Finanziell unterstützt durch
die Europäische Union
Europäisches Verbraucherzentrum Italien Büro Bozen

Verbrauchertelegramm Europa-Ausgabe Dezëmber 2016

Beilage zur ladinischen Europa-Ausgabe Nr. 84 - Redaktion: Europäisches Verbraucherzentrum



COMERZ ELETRONICH

Cumpré ite online: schivé de burtes sorpreses sot le lëgn da Nadé
Al é vëi che tl internet él n gran sortimënt de patüc y che ara vá ince da sparagné scioldi, mo al é mefo ince da tó en conscidraziun che la consegnaziun podess gní fata cun intardiamënt. Porchël él important da comané le patüc adora assá por ne resté nia cun les mans ötes sot le lëgn da Nadé.
Por ci che reverda l'apostaziun por tëmp él ciamó da se recordé de n ater consëi dla Zentrala di Consumadus Europeica (ZCE): chësc reverda le dërt de retrata. Ince tratan le tëmp da Nadé mësson s'anuzé dl dërt de retrata te 14 dis da canche an á ciafé le patüc. Metede averda: al n'é nia dagnora preodü n dërt de retrata por ci che an cumpra!
De plü informaziuns sön chësc argomënt é da ciafé sön nosta homepage.


AGENZIES MATRIMONIALES

Apuntamënc al scür ... online
N consumadú é gnü inciurní dales parores impizëntes de B5231: "Tüa odlada é afascinanta y i pó bele m'imaginé tan plajora che tüa usc é ... I oress te conësce damí." B5231 á metü online la foto de se instëssa sön so profil cun chësta descriziun: ëra, doturia, ciavëis rosc, edli bröms, spontana y da na gran pasciun.
Baldi ne conesciará le consumadú mai B5231 de porsona, deache ia do le profil s'ascognel n scrivan IKM; chësc acronim stá por Internet Kontaktmarkt, chël oress dí marcé internet di contac. Le fin de chisc scrivans é chël da fá a na manira che i consumadus romagnes tles chatrooms a paiamënt y dais fora ciamó plü scioldi por podëi baié cun so profil "ideal". La Zentrala di Consumadus Europeica ves dá n valgügn consëis por se stravardé da de te caji.


COMERZ ELETRONICH

Sentënza cuntra Airbnb
Le Tribunal de San Francisco, la cité de nasciüda de Airbnb, á pronunzié na sentënza cuntra le portal internet che á le potenzial da mëte sotissura le marcé online: Airbnb mëss controlé che les abitaziuns che vëgn pitades a San Francisco tres chësc portal sides gnüdes registrades dal afitadú pro les Autorités locales. Chësta sentënza é dër en contrast cun la funziun che Airbnb s'atribuësc. La plataforma ó intermedié abitaziuns y ciafé paié por chësc, zënza se surantó indere la responsabilité por i contignüs metüs ite dai utënc y dales utëntes. La sentënza é tan d'importanza deache ara podess gní trasferida te na te forma ince ai giganc dl comerz online sciöche Amazon y Ebay. Ince chëstes plataformes foss spo responsables di contignüs dl'utënza - por ejëmpl sce zacai ess da vëne patüc falsifiché - y messess garantí che i utënc y les utëntes se tëgnes ales normes varëntes. Al é dër probabl che Airbnb contestëies la sentënza. Ince tla Talia vëgnel fat na discusciun sön normes plü rigoroses, dantadöt por ci che reverda la tassaziun di profic. Atualmënter vëgnel tigní consëi sön na proposta de lege che reverda la sharing-economy.
De plü informaziuns sön la sentënza é da ciafé sön la plata internet dla ZCE dl'Austria.


Caje dl mëis
N consumadú dl'Islanda s'á chësc isté metü sön le iade pian ia dal nord frësch cuntra le süd cialt dla Sardegna. Por trëi edemes alalungia ál rodé jö l'isola y se á godü la bela contrada mediterana. Mo propi süa gran vëia da rodé l'á fat salté te na burta sorpresa: pro na fossenara él gnü sura che tl tanch de so auto impresté ne stôl nia ite 50 euro de benzin. Insciö tratan che le consumadú metô ite benzin ál messü bloché döt ince sce al â bele metü ite tl automat self-servisc na zetola da 50 euro. Sön na tara pretenôl che al ti gniss retü la desfarënzia de 25 euro. Le titolar dla fossenara ti scriô fora n bon de chësta soma che al ess podü adoré pro vigni atra fossenara dla medema sozieté tla Sardegna. Mo ara n’é indere nia stada insciö. Cater fossenares ne n'á nia azeté so bon. Do che al é rové a ciasa ti ál scrit na reclamaziun ala sënta dla sozieté dal öre a Roma; chësta ê ma desponibla da ti arlungé le bon de sis mëisc! Le consumadú ne n’â indere nia l’intenziun da jí tan snel indô tla Sardegna. Pormó do che la Zentrala di Consumadus Europeica de Balsan á tut tla man la situaziun él sté meso da fá a na moda che al ti gniss retü la soma restanta al consumadú.