Finanziell unterstützt durch
die Europäische Union
Europäisches Verbraucherzentrum Italien Büro Bozen

Verbrauchertelegramm Europa-Ausgabe messe/agost 2019

Beilage zur ladinischen Europa-Ausgabe Nr. 55/62 - Redaktion: Europäisches Verbraucherzentrum


IMPRESTÉ FORA N AUTO

I consëis dla Zentrala di Consumadus Europeica (ZCE)

Ëise impresté fora n auto por ostes vacanzes? Dailó desses dagnora mëte averda. Aladô dl'esperiënza dla Zentrala di Consumadus Europeica (ZCE) é le setur dl imprëst di auti n setur cun dër tröpes retlamaziuns.
Sovënz vëgn i contrac d'imprëst firmá digitalmënter sön n tablet, olache an ne vëiga nia döt le contrat. Te chisc caji fossel da controlé atira les e-mails, ajache an ciafa na copia dl contrat tres e-mail. Denache pié ia fossel ince ciamó n iade da controlé le contrat d'imprëst, ajache ara vá ciamó da fá mudaziuns.
Liede sön le sit web dla ZCE cai che é i 7 consëis por impresté fora n auto zënza messëi paié lassura.


CONTRAC A DESTANZA

Garanzia y cosć de spediziun: la sentënza dla CIUE

I consumadus che cumpra sovënz online conësc le problem: sce le produt se rump te dui agn dala cumpra y an ó fá avarëi la garanzia legala, mësson ti ortié zoruch la marcianzia al venditur por la reparaziun o la sostituziun. Mo che paia pa la spediziun? La Curt de Iustizia dl'Uniun Europeica á fat fora te süa sentënza dla plüra C-52/18, che la garanzia mëss ester dagnora debann, mo che tl caje de na cumpra a destanza ti pól gní damané al consumadú da antizipé les spëises de spediziun dl produt ala sënta dl venditur, y che chëstes gnará spo retüdes n iade che al é gnü ciafé sö le defet.
Chësc ne vel nia sce la spediziun é tan cera che i consumadus ne fejess te n te caje nia avarëi sü dërc, por ejëmpl sce le cost dla spediziun é massa alt o devënta massa compliché porvia dles dimenjiuns, dl pëis o dles carateristiches dl produt.


E-COMMERCE

Blocades geografiches tl comerz eletronich - La ZCE arjunj suzesc desvalis

Por les cumpres online sura i confins fora tl'UE é les descriminaziuns di consumadus aladô de süa residënza o zitadinanza proibides. Tla pratica vëgnel gonot ciamó a se le dé caji de geoblocking. La ZCE Talia é le punt de contat nazional ofizial por dötes les chestiuns che reverda les blocades geografiches y s'á dé jö dan da püch cun caji desvalis de chësta sort. N consumadú dla Lituania por ejëmpl â ciafé n'oferta interessanta de na botëga online taliana. Canche al orô scrí fora le formular cun sü dac por comané le produt, n'êl nia bun da mëte ite so numer de telefon lituan: le sistem se damanâ n numer talian. Le consumadú é jü dala Zentrala di Consumadus Europeica (ZCE) ajache le regolamënt proibësc da limité o impedí l'azes ales ofertes online cun mesi tecnics. Do l'intervënt dla ZCE á l'e-shop fat a na moda che ara jiss da comané ince zënza dé dant n numer de telefon talian.
Liede sön le sit dla ZCE ciüns che é i caji olache an á ciafé na soluziun.


CAJE DL MËIS

Na consumadëssa dl Luxemburg â bele de novëmber dl ann passé aposté n jore por le Cairo cun na compagnia de fligri taliana por merz dl 2019. Le jore ess messü gní fat cun n Boeing 737 Max. Do che dui fligri de chësta sort ê tomá jö, bonamënter porvia de n defet dl software, él de merz gnü pribí da joré cun chisc fligri tl’Europa y de conseguënza é ince le jore dla consumadëssa gnü cancelé. La compagnia de fligri taliana n'é nia stada bona da ciafé n jore alternatif por la consumadëssa é á ma retü i scioldi dl jore. La consumadëssa s'á organisé da sora, ara é jüda cun le bus a Frankfurt y da dailó éra jorada al Cairo cun n'atra compagnia de fligri. Chësc jore aposté al ultimo minut ê sambëgn plü cer co chël aposté dî danfora. La ZCE é te chësc caje stada bona da medié danter la consumadëssa dl Luxemburg y la compagnia taliana, che á azeté da rete i cosć implü por le iade de feter 300 euro.