Finanziell unterstützt durch
die Europäische Union
Europäisches Verbraucherzentrum Italien Büro Bozen

Verbrauchertelegramm Europa-Ausgabe Jügn 2014

Beilage zur ladinischen Europa-Ausgabe Nr. 42 - Redaktion: Europäisches Verbraucherzentrum


IADI

Mësseste te dessenè en vacanza? La Zentrala di Consumadus Europeica (ZCE) te dëida!

Al devënta tres plü normal por i consumadus europeics da prenotè iadi, jori y hotì online. Dl 2013 ti él rové ala Rëi dles Zentrales di Consumadus europeiches 5950 retlamaziuns por ći che reverda le trasport cun le fligher; inće hotì y restoranć toca pro i 10 seturs cun le maiù numer de retlamaziuns. Chëstes statistiches vëgn inće confermades a livel nazional: le 36,58% di 3078 consumadus che à contatè tratan le 2013 la ZCE da Balsan adorâ aiüt por n problem cun le trasport, le 13,04% dles retlamaziuns â da nen fà cun le setur di auti a d’imprëst, le 7,38% revardâ i sorvisc dl tëmp lëde y le 6,00% le setur de restoranć y hotì.
Por podëi s’anuzé dl sorvisc de consulënza debann dla ZCE po les consumadësses y i consumadus contatè la ZCE tres e-mail (info@euroconsumatori.org) o cherdè sö les consulëntes al numer de telefonn 0471-980939. Le material d’informaziun é inće a desposiziun online sön la plata dla ZCE.


Dërć di consumadus

13 de jügn dl 2014 – Dé fissé por na picia revoluziun di dërć di consumadus

Le 13 de jügn dl 2014 pon feter aratè n dé storich por le consumadù europeich deache en chësc dé val en forza te düć i stać dl’Uniun Europeica dërć nüs por la sconanza di consumadus. Inće le legislatur talian à convertì por tëmp la diretiva comunitara y mudé de plü articui dl Codesc por la sconanza di consumadus, dantadöt por ći che reverda le comerz eletronich y i contrać porta a porta.
Ći che se müda é por ejëmpl i terminns y les formes dl dërt de retrata. An ne n’à nia plü 10 dis da laûr de tëmp, mo bëgn 14 dis dl calënder y an ne mëss nia menè na lëtra racomanada cun recioiüda derevers, mo al basta menè na spligaziun tlera por ejëmpl tres e-mail o fax. Implü mëss l’imprenditur ti mëte a desposiziun al consumadù n ejemplar de detlaraziun de retrata. Sc'al ne fej nia chësc o ne informëia nia le consumadù bele danfora sön so dërt de retrata vëgn le terminn proroghè de n ann. De plü informaziuns sön les regoles nöies é da ciafè sön la plata dla ZCE.


ECC-Net

Campionać mondiai dl palê tl Brasil

Le borjù dl palê à śëgn inće colpì les Zentrales di Consumadus Europeiches. Por düć i fans dl palê che va tl Brasil à la Zentrala di Consumadus Europeica metü adöm na picia brosciüra por i campionać dl monn dl palê tl Brasil 2014. Tla brosciüra, a desposiziun te 13 lingac, él danter ater da ciafè informaziuns sön i dërć plü importanć di consumadus europeics canch'ai é söl iade. Dötes les 13 verjiuns é da ciafè sön la plata internet dla ZCE dl Belgio.


Caje dl mëis

L'ann passè d'isté é na consumadëssa austriaca tratan che ara ê en vacanza sön la costa dl Mer Adratich inće jüda a cumprè ite guanć y ćialzà de moda taliana.
Mo indere, pornanch'ara é rovada a ćiasa s'àra intenü che n pêr de ćialzà ê da defet; porchël àra tut sö contat cun le comerziant talian y à fat fora ch'ara ti ess menè derevers i ćialzà y ël ti ess retü i scioldi.
Ara à aspetè n pez ch'al rovass adalerch i scioldi, mo deache chisc ne orô nia gnì ti à la Zentrala Consumadus Europeica Austria dè la inćiaria da ti jì do a chësc caje ala ZCE da Balsan.
Gnanca la colaboradëssa dla ZCE da Balsan ne n'à atira ciafè na resposta dala botëga taliana; ara ti é stada do ala cossa y belavisa... La botëga ne n'â nia respognü, deache tratan i mëisc da d'altonn-invern ne tëgnera nia davert, sciöche porater n gröm d'atres botëghes te chisc posć dlungia le mer.
Finalmënter d'aurì canche la sajun nöia à metü man ti él atira gnü retü düć i scioldi ala consumadëssa austriaca y implü pora s'inconfortè da podëi pié do n pêr de ćialzà bi nüs dl medemo model te chë botëga al mer. Puh spo ... él atira da fà le poch y pié ia!