Finanziell unterstützt durch
die Europäische Union
Europäisches Verbraucherzentrum Italien Büro Bozen
JORI

Aposté na cherta dl fligher online: compagnia de jore o portal d'apostaziun?

Che che ó aposté n jore online pó le fá sides sön la plata web dla compagnia de jore che sön de plü portai d'apostaziun. La Zentrala Europeica di Consumadus (ZCE) Austria y l'Assoziaziun por la sconanza di consumadus austriaca “Verein für Konsumenteninformation” (VKI) á paridlé i prisc y ciafé fora che al é sovënz miú marcé da aposté diretamënter sön le sit dla compagnia de jore. L'inrescida fata tl'Austria á revardé i sic eDreams, Expedia, Fluege.de, GoToGate, Opodo, Travelgenio y Kiwi, chël ó dí sic conesciüs ince tla Talia: te 33 caji sön 43 fossel sté miú marcé da aposté diretamënter cun la compagnia de jore.
Implü mësson ince tigní cunt de d'atri faturs a pert le prisc. La ZCE Talia ciafa regolarmënter segnalaziuns de consumadus che á aposté n jore tres na plataforma y se lascia sö porvia dles spëises de gestiun tan altes, de retüdes parziales o nia gnüdes a se le dé y dles dificoltés da contaté le sorvisc por i cliënc de chisc portai. Por de plü informaziuns ciarede sön la plata internet dla ZCE: https://bit.ly/2XlxUS6.

IADI Y VACANZES

Sön le iade cun l'auto tl'UE: paié l'autostrada, s’arjigné tickets por jí te cité y proibiziuns de zircolaziun

Che che é tl laur da planifiché na vacanza cun l'auto dess s'informé danfora sön le cost dl'autostrada y les proibiziuns de zircolaziun cuntra l'incuinamënt dl paisc de destinaziun.
Te tröc paisc ne pón nia s'anuzé debann dles autostrades y an mëss paié denanco s’un anuzé o atira do che an s’un á anuzé, sciöche por ejëmpl tla Talia, tla Francia y tla Grecia. Te d'atri Paisc mësson cumpré na vignëta da taché sön le vider dant o tl format digital (por ej. tl'Austria, tla Republica Ceca y tla Bulgaria). Te d'atres cités europeiches él preodü le paiamënt de n ticket por jí te cité, por ejëmpl a Stoccolma y Göteborg, te tröpes cités dla Norvegia o te n valgügn raiuns a Londra ti dis da laur. Por combate l'incuinamënt dl’atmosfera á tröpes cités europeiches metü sö proibiziuns de zircolaziun.
De plü informaziuns é da ciafé chiló.

TELECOMUNICAZIUN

Cherdé sö y ortié sms te d’atri Paisc dl'UE costa sëgn demanco

Al é de bones noeles por i consumadus dl'UE: do l'aboliziun dles tarifes de roaming da pert dl'UE dl 2017 vëgnel apliché dai 15 de ma inant tarifes mascimales a dötes les telefonades y a düc i sms di cliënc privac devers de d'atri paisc dl'UE.
I consumadus che chërda sö te so paisc n ater paisc dl'UE paiará alplü 19 zentejims al minut (plü CVA) y alplü 6 zentejims por vigni SMS (plü CVA). Chësc vel sides por les telefonades da telefons fisc che da fonins.
Les normes nöies gnará aplicades ti 28 paisc dl'UE y tosc ince tla Norvegia, tl'Islanda y tl Liechtenstein.
De plü informaziuns é dan man sön le sit dla ZCE.

CAJE DL MËIS
Canche an s’imprësta fora n auto él döes fases zities: le momënt che an vá a tó l'auto, canche an mëss scrí sö sön le formular aposta düc i dagns che é bele, y canche an le condüj zoruch. Sovënz ne vëgn l'auto nia condüt zoruch canche al é zacai dailó, porchël vëgnel lascé jö l'auto y metü les tles dl auto tla cassëta aposta. Ci desson fá sce al vëgn adebité mëisc dedô na soma sön la cherta de credit por cezé dann? An mëss se lascé sö por scrit y ajunté sce ara vá na fotografia dl auto condüt zoruch zënza dagns.
Ince sce n consumadú dla Polonia â fat chësc, n'êl nia sté bun da se fá lascé avarëi che al n'â nia ël danejé l'auto che al s'â impresté fora. Por chësta rajun é le consumadú jü dala Zentrala di Consumadus Europeica Polonia che á spo ortié inant la pratica ala ZCE Talia. Le consumadú polach n'â nia ma fat fotografies da adoré sciöche proa, mo al â ince 28 gigabyte de video fat tratan le iade deperpo che al jô cun l'auto impresté. Cun chësc material éra jöda da desmostré che le dann n'ê nia gnü gaujé dal consumadú tratan che al jô cun l'auto. Le consumadú á ciafé zoruch i scioldi do che la ZCE é intergnüda.