Finanziell unterstützt durch
die Europäische Union
Europäisches Verbraucherzentrum Italien Büro Bozen

Verbrauchertelegramm Europa-Ausgabe forá 2019

Beilage zur ladinischen Europa-Ausgabe Nr. 14 - Redaktion: Europäisches Verbraucherzentrum

VACANZES SÖN LA NËI FORADECÁ

L'elisocurs costa tan co la vacanza intiera...

Canche an é sön le iade t’Europa él dagnora bun da se tó para la Tessera Europeica d’Assiguraziun y Maratia (TEAM) che nes dá le dërt da ciafé les cures che vá debojëgn tratan che an é foradecá, avisa sciöche les zitadines y i zitadins dl Stat olache an é. Mo ma la TEAM podess n'ester nia assá! Nia düc ne sá che por ejëmpl tl'Austria risćion, sce an ess la desfortüna da avëi n inzidënt sön la pista da schi, da messëi paié instësc ince val' milesc de euro por l’elicoter de socurs.
Le ZCE aconsiëia porchël da controlé denanco pié ia sce an é assigurá sciöche al alda, por ejëmpl sce an á na poliza coliada ala cherta de credit o ala cuota da soze de n'organisaziun de socurs, sportiva o dl tëmp lëde. Te n valgügn raiuns di schi pón ince cumpré cun le schipass n'assiguraziun aposta.
Por de plü informaziuns ciarede do sön la plata dla Zentrala di Consumadus Europeica Talia.


E-COMMERCE

Safer Internet Day 2019

Chësc ann é le Safer Internet Day sté ai 5 de forá y so moto é sté "Deboriada por n miú internet". L'obietif ê da incorajé düc i utënc de internet – dantadöt che che adora i social media - da tó pert al movimënt global desmostran respet ti confrunc di atri y segnalan contignüs nia adatá o ilegai.
Ince la ZCE ciara tres da fá a na moda che internet sides plü sigü por ejëmpl informan, tres so sit, sön les ingianades y trapolades online. Dal sit dla ZCE vára ince da desćiarié debann na brosciüra cun informaziuns sön l'e-commerce.


IADI

Al é danman la verjiun nöia dla ECC-Net: Travel App

Tres la “ECC-Net: Travel App” ti fornësc la Rëi dles Zentrales di Consumadus Europeiches (ECC-Net) ai consumadus informaziuns iuridiches, consëis pratics y n aiüt linguistich sot forma de na lista de frases d'öga por les situaziuns tipiches de canche an é sön le iade, te na sora aplicaziun. L'app é gnüda ajornada dan da püch, sides por ci che reverda i contignüs che por i aspec tecnics. L'app é desponibla te düc i 30 Paîsc dla Rëi, chël ó dí te düc i stac dl'UE, Norvegia y Islanda. L'app funzionëia ince offline, ara é desponibla te 25 lingac y pó gní desćiariada debann dal Apple App Store (por iOS) y dal Google Play Store (por Android).


CAJE DL MËIS
N consumadú talian n'á nia podü senté ite sön fligher ajache la compagnia di fligri britanica ne á nia azeté süa cherta d'identité te aeroport. Le consumadú á porchël messü aposté n ater jore olache al n’á spo albü plü degügn problems. Le consumadú é jü dala ZCE Talia por damané do la retüda dl cost dl secundo jore. La ZCE Talia á contaté la ZCE Gran Bretagna che á contaté la compagnia de fligri. La compagnia de fligri á splighé che le consumadú â mostré sö na cherta d'identité de papier cun la fotografia destacada. Ajache al n'ê nia tröp tëmp n'êra nia jüda da stlarí atira sce la cherta d'identité valess te chës condiziuns. Le consumadú á podü tó le secundo jore ajache ara ê intratan jüda da ciafé na confermaziun dala polizia taliana. La compagnia di fligri n'á nia azeté da rete le cost dl secundo jore ajache le documënt d'identité n'ê nia sciöche al ess aldí da ester.
La ZCE Talia aconsiëia da ciaré che i documënc d'identité vais bun denanco pié ia por schivé de te situaziuns! Ciarede do ince sön le sit dla Farnesina viaggiaresicuri.it. Chiló ciafëise tröpes informaziuns d'öga, danterater ince sön la documentaziun che vá debojëgn por jí tl Paîsc de destinaziun.