Finanziell unterstützt durch
die Europäische Union
Europäisches Verbraucherzentrum Italien Büro Bozen

Verbrauchertelegramm Europa-Ausgabe merz 2019

Beilage zur ladinischen Europa-Ausgabe Nr. 23 - Redaktion: Europäisches Verbraucherzentrum


COMERZ ELETRONICH

Agenzia matrimoniala 2.0: Metede averda ales chat de chirida de partner che costa tröp

I portai internet por la chirida de partner ti vá danz do ai tëmps: ai pé bunmarcé, an ne mëss nia fá tröp y an resta anonims.
Ince sce la registraziun é naota debann, stlüj les anuzadësses y i anuzadus dl portal dedô impó ciamó gonot jö n abonamënt "premiun", sambëgn a paiamënt, che ti vëgn pité a dër de bogn prisc. Feter düc i contrac che vëgn pitá da portai de mediaziun de partner online s'arlungëia automaticamënter y sovënz a n prisc cotan plü alt. Les consumadësses y i consumadus n'é indere nia cosciënc de chësc y insciö ti tochera da paié cunc de 250 euro y passa.
De plü informaziuns sön chësc argomënt é da ciafé sön la plata internet dla Zentrala di Consumadus Europeica (ZCE).


IADI CUN LE FLIGHER

L'Autorité garanta por la concorënza y le marcé taliana (AGCM) straufëia Ryan Air y Wizz Air

L'Autorité garanta por la concorënza y le marcé (AGCM) á dan da püch stlüt jö dui prozedimënc cuntra les compagnies de fligri bunmarcé Ryanair und Wizz Air olache ara nen jô de sües desposiziuns por ci che reverda i prisc de trasport di gragn cufri da tó tla man (i trolley classics). L'autorité á constaté che ara se trata de pratiches comerziales nia coretes, deache le consumadú ne sá nia avisa cal che é veramënter le prisc final dla cherta de jore. Tla tarifa de basa n'él nia plü laite le trasport de n gran cufer da tó tla man che é pö na pert essenziala dl contrat de trasport. Belavisa é le prisc efetif feter dagnora plü alt co chël dé dant tl scomenciamënt dl prozes de prenotaziun y insciö él plü ri da confronté cun les tarifes de d'atres compagnies de jore che tol ite le cufer da tó tla man te so prisc de basa. De plü informaziuns sön chëstes dezijiuns é da ciafé sön la plata web dl'Autorité garanta por la concorënza y le marcé.


METEDE AVERDA AL'INGIANADA

Plataformes streaming nia serioses che pîta films “debann”

Tres indô él consumadësses y consumadus che nes segnalëia da ti avëi ciaré a n film debann sön internet y tosc dedô ái ciafé da paié ordins de paiamënt de presciapüch 350 euro por n abonamënt anual. Cun gran probabilité laora i pitadus de chisc sorvisc de streaming cun landing pages: sce an clichëia sön le link che an á abiné tres le motor d'inrescida röion sön na plata arjignada ca aposta por fá tomé tla tënora les porsones interessades. Insciö vára ince da splighé le fat che degügn ne se recorda che al sides sté tl momënt dla registraziun n referimënt ai cosć o al fat che ara se trata de n abonamënt de proa de 5 dis, ince sce chëstes informaziuns é danz da ciafé sön le sit ofizial dl prestadú dl sorvisc. Cun gran probabilité ê la plata sön chëra che i consumadus é rová dër anfat a chëra dl sit ofizial, mo sambëgn zënza les informaziuns por ci che reverda i cosć che é d'importanza fonamentala por les consumadësses y i consumadus! Nosc consëi: ne stede a paié, mo tolede öna de nostes lëtres model da ti respogne ai ordins de paiamënt.


CAJE DL MEIS

Rosa mëss afronté de plü spëises personales nia preodüdes. Tres i social media röiera sön de plü reclams de produc cun slogans sciöche “Nos ne ti dijun de no a degügn”. Spo lí Rosa sön na plata internet che al ti vëgn conzedü credic ince a chës porsones, sciöche ëra, che n'á nia na gran afidabilité de credit: spana di fic 2%, rata al mëis sot ai 200 euro, degun control dl'afidabilité dl credit. Rosa é contënta da avëi tla finada ciafé n finanziadú y ó informaziuns plü avisa.
Al resualtëia che la porsona che ara á contaté é n intermediar che mët en contat la consumadëssa cun na porsona privata dal inom Carla, na zitadina franzeja, che dess, sciöche al pé, stlüje jö cun Rosa le credit. Carla inviëia Rosa tres Whatsapp da stlüje jö le contrat de credit y insciö ti mëna Rosa, indô tres Whatsapp, na copia de süa cherta d'identité y dles bolëtes dl telefon y dl'eletrizité. Implü vëgn Rosa baiada sö da trasferí te trëi iadi passa 1.500 euro por spëises de gestiun dl credit sön le cunt bancar todësch de Carla. Deache Rosa ne ciafa nia la soma impormetüda tl tëmp fat fora y deache ara scomëncia bel plan da dubité dla crëta dl finanziadú contatëiera la Zentrala di Consumadus Europeica (ZCE) Talia. Les consulëntes s'intënn tosc che ara se trata de na ingianada. Sön süa plata internet spliga la ZCE sciöche an fej da reconësce de te trapolades.