Finanziell unterstützt durch
die Europäische Union
Europäisches Verbraucherzentrum Italien Büro Bozen

Verbrauchertelegramm Europa-Ausgabe Merz 2018

Beilage zur ladinischen Europa-Ausgabe Nr. 23 - Redaktion: Europäisches Verbraucherzentrum


Invit al convëgn: Le prozedimënt europeich por les pices stritaries
Mëte a jí n'aziun iudiziara por fá avarëi i dërc ti confrunc de na porsona o de na sozieté che é te n ater paisc europeich, podess ciaré fora sciöche val’ de cotan de ri, mo insciö ne n’éra nia por mirit dl prozedimënt europeich por les pices stritaries. Ara se trata de na prozedöra iudiziara, alternativa a chëres ordinares te vigni stat mëmber, metüda sö dl 2009 dal'UE por alisiré l'azes di zitadins europeics ala iustizia y i daidé pro les stritaries sura i confins fora. En colaboraziun cun la Regiun Autonoma Trentin-Südtirol y l'Université di Stüdi de Trënt, organisëia la Zentrala di consumadus europeica n convëgn, che sará en vëndres, ai 9 de merz dl 2018, pian ia dales 9.00 tl salf 1 dl palaz de iurisprudënza tla strada Rosmini n. 27 a Trënt, por alzé le livel de conescënza y d'adoranza de chësc stromënt d'öga. I inviun dötes les porsones che se lí a tó pert al convëgn (iscriziun online).

Après-ski.. .t'ospedal

Che che é tl laur da jí foradecá por n'edema de vacanza, dess se damané sce al é assiguré sciöche al alda sce al ess da avëi n inzidënt sön pista. Sce l'elicoter mëss gní a tó zacai póra gní bindebó cera - ince n valgügn milesc de euro! L'adoranza dla TEAM (Tessera Europeica d'Assiguraziun Maratia) nes dá sce le dërt da ciafé les cures che vá debojëgn tratan che an é foradecá, mo ales medemes condiziuns di zitadins dl stat olache an é (y nia ales condiziuns varëntes tl paisc de residënza). Tl'Austria por ejëmpl ret la sanité publica por le socurs cun l'elicoter do n inzidënt tl tëmp lëde ma na soma forfetaria de 850,00 euro, y ma sce an s'á fat cotan me. Che che é tl laur da pié ia por na vacanza sön la nëi te n paisc dl'UE, tla Norvegia, tl’Islanda o tla Svizera, dess se damané sce al é assiguré sciöche al alda sce al ess da avëi n inzidënt sön pista. Le consëi dla ZCE é porchël da controlé, dan la partënza, sce an é bele assigurá, por ejëmpl tres na poliza coliada ala cherta de credit o ala cuota da soze de n'organisaziun de socurs, sportiva o dl tëmp lëde. Te n valgügn raiuns di schi pón ince cumpré cun le skipass n'assiguraziun aposta. Por de plü informaziuns pón contaté la Zentrala di consumadus europeica de Balsan ala misciun info@euroconsumatori.org o al numer 0471-980939.

Denanco pié ia
Denanco jí te n ater paisc, recordesse da ti ciaré al sit internet dla Farnesina www.viaggiaresicuri.it. I ciafëis n stlafun de informaziuns d'öga, sciöche por ejëmpl i documënc che vá debojëgn por rodé incërch, les misciuns de ambasciades y consolac y consëis d’öga.

Western Union ret i scioldi ales porsones trapolades
Da agn dij la Zentrala di consumadus europeica (ZCE) Talia da mëte averda ales trapolades che reverda i stromënc de trasferimënt de scioldi contanc. Ara se trata de sorvisc nia adatá por ortié scioldi a porsones che an ne conësc nia, ajache an ne pó nia anulé l'operaziun, y dantadöt ajache ara ne vá nia da ciafé sö che che é jüs efetivamënter a tó i contanc. Danter i caji gestis dala ZCE êl por ejëmpl le caje de Giovanni, che â incunté te internet Maria, süa anima jomelina. Ma che Maria ê tl'Africa y Giovanni ess messü daidé Maria finanzié le iade tla Talia. Giovanni á ortié de plü iadi scioldi, paian passa 10.000. euro, cina che la ZCE é stada bona da le baié sö che chisc paiamënc n'â nia da nen fá cun l'amur, y che al ê ma na trapolada.
Western Union é un di majeri sorvisc de trasferimënt de scioldi contanc y rembursa sëgn i scioldi a che che é gnüs trapolá dal 1° de jená dl 2004 ai 19 de jená dl 2017. Por chësc fin mëss i consumadus scrí fora n formular online cina alplü tert ai 31 de ma dl 2018 injuntan na copia de döta la documentaziun y don dant vigni operaziun. De plü informaziuns é da ciafé sön nosta plata internet.