozieté prinzipala á reconesciü le problem y ti á atira metü sön le cunt döta la soma al consumadú talian.