Finanziell unterstützt durch
die Europäische Union
Europäisches Verbraucherzentrum Italien Büro Bozen

Verbrauchertelegramm Europa-Ausgabe Fauré 2014

Beilage zur ladinischen Europa-Ausgabe Nr. 14 - Redaktion: Europäisches Verbraucherzentrum


CEC

L 2014 dla Zentrela Europeica Cunsumadëures (ZEC) de Bulsan

Sce la consulëntes dla Zentrela Europeica Cunsumadëures de Bulsan messëssa tré adum la trëi cuestions che à caraterisà l ann 2014 dijësseles: diretiva nueva di cunsumadëures, mprëst d’auti y social media. Diretiva nueva di cunsumadëures ajache chësta ie jita n forza ai 13 de juni 2014 njuntan nuviteies mpurtantes y de majera scunanza per i cunsumadëures. L mpëni dla espertes dla ZEC per fé cunëscer a cunsumadëures y operadëures chësta nuvità normativa ie stat grant, danter l auter àles fat ntervënc n ucajion de cunferënzes y ajurnà l material de nfurmazion.
L mprëst d’auti ie ntant sce un di setores pra chëi che la retlamazions avanea for deplù. Tl 2012 à la Rë dla ZEC giapà 282 senialazions da pert di zitadins europeics che se lamentova de problems defrënc y melservijes abui canche i à mprestà n auto da n pitadëur talian: tl 2013 409 y tl 2014 bën 539 (belau l dopl che tl 2012).
La terza cuestion che à caraterisà l 2014 ie stata chëla di social media: tres na gran atività mediatica à la culaboradëures dla Zentrela dat ora nfurmazions y cunsëies sun la plata Facebook dla ZEC Italia), sun Twitter (@ECCItalyBolzano) y sun la plata web www.euroconsumatori.org.
De plu nfurmazions sun l’ativiteies dla ZEC de Bulsan dl ann passà ie da liejer sun la plata.


VIAGES Y VACANZES

Possi pa desdì debant mi vacanza tl cajo de malatia?

L ie truep cunsumadëures che muessa renunzië tl ultim mumënt al’ena blancia – l’ena de feries da d’inviern – ajache i ie liei al liet pervia dl tisl. Suvënz mieni che l sibe mé de bujën de n zertificat dl dutor, coche na sort de giustificazion, per ne messei no paië l viac. Chësc ne ie danz nia nsci, ajache rezeder debant ne ie de regula nia puscibl.
L risch de se amalé y de ne pudëi nia giaudei di servijes cumprei pëisa sun l cunsumadëur y nia sun l patron dl albierch, l tour operator o la cumpanies de jol. L possa perchël vester de utl stlù ju n’assegurazion de viac aposta che cur i custimënc de rezeduda tl cajo de na malatia nia preududa. Per chi che va gën cun i schi y che uel fé na vacanza oradecà iel de mpurtanza stipulé n’assegurazion che cuere la spëises per l socors cun l joler. N cunsumadëur che à n nzidënt sun i purtoies da jì cun i schi tl’Austria p.ej. manacia de messei paië nce n valgun milesc de euro per l trasport te spedel.
Lijëde sun la plata dla ZEC ciunes che ie la opzions de rezeduda dala prenutazions.


CAJO DL MËNS

La vacanzes de n’ena a Hurghada de doi cunsumadëures ie unida scurteda de n 7 ëura pervia che l jol per ruvé a destinazion ie unit spustà y l jol de reviers antizipà. I cunsumadëures cëla de giapé, sibe tres l tour operator tudësch sibe tres la cumpania de jol, na ndenisazion o na cumpensazion. Ma da tramedoi pertes ti vëniel dit che chësc ne ie nia puscibl. Tla comunicazion dla cumpania de jol vëniel fat referimënt a n problem tecnich che ne fova nia da udëi danora y che univa tlassificà dala cumpania de jol coche "forza plu auta" y cundechël fossa l rembursamënt, aldò dl regulamënt UE, stat da stlù ora. I cunsumadëures damanda perchël do pra la Zentrela Europeica Cunsumadëures (ZEC) Talia, che damanda aiut tla Germania. Na retlamazion pra l tour operator ne dà nia l resultat sperà pervia dla despusizions n forza, aldò de chëles che na reduzion de n valgun’ëura tl tëmp de feries dajëssa mé dinrer la rejon a n rembursamënt. L ne resta perchël auter che cuntaté mo n iede la cumpania de jol fajan na dumanda de cumpensazion per la tardivanza dl jol, coche preudù dal regulamënt UE. I colegs cëla de se muever tres n organn de cunziliazion tudësch. L ie pona stat na gran marueia canche la cumpania de jol à te n iede dat pro n paiamënt de ndut 800 euro, sambën zënza dé pro si gaujes. Mo n iede: l dit "l po’ suzeder dl dut" ie propi vëira!