Verbrauchertelegramm Europa-Ausgabe Jená 2024

Beilage zur ladinischen Europa-Ausgabe Nr. 7 - Redaktion: Europäisches Verbraucherzentrum

Comerz eletronich

Cumpres dai giganc cineji dl e-commerce: prighi y mosöres de precuaziun

Prisc dër basc y la poscibilité da cumpré articui nia plü da ciafé y nia da podëi se vaghé: insciö tira adalerch i marketplace nüs, che á sovënz la sënta tla Cina, tres de plü porsones y dantadöt les plü jones. Porimpó mësson se damané sce al é veramënter n bun afar. La falsificaziun di produc, les dificoltés da fá avarëi i dërc de garanzia y la pücia segurëza di produc é ma n valgügn di problems de chi che an ne tëgn sovënz nia cunt canche an cumpra ite debota. Por de plü informaziuns ciarede do sön la plata internet dla Zentrala di Consumadus Europeica (ZCE).

METEDE AVERDA

Coaching online – al vëgn racomané da mëte averda

Davagné tröp zënza lauré, deventé n coach de atlec profescionisć o n coach dl'alimentaziun conesciü: chëstes é ma n valgönes dles impormetüdes di videos de coaching o di tutorials online, olache i influencers ti cunta a sü followers i socrëc de so suzes economich o personal. Mo sciöche al sozed sovënz n'é nia döt or ci che slomina. N iade paié ite descür, che che s'á impormó scrit ite, che le socrët por davagné é pordërt chël da impizé adalerch sön la plataforma d'atres porsones saurides da ingiané che ti ciares ai videos de coaching. Te döta l'Europa ti röiel tröpes segnalaziuns ala Rëi dles Zentrales di Consumadus Europiches (ECC-Net) sön i contrac stlüc jö por i cursc de coaching online da chi che les porsones ne sciafia nia plü da se trá zoruch. Ince l’ofize de Balsan dla Zentrala di Consumadus Europeica (ZCE) Talia nen á ciafé. Liede sön le sit dla ZEC de ci che ara nen vá.

GEOBLOCKING

Le Parlamënt dl'UE cuntra les blocades geografiches

Le Regolamënt sön le geoblocking 2018/302/EU ti proibësc ai venditurs de bëgns y sorvisc online da mëte sö blocades geografiches nia iustificades y d'atres formes de descriminaziun liades ala nazionalité, al post de residënza o al post de aciasamënt de na consumadëssa o n consumadú, da ortié inant automaticamënter l’utënza a d'atres plates spezifiches por le paisc da chël che al vëgn navighé (re-routing) o da preodëi condiziuns che penalisëia zënza iustificaziun. Porimpó él ciamó ciamps olache le geoblocking vëgn conzedü. Le Parlamënt dl'UE ó ciaré da tó y jí cun chëstes restriziuns che é ciamó sön le marcé unich. La fornidöra sura i confins fora dla marcianzia n'é por ejëmpl nia d'oblianza cun le Regolamënt varënt, y ince le streaming de contignüs audiovisuai, sciöche films, series y evënc sportifs, é stlüc fora dala proibiziun dl geoblocking. Por ci che reverda chisc seturs ti á le Parlamënt dl'UE damané ala Comisciun dl'UE y ai Stac mëmbri da ejaminé sce y coche an podará tó y jí cun chisc limic. Al é ciamó da stlarí sce les consumadësses y i consumadus europeics ará la poscibilité tl dagní da s'anuzé de contignüs audiovisuai da fornidus europeics da indlunch capró tl’UE.

CAJE DL MËIS

Na consumadëssa taliana â aposté y paié n valgönes chertes dl fligher por na fin dl'edema a Marsiglia tres n portal d'apostaziun spagnol. Le de da pié ia âra indere ciafé na burta noela: le jore dla compagnia di fligri irlandeja ê gnü straiché porvia de n scioper dl personal de control di jori tla Francia. Ala consumadëssa ti êl gnü pité n ater jore la sëra do, mo ajache la fin dl'edema a Marsiglia foss insciö stada ma de n de, â la consumadëssa refodé chësta proposta. Ara ess messü ciafé zoruch le prisc dl jore da jí y gní. La compagnia de fligri ti â tosc comuniché che la soma ê gnüda metüda te so "wallet", mo insciö n'éra nia stada. La soma podess indere ester rovada tl “wallet” dl intermediar. La Rëi dles Zentrales di Consumadus Europeiches á te chësc caje podü daidé la consumadëssa y por mirit dl intervënt dla Zentrala di Consumadus irlandeja ti á la compagnia de fligri trasferí ala consumadëssa sön so cunt bancar la soma che ti spetâ.