Finanziell unterstützt durch
die Europäische Union
Europäisches Verbraucherzentrum Italien Büro Bozen
GEOBLOCKING

I punc debli de n Regolamënt dl'UE important

Le Regolamënt dl'UE 2018/302 sön le geoblocking ti proibësc ai fornidus de bëgns y sorvisc online da stlüje fora certi consumadus da sües ofertes porvia de so post de residënza o de süa zitadinanza, da i adressé automaticamënter a plates online destinades a so Paisc (rerouting) o da odëi danfora plü de stletes condiziuns contratuales nia da iustifiché. Cina chiló döt apost.
Porimpó él tres ciamó n valgügn aspec problematics olache le regolamënt ne brancia nia. Comerzianc pó tres ciamó tó la dezijiun da consegné süa marcianzia ma te n valgügn Paisc y á ma le dovëi da ti dé la poscibilité ala clientela da gní a se tó le patüc o da se organisé instëssa la consegnaziun. Al vëgn conzedü inant da odëi danfora prisc de consegnaziun desvalis aladô dl Paisc de destinaziun y ince por i sorvisc de streaming vëgnel limité n anuzamënt sura i confins fora, deache te chësc setur vëgnel apliché les regoles liades ai dërc d'autur.
Sön la plata internet dla Zentrala di Consumadus Europeica (ZCE) él da ciafé n valgügn ejëmpli sön i punc debli dl Regolamënt.


E-COMMERCE

Scincundes da Nadé online - co y can reclamé?

Ince en chësc Nadé él sté cotan de porsones che á ciafé na scincunda cumprada ite online. Sce la scincunda n'á nia plajü él oramai bele tert por eserzité le dërt de retrata deache le termin é de 14 dis calendars dala data de consegnaziun. Mo sce la scincunda á n defet vára tres ciamó da reclamé por scrit pro le comerziant. Le termin por segnalé n defet tl cheder dla garanzia é de dui mëisc da canche an é gnüs sura che le produt á n fal. De plü informaziuns sön i dërc che an á sce an cumpra ite online é da ciafé tla brosciüra che an pó dećiarié debann dala plata internet dla ZCE.


IADI

Üsc dërc ne vá nia en vacanza

Tratan i dis da Nadé s'á tröpes porsones metü sön le iade por podëi passé n valgügn dis cun chi de familia, mo nia dagnora n'é döt jü sciöche al ess messü. Ma bun che, por mirit di dërc di passajiers preodüs tl'UE, án dërc canche an fej iadi tl'Europa.
Bel anfat sce an é sön le iade cun na compagnia de jore bunmarcé o cun öna tradizionala: i dërc di passajiers vëiga danfora che les compagnies de fligri mëss paié na compensaziun tl caje de overbooking, de anulamënt o de n intardiamënt dl jore de plü co trëi ores, sce l'anulamënt o l'intardiada dl jore ess podü gní schivá. Al vëgn ince preodü rembursamënc tl caje de intardiades sce an fej iadi cun le bus o la ferata. De plü informaziuns sön i dërc de che che fej iadi tl'UE é a desposiziun sön la plata internet dla ZCE. Dailó él ince da ciafé les lëtres d'ejëmpl che pó gní desćiariades debann por fá avarëi sü dërc.


CAJE DL MËIS
Le car sharing é dër comot canche an mëss jí ma en toch te de gran cités. Por l'ativé mësson se registré sön n sit de car sharing, desćiarié la app, mëte le smartphone dlungia l'auto chirí fora y insciö mëtel bele man le tëmp d'imprëst cört. Sambëgn mëss la consumadëssa/le consumadú, sciöche pro vigni contrat de locaziun, ince te chësc caje controlé les condiziuns dl auto y dé dant dagns che é bele mo n'é nia ciamó gnüs anotá, denanche la dorada dl imprëst mëtes man.
N consumadú talian ne n'â indere nia fat döt chësc canche al s'â anuzé de n car sharing a Hamburg. N valgönes edemes dedô á le consumadú ciafé tres e-mail na fatura de 300,00 euro por n dann fat al auto. Ince sce le consumadú ê sigü che le dann ê bele, n'él nia sté bun da ciafé na soluziun al problem. Al á spo damané do aiüt pro la Zentrala di Consumadus Europeica (ZCE) Talia, che á ortié inant la pratica ala ZCE Germania. La ZCE Germania á contaté la firma che á ciamó n iade ejaminé la pratica y á spo dé pro che le dann ê bele denanche le consumadú s'imprestass l'auto. Sön na tara é l'ordin de paiamënt gnü anulé.