Finanziell unterstützt durch
die Europäische Union
Europäisches Verbraucherzentrum Italien Büro Bozen

Verbrauchertelegramm Europa-Ausgabe Jená 2018

Beilage zur ladinischen Europa-Ausgabe Nr. 7 - Redaktion: Europäisches Verbraucherzentrum


VACANZES Y IADI

La compagnia de jore Niki detlarëia da ester insolvënta: dai 12 de dezëmber 2017 incá resta i fligri ia por tera
Do che la Lufthansa n'é nia plü stada interessada da surantó la Niki, la compagnia de fligri dl grup Air Berlin, á la Niki detlaré l'insolvënza. Le trafich di fligri é atira gnü fat sté sö y les chertes de jore bele venüdes á pordü süa validité. Che che á cumpré n jore Niki tl cheder de n pachet turistich dess s'adressé a süa agenzia de iade: chësta mëss ciaré da ciafé na soluziun por chëstes consumadësses y chisc consumadus y en caje ti pité n jore sostitutif. Che che á prenoté n jore diretamënter pro la compagnia de jore Niki o tres n intermediar (p. ej. n ofize iadi, na plataforma de prenotaziun online) mëss prinzipalmënter s'organisé instës n jore sostitutif y paié fora de so tacuin. Le curadú dl falimënt á porimpó lascé alsavëi che al é n cunt de crëta fora dl'insolvënza dla Air Berlin, sozieté-mama dla Niki, che garantësc les ghiranzes dla sozieté afiliada.
Sciöche al pé ti podessel gní retü le cost dla cherta de jore de Niki ales porsones che l'á cumprada do che la Air-Berlin â detlaré l'insolvënza (15 de agost dl 2017). A dötes les cliëntes y a düc i cliënc dla Niki ti aconsiunse porchël da tigní tl edl chësta plata internet https://airberlin-inso.de/start por gní alsavëi dötes les novités che reverda chësta chestiun.


COMERZ ELETRONICH

Controversies dl comerz eletronich: 1,9 miliuns de porsones é jüdes sön la plataforma ODR
De forá dl 2016 á la Comisciun Europeica invié ia la plataforma tlamada ODR: na plata internet interativa. Cina sëgn él gnü daurí sö chësta plataforma 1,9 miliuns de iadi y al é gnü mené ite 24.000 reclamaziuns. Pornanche la reclamaziun röia sön la plataforma se mët chësta en contat cun le comerziant y ti fej a trames perts la proposta da ciafé na soluziun extraiudiziara tres n organ d'apajamënt alternatif. Chësc mëss ti daidé ciafé na soluziun al consumadú y al comerziant te 90 dis - te caji ezezionai pó le tëmp gní proroghé. La Zentrala Consumadus Europeica (ZCE) Talia sciöche punt de contat ODR por la Talia á dal scomenciamënt dl ann incá bele respognü a 1.400 domandes.
Por de plü informaziuns sön le raport dla Comisciun Europeica y la plataforma ODR podëise contaté l'ofize de Balsan dla Zentrala Consumadus Talia.


VACANZES Y IADI

Jí en vacanza da Nadé cun l'auto
L'App “Mit dem Auto ins Ausland” acompagnëia te na manira otimala dötes les porsones che é sön le iade cun l'auto o le camper fora por les strades dl'Europa. L'app por smartphone y tablet é debann y dëida, les porsones che sá todësch, rodé intoronn cun plü segurëza. Chësta app ti pîta ales porsones che l'adora informaziuns sön düc i stac dl'UE, la Svizera, la Norvegia y l'Islanda. De plü informaziuns ciafëise sön la plata internet dla Zentrala Consumadus Germania.


Caje dl mëis

D'otober dl 2016 s'â n consumadú talian aposté n auto nü che costâ 52.000 euro pro n comerziat de auti dla Danimarca, paian n acunt de 8.000 euro. L'auto ess messü ti gní surandé ala fin d'aurí dl 2017. Ai pröms de merz canche le consumdú s'informâ sciöche ara stô cun la consegnaziun ti él gnü comuniché che so auto ne ti ê mai gnü comané al produzënt. Bonamënter êl jü stort valch cun l'apostaziun. Le comerziant se scusâ bëgn por ci che al ê sozedü, mo al ti lasciâ alsavëi al comerziant dër desplajü che ara foss impormó jüda da ti fá avëi l'auto aposté por i pröms de setëmber dl 2017. Le consumadú ne ê bëgn no contënt de chësta cossa. Porchël s’ál adressé ala Zentrala Consumadus Europeica (ZCE) de Balsan che á atira contaté la ZCE Danimarca, damanan do sostëgn. Cun suzes: ai pröms de messé á le consumadú podü pié do so auto bel nü; implü ál ciafé dal comerziant 600 euro sciöche retüda dl dann por la consegnaziun tardia.