Finanziell unterstützt durch
die Europäische Union
Europäisches Verbraucherzentrum Italien Büro Bozen

Verbrauchertelegramm Europa-Ausgabe Jené 2016

Beilage zur ladinischen Europa-Ausgabe Nr. 7 - Redaktion: Europäisches Verbraucherzentrum


IADI Y VACANZES

Jori anulá o tardis: él saurí da ciafé le rembursamënt?

Dl 2015 ti él gnü ortié passa 4000 reclamaziuns ales Zentrales di Consumadus Europeiches de döta l'Europa da che che s'á stenté da ciafé le paiamënt d’avaliaziun tl caje de intardiada o de anulamënt de jori. Sce la compagnia á anulé le jore y proponü n jore alternatif á i passajiers dantadöt le dërt da gní informá damperfora. Aladô de tan debota che al é gnü lascé alsavëi y de tan grana che la desfarënzia danter orar vedl y orar nü é ti pól speté al passajier le paiamënt d’avaliaziun. Tla maiú pert di caji vëgnon a conescënza dl anulamënt o dl'intardiada canche an é te aeroport. Te chël caje án le dërt de paiamënt d’avaliaziun, sides che ara se trates de n anulamënt che de na intardiada de passa 3 ores. La soma dl paiamënt d’avaliaziun variëia aladô dla lunghëza dla trassa. Le paiamënt d’avaliaziun ne mëss nia gní paié sce l'intardiada ne depënn nia dala compagnia di fligri. La Zentrala di Consumadus Europeica (ZCE) a Balsan é a desposiziun por de plü informaziuns. Cherdesse sö al numer 0471/980939 o scriesse ala misciun info@euroconsumatori.org.


IADI Y VACANZES

Multiproprietés y produc de vacanza a dorada lungia: stlariun mo n pü'!

Multiproprietés, club vacanzes, bonus edemai y bonus vacanzes é ma n valgönes dles tröpes ofertes che i arëis odü tratan che i organisâse ostes vacanzes o tratan na bela sojornanza te n resort. Scebëgn che la normativa europeica da sëgn regolëia bele la conclujiun de n contrat de multiproprietés o de n produt por les vacanzes a dorada lungia, sconan le consumadú, messunse impó ester informá bun sön nüsc dërc a na moda da podëi ester sigüsc da cumpré cun consapevolëza y dantadöt da porsones che respetëia les leges. Dlungia le report scrit dala Rëi ZCE á ince la Comisciun Europeica scrit n report sön le tema dles multiproprietés, olache ara vá da analisé l'operativité dla legislaziun: (Diretiva 2008/122/CE, "Diretiva sön les Mulitproprietés"). De plü informaziuns é da ciafé sön nosc sit.


Caje dl mëis
Sce an á n problem da impresté fora n auto án sovënz l'impresciun da ester te n labirint: olache al ê n iade n tru, n'un n'él sëgn plü degun! Chësc é ci che ti é sozedü a n consumadú spagnol: al â impresté fora n auto por se gode la costa amalfitana cun süa chestiana. Le consumadú a dé jö l'auto tles medemes condiziuns che al l'â ciafé: degöna arissada nöia, degöna paca nöia. Porimpó ti él gnü trat jö val’ al consumadú da süa cherta de credit; sambëgn ál damané do stlarimënc. La resposta é stada che al â danejé i sic dl auto, ajache al â borjé la peza cun n zigaret o n zigare. Ajache al n'ê nia sté bun da ti fá capí al'aziënda che al n'ê nia sté ël ajache al ne föma nia, ti á le consumadú damané aiüt ala ZCE Spagna che ti á ortié inant la pratica ala ZCE de Balsan. La ZCE de Balsan á odü che al bastâ desmostré che le consumadú ne pó nia avëi gaujé le dann, porchël ti ára damané al consumadú da ti ortié n zertificat dl dotur olache al ê scrit che al ne föma nia. Tosc fat: le documënt injunté ala reclamaziun é gnü ortié inant ala compagnia d'imprëst d'auti, che ti á indô retü i scioldi al consumadú do avëi fat i controi che jô debojëgn.