Finanziell unterstützt durch
die Europäische Union
Europäisches Verbraucherzentrum Italien Büro Bozen
CONTRAC STLÜC JÖ A DESTANZA

Sentënza nöia sön le dërt de retrata sce an cumpra online madroc

De regola pón pro i contrac a destanza, pro chi che al toca ince i contrac online, se trá zoruch te 14 dis tl'UE. Le consumadú chir fora i produc aladô de na descriziun dl produt y de na fotografia, mo al dess ince avëi la poscibilité da controlé la marcianzia canche al la ciafa y odëi sce al é bëgn avisa ci che al orô. Porimpó prevëiga le legisladú europeich ince val’ ezeziuns. An n’á por ejëmpl degun dërt de retrata sce la marcianzia ne pó nia gní dada zoruch por rajuns d'igiena do che al é gnü tut demez le sigil.
La Curt de Iustizia dl'UE á sëgn tut la dezijiun che sce an cumpra online n madroz y tol demez la folia suraia pón tres ciamó se trá zoruch dal contrat. N madroz pó pö gní ciamó adoré ince sce al é bele gnü adoré n iade. An pó le lavé sciöche al alda y al é ince n marcé por madroc de secunda man. La Curt de Iustizia dl'UE sotrissëia indere che le consumadú é responsabl dl smendrimënt dl valur dla marcianzia che n’á nia da nen fá cun le ciafé fora les carateristiche dla marcianzia y sce ara funzionëia, ince sce al ne perd nia le dërt de retrata (https://bit.ly/2Ve7lNM).


IMPRESTÉ FORA AUTI

Mosöres dl'UE por tarifes tleres y trasparëntes

Do n apel dla Comisciun europeica y dl'autorité por la sconanza di consumadus europeica á cin de gran aziëndes che imprësta fora auti metü a desposiziun sües tarifes a na moda cotan plü trasparënta. Le prisc che ti vëgn mostré ai consumadus sön la plata web vá a öna cun le prisc final, y mëss contigní düc i cosć surapró, sciöche por ejëmpl i suplemënc por ciafers jogn o por ne dé nia zoruch l’auto olache al ê gnü impresté fora. Les prestaziuns plü importantes (sciöche por ejëmpl i chilometri inclusifs, la regolamentaziun da fossené, les condiziuns de storno y la cauziun) vëgn tl dagní descrites tles condiziuns d'adoranza a na moda tlera te düc i lingac nazionai. Implü mëssel gní dé informaziuns avisa sön i cosć y i detais de cosses implü opzionales y dantadöt sön assiguraziuns implü che smendrësc la partezipaziun personala tl caje de dagns. De plü informaziuns sön l'imprëst de auti é da ciafé tla brosciüra debann dla ZCE.


COMERZ ELETRONICH

Metede averda ai sic de Aliaz Cooperation

La rëi dles Zentrales di Consumadus Europeiches (ECC-Net) aconsiëia da mëte averda a ofertes dl'aziënda dla Letonia “Aliaz Cooperation”, che vënn online danterater pilores por tó jö y d'atri mësi y integradus alimentars. I consumadus lascia alsavëi che ai orô pordërt na proa debann o ma nen cumpré n poch da porvé fora, mo che ai é tomá zënza orëi te na tënora d'abonamënt y che ai á ciafé ciamó produc y fatures cun de gran somes da paié. La Rëi ECC aconsiëia da ne paié nia y da se lascé sö por scrit. I gnëis daidá pro la Zentrala di Consumadus Europeica sot info@euroconsumatori.org.


CAJE DL MEIS

Na consumadëssa taliana é jorada da Aunejia a Londra cun na compagnia de fligri britanica. Le cufer dé jö é gnü te chësc caje danejé dassënn. L'acordanza de Montreal che regolamentëia domandes de responsabilité canche an condüj inzai cufri, vëiga danfora che le passajier mëss ti ortié tl caje de cufri danejá te 7 dis do che al á ciafé le cufer, na reclamaziun scrita ala compagnia de fligri. La consumadëssa á contaté la compagnia de fligri le 7. de y ajunté ince na confermaziun de n venditur de cufri, olache al ê scrit che le cufer ne podô nia gní cuncé y che le valur comerzial dl cufer ê de 200 euro. La compagnia de fligri á refodé la reclamaziun ajache la domanda de refata n´ê nia rovada adalerch por tëmp y ora. Sön chësta á la consumadëssa contaté la ZCE Talia che á lauré fora le caje de reclamaziun en colaboraziun cun la ZCE Inghiltera. I colegs britanics á ortié inant la reclamaziun a n organism de apajamënt extraiudiziar y la compagnia ti á spo retü 200 euro ala consumadëssa tratan chësc prozedimënt debann.
De plü informaziuns sön üsc dërc sce osc cufer röia adalerch massa tert, vá mancia o vëgn danejé, sciöche ince sön ci scrí te n te caje ciafëise sön la plata internet dla ZCE: https://bit.ly/2TYPrx0.