Verbrauchertelegramm Europa-Ausgabe Otober 2019

Beilage zur ladinischen Europa-Ausgabe Nr. 78 - Redaktion: Europäisches Verbraucherzentrum


METEDE AVERDA AL’INGIANADA!

Co fá da ne se lascé nia trapolé canche an chir n’abitaziun

Stefan chir sön internet n’abitaziun por so ann de Erasmus a Paris y al abina n’oferta che ti plej: na ciamena te na posiziun zentrala a n prisc da sciafié. Al n’á nia bria da jí a ti ciaré al apartamënt, al basta che al paies danfora l’afit de n mëis y la cauziun.
Düc chi che chir n post da podëi sté, bel anfat sce ara se trata de n studënt o n laurant, sá che ara ne vá nia da fá a manco di portai internet. Mo indere sön internet él ince na dreja de trapoluns. Ne stede porchël mai a ti mené inant a porsones che i ne conescëis nia üsc dac bancars y gnanca ne copies de osta cherta d’identité, ne stede mai a paié cina che i ne ëis nia podü ti ciaré al imobil, ciarede do sce la misciun esit veramënter y tolede la chirida dles imajes al contrar cun n motor de chirida por capí sce les fotografies é bele gnüdes adorades por d’atres anunzies cun na misciun desfarënta.
Liede inant sön la plata internet dla Zentrala di Consumadus Europeica sciöche la storia de Stefan é jüda a finí (https://bit.ly/2mc8fy5).


JORI

Aigle Azur straichëia düc i jori

Ciamó n inom s’ajunta ala lista dles sozietés de jore insolvëntes: la compagnia de fligri franzeja Aigle Azur é dai 2 de setëmber incá sot a aministraziun controlada y á straiché düc i jori. N valgönes sozietés de jore pîta tarifes speziales por passajiers atocá che á debojëgn da cumpré na cherta de jore. Döta la lista di fligri é da ciafé sön la plata internet de Aigle Azur.
Porvia dla situaziun finanziara de Aigle Azur n’é la sozieté nia bona da rete les chertes de jore o paié indenisaziuns por i jori straicá. Sön la plata web dla sozieté él bëgn la poscibilité da scrí fora n formular por franzesc y da dé insciö dant les ghiranzes che an á tla prozedöra de falimënt, ince sce al é ma püces probabilités che al sides por valch.
La Zentrala di Consumadus inviëia düc che che á cumpré la cherta de jore tres cherta de credit da contaté la sozieté che á dé fora la cherta de credit y da ativé la prozedöra charge back por ciafé zoruch les somes paiades.


PAIAMËNC SURA I CONFINS FORA

Sentënza nöia dla Curt de iustizia dl’UE sön l’adebitaziun direta SEPA

I colegs dla Zentrala di Consumadus Europeica Austria nes lascia alsavëi n’aziun legala dl’assoziaziun por l’informaziun di consumadus austriaca (VKI) cuntra la Deutsche Bahn. La VKI é dl’idea che la clausola, aladô de chëra che le paiamënt tres adebitaziun bancara direta é ma poscibla por i consumadus che stá tla Germania, sides cuntra le Regolamënt SEPA dl'UE.
La Curt de iustizia á confermé chësta minunga: sce n consumadú ó paié tres adebitaziun bancara direta SEPA ne pó chësc nia ti gní impedí ma deache so cunt bancar n’é nia te n stat comëmber determiné (p.ej. la Germania). La Curt de iustizia dl’UE á implü ince detlaré che al n’é nia relevant sce i cliënc á ince d’atres metodes de paiamënt da podëi chirí fora.


CAJE DL MËIS
N consumadú talian á daurí n cunt corënt da podëi gestí tres so smartphone y á atira paié ite na soma de 2.000 euro. Do da gnanca n de él gnü sura che al ê gnü fat n trasferimënt bancar de 1.000 euro a n’aziënda che al ne conesciô nia. Püch dedô é chësc sozedü n secundo iade. Insciö resultâl che sön so cunt n’êl gnanca plü n euro. Belatira á le consumadú contaté le sorvisc por la clientela por anulé chisc paiamënc bancars nia autorisá, menon inant na copia dla plüra ince ala Polizia taliana. Mo deache ara n’é nia jüda da ciafé na soluziun al problem cun la banca, che â süa sënta tla Germania, s’ál adressé ala Zentrala di Consumadus Europeica (ZCE) Talia che ti á mené inant la pratica ai colegs dla ZCE Germania. Tres chisc éra jüda da anulé y recuperé i scioldi de öna na transaziun nia autorisada. Por l’atra á la ZCE contaté l’Autorité bancara y finanziara competënta tla Germania. Chësta á tut na dezijiun a bëgn dl consumadú deache al s’á belatira dé da fá por contesté la transaziun nia autorisada. Por mirit dla ZCE é le consumadú ala fin sté bun da recuperé döta la soma.