Finanziell unterstützt durch
die Europäische Union
Europäisches Verbraucherzentrum Italien Büro Bozen

Verbrauchertelegramm Europa-Ausgabe Auril 2016

Beilage zur ladinischen Europa-Ausgabe Nr. 28 - Redaktion: Europäisches Verbraucherzentrum


IADI Y VACANZES

Prenotaziun online dles vacanzes: ti corespogn pa le prisc final a chël dé dant tl pröm?

La rëi dles Zentrales di Consumadus Europeiches (ECC-Net) laora a n Joint Project, n proiet fat deboriada te chësta rëi, sön la “Prenotaziun online dles vacanzes: ti corespogn pa le prisc final a chël dé dant tl pröm?'' Dl 2015 é tröc consumadus jüs dala ECC-Net ajache le prisc final de n jore, de n hotel o de n auto da impresté fora y aposté online ê majer co chël dé dant tl pröm. S'él bele n iade sozedü val' de te? Fajede para al'inrescida clican sön chësc link.


E-COMMERCE

15 de merz – De mondial dl consumadú – Brosciüra nöia sön l'e-commerce

Ti ultimi agn á internet y les tecnologies digitales nöies porté pro a de gran mudaziuns te vigni setur. I consumadus che ti röia pormez ala rëi pó s'anuzé de chësta revoluziun digitala adoran düc i vantaji che ara implichëia. Le fatur indispensabl é indere l'informaziun. Por chësta rajiun á la Zentrala di Consumadus Europeica (ZCE) de Balsan coiü adöm y publiché te na brosciüra düc i dërc, i consëis y les informaziuns che reverda l'e-commerce. La brosciüra é desponibla sön nosc sit internet. La verjiun sön papier ciafon deperpo debann te nosc ofize de Balsan tla strada Brennero 3 o tles sëntes dla Zentrala di Consumadus.


IMPORTAZIUN DE AUTI

Cumpré n auto te n ater Stat mëmber dl'UE: paiel la mëia?

Sce an chir n model particolar, na bona oferta o sce an ó ince ma avëi na cerna plü ampla tol tröc consumadus europeics la dezijiun da cumpré val' te n ater stat europeich s'anuzan de ocajiuns speziales.
Dl 2015 á 29 Zentrales di Consumadus Europeiches - coordinades dala Zentrala di Consumadus Europeica dla Francia - lauré fora n'analisa sota dles dificoltés che i consumadus á canche ai cumpra sura i confins fora auti cun le fin da dé respostes. Ares á porchël scrit documënc d'informziun por ti pité ai consumadus che cumpra n veicul te n ater stat europeich y tla Norvegia, consëis pratics por vigni fasa dl prozedimënt: dala tratativa cina che al vëgn stlüt jö la prozedöra d'imatricolaziun. Düc chisc documënc é dan man por inglesc sön chësc sit. De plü informaziuns, aiüc pratics y sostëgn ciafon ince dala Zentrala di Consumadus Europeica de Balsan al numer de telefon 0471/980939 o ala misciun e-mail info@euroconsumatori.org.


Caje dl mëis
N consumadú talian á cumpré por 350 euro da n sit de venüda todësch dui parapaltan de secunda man – mo te dër de bones condiziuns – por so auto. Mo ajache le produt ne rovâ mai adalerch s'á le consumadú informé sön la spediziun. L'impresa de spediziun ti á lascé alsavëi che le produt ê bëgn gnü ortié, mo che le poch ê gnü ortié zoruch ajache al ê massa gran. Le consumadú á spo atira paié ciamó 40 euro porvia dla gran dimenjiun dl pacl. Mo canche ai ti á surandé le poch s'ál intenü che i parapaltan de secunda man n'ê nia te de bones condiziuns y che ai â arissades y baches. Le consumadú ti á porchël lascé alsavëi al'aziënda che al orô se trá zoruch dala cumpra. Ince sce l'aziënda ti â impormetü da ti rete 350 euro, ne rovâ chisc scioldi nia adalerch. Le consumadú ne l'á nia dada sö y á contaté la ZCE de Balsan, che á cherdé sö la ZCE di Paisc Todësc. Do chësc intervënt á le consumadú ciafé te cört tëmp döta la soma damanada.