Finanziell unterstützt durch
die Europäische Union
Europäisches Verbraucherzentrum Italien Büro Bozen

Verbrauchertelegramm Europa-Ausgabe mà 2016

Beilage zur ladinischen Europa-Ausgabe Nr. 35 - Redaktion: Europäisches Verbraucherzentrum


COMERZ ELETRONICH

Cumpré chertes por manifestaziuns sportives online… ocio ales ofertes impiziëntes!

Le sport apascionëia! Canche i cumprëis indere chertes online él da mëte averda da ne se lascé nia adorbé dal entusiasm, deache al roda dagnora chertes falsificades y comerzianc finc che ó ti sité ala jënt apascionada! Chiló ciafëise n valgügn consëis dala Zentrala di Consumadus Europeica – ofize de Balsan, por schivé de burtes sorpreses: cumprede les chertes ma sön les plates internet ofiziales, sciöche sön le sit UEFA, o pro comerzianc autorisá, dá dant espressivamënter dal Comité Olimpich, stampede y tignide sö na copia di documënc che reverda la prozedöra de prenotaziun o salvede i screenshots che alda lapró, ne stede a ti avëi crëta a che che vënn chertes last minute y gnanca ne al secondary ticketing: al podess se traté de chertes bele rovades da n pez, de chertes falsificades o cinamai nia esistëntes, paiede les chertes cun la cherta de credit. La Zentrala di Consumadus Europeica dla Germania ves dá dötes les informaziuns importantes por i Campionac europeics dl palé 2016. De plü informaziuns y consëis ciafëise ince tl ofize dla Zentrala di Consumadus Europeica de Balsan.


COMERZ ELETRONICH

Paiamënc cun la cherta de credit pro cumpres online – proposta de mudaziun dla lege

Al é tres de plü consumadësses y consumadus che cumpra ite tres internet y paia spo cun la cherta de credit. Porchël tocass le livel de proteziun pro paiamënc cun la cherta de credit da gní alzé. Dötaurela vëiga la lege taliana danfora che la soma paiada mëss gní retüda te dui caji: sce la soma trata jö n'é nia iustificada o sce i paiamënc é iustificá mo é gnüs fac tla manira falada.
Porchël á la Zentrala di Consumadus dl Südtirol y la Zentrala di Consumadus Europeica lauré fora deboriada na proposta de lege y ti l'á presentada al Ministere dl'economia y dles finanzes. Sce chësta proposta gniss tuta sö ess tl dagní che che paia cun la cherta de credit le dërt al chargeback, chël ó dí ala retüda dla soma paiada, ince tl caje che la consegnaziun di bëgns o di sorvisc bele paiá ne gniss nia fata tl tëmp fat fora o tl caje che l'aziënda jiss en malora. De plü informaziuns é da ciafé sön nosta plata internet.


COMERZ ELETRONICH

I cosć de roaming s'arbassa

Bele da n valgügn agn á l'UE lascé alsavëi che ara ó realisé n marcé intern tl setur dles telecomunicaziuns por sconé les consumadësses y i consumadus che se sposta tl'Uniun Europeica da cunc dl fonin fora de mosöra. Ai 30 d'aurí él gnü arbassé i cosć por le roaming; chisc gnará spo tuc jö daldöt dal 15 de jügn dl 2017. Roaming ó dí che le consumadú adora la rëi de n operadú telefonich forest. De plü informaziuns y consëis él da ciafé sön la plata internet dla Zentrala di Consumadus Europeica de Balsan.


Caje dl mëis
Por le pröm iade ó berba M. se tó do so cian sön so iade cun le fligher. Ara ne se trata nia de n gran cian, mo bëgn ma de n te' pice tier por chël che al basta na picia gabia y la cherta de jore. Berba M. comana la cherta de jore por döta la familia: por süa fomena, so möt y so cian. Por ne perde nia tëmp fejel ince bele le check-in online. Mo canche al é sön le gate da pié ia ti lascia le personal dla sozieté de jore spagnola alsavëi che an ne pó nia fá le check-in online sce an se tol do n cian. Berba M. se fej demorvëia: ciodí éra pa spo impó jüda da fá le check-in online? Cun l'aiüt dla Zentrala di Consumadus Europeica dla Talia ti ál atira mené na reclamaziun ala sozieté de jore y á ghiré che al ti gniss retü i cosć dla cherta de iade y de dötes les atres spëises che al á albü da gní indô zoruch a ciasa por pié indô ia le de do a tó le fligher cun le cian, mo en chësc iade zënza fá le check-in online. La sozieté de jore é a öna da ti rete le cost dla cherta de jore, mo nia dötes les atres spëises.