Finanziell unterstützt durch
die Europäische Union
Europäisches Verbraucherzentrum Italien Büro Bozen
CUMPRES ONLINE

Che respogn pa sce la marcianzia ne vëgn nia dada jö o sce ara röia adalerch danejada?

Por respogne a chësta domanda mësson naota desfarenzié danter la cumpra da n'aziënda y la cumpra da n privat. Le consumadú vëgn sconé damí sce al cumpra da n profescionist: le prigo por la pordüda o le danejamënt dla marcianzia vëgn ma trasferí al consumadú canche le consumadú o n'atra porsona nominada da d'ël ciafa la marcianzia. Cina a chël momënt respogn le profescionist dla pordüda y dl danejamënt dla marcianzia. Por de plü informaziuns sön l'argomënt liede l'articul sön le sit dla ZCE.


JÍ CUN LE FLIGHER

Al se röia n isté plëgn de sciopers

Les porsones che é jüdes en vacanza chësc isté cun le fligher ne s'á nia fat saurí: cënc de jori é gnüs straicá porvia di sciopers dl personal. Te chisc caji prevëiga le Regolamënt dl'UE, n. 261/2004 sön i dërc di passajiers di fligri che ales porsones che fej n iade ti mëssel gní dé la poscibilité da chirí fora danter le rembursamënt de döt le cost dla cherta y la poscibilité da joré debann cun n ater fligher. Implü mëss la compagnia de fligri ti pité ai passajiers che á azeté da joré cun n ater fligher i sorvisc de assistënza – dantadöt le mangé, le bëre y le dormí, aladô de tan dî che ai mëss aspeté. Ala fin á i passajiers le dërt da ciafé na compensaziun de 250, 400 o 600 euro aladô dla lunghëza dla trassa, sce al n'é nia gnü lascé alsavëi por tëmp y ora che le jore gnô straiché, ater co sce chësc sozed porvia de na zircostanza ezezionala. Na sentënza da dan da püch dla Curt de Iustizia dl'UE á fat fora che n scioper che depënn dala situaziun interna dla compagnia (tl caje ejaminé se tratâl de n scioper salvare) n'é nia na zircostanza ezezionala. Porchël pó ince i passajiers vitimes de n scioper dl personal ciaré da damané do la compensaziun. Chësc é le link ala lëtra d'ejëmpl arjignada ca dala ZCE.


PHISHING

Metëde averda ales e-mails che ingiana

Les ultimes edemes s'él gnü segnalé de plü tentatifs de „phishing“ (= password fishing): I consumadus á ciafé n'e-mail da na banca cun l'avis che l'INPS ess porvé da fá n gran rembursamënt, mo le trasferimënt ne foss nia jü a bun fin, ajache i dac anagrafics o les coordinades bancares n'ê nia dërtes. I destinatars dl'e-mail dess ajorné sü dac tres n link tl'e-mail. Sambëgn ne damana n ënt o na banca mai chëstes informaziuns tres e-mail! Porchël desson dagnora mëte averda, ne dé io nia inant dac sensibli tres sic web lincá o tres e-mail, por schivé che le cunt corënt vëgnes plinderné da jënt che an ne conësc nia, y ne cliché io nia sön link che podess ince mëte a jí le download de virus, trojan o spyware, che controlëia adascusc ci che vëgn fat sön le computer.


CAJE DL MËIS
N consumadú talian â ortié so smartphone da defet a n venditur todësch por le fá cuncé. Deperpo che la spediziun ti Paisc Todësc á funzioné zënza problems, él sté problems da ortié zoruch le fonin cuncé: le consumadú n'á mai ciafé so fonin. Al é jü dala sozieté todëscia che á contaté le curier damanan da inrescí sön ci fin che le poch ess fat. Ajache le consumadú n'â dî nia plü ciafé informaziuns sön olache le fonin foss y n'â nia ciafé n rembursamënt dal'aziënda todëscia, él jü dala Zentrala di Consumadus Europeica (ZCE) Talia che á damané l'intervënt di colegs dla ZCE Paisc Todësc. Y avisa: do val' mëisc de gran presciun da pert di colegs todësc ti á la sozieté ortié al consumadú n rembursamënt de 200 euro.