Finanziell unterstützt durch
die Europäische Union
Europäisches Verbraucherzentrum Italien Büro Bozen

Verbrauchertelegramm Europa-Ausgabe Merz 2017

Beilage zur ladinischen Europa-Ausgabe Nr. 23 - Redaktion: Europäisches Verbraucherzentrum


AGENZIES MATRIMONIALES

Chirí l'amur tl tëmp dl internet
Al é püch da dí: la digitalisaziun dla sozieté á ince mudé i posć y les formes da imparé a se conësce. Sovënz n'un vára nia plü de odlades impiziëntes o de parores plajores dites daplan, mo de pseudonims y frases batüdes che vëgn scrites te chats de plates internet d'incuntades online. Ti agn passá, canche al ê problems cun les agenzies matrimoniales, spo se tratâra dantadöt de propostes de partner nia fates ti tëmps fac fora o de propostes che ne ti corespognô nia al profil dl partner ideal dé dant. Sce chisc caji é jüs tan dassënn zoruch spo él zënzater ince por mirit dl'ativité d'informaziun che les consulëntes dla Zentrala di Consumadus Europeica á fat ti ultimi agn. Tl medemo tëmp á les consumadësses y i consumadus ince mudé ti agn „sort“ de agenzia matrimoniala: tres plü gonot s'adressëia porsones che chir l'amur de süa vita ales plates d'incuntades online che é anonimes y miú marcé. Mo ince dailó él da mëte averda. De plü informaziuns sön chësc argomënt él da ciafé sön sön nosta plata internet .


AUTO

Mëssi paié la straufunga?
Les consumadësses y i consumadus che s'adressëia ala Zentrala di Consumadus Europeica (ZCE) porvia de na straufunga da foradecá á ciafé sanziuns desvalies: straufunghes sön strada dal'Austria, dala Germania o dala Francia, violaziuns di limic de velozité, mo ince sciöche al pé, dac dl'autostrada nia paiá dal'Ungaria. Danfora él da dí che vigni straufunga aministrativa iustificada á da gní paiada, belanfat sce ara se trata de na multa taliana o foresta. Mo ci che les consumadësses y i consumadus ó savëi é co che ara é cun l'esecutivité dla straufunga tla Talia. Sciöche bele lascé alsavëi dala ZCE á la Talia rezepí de merz dl 2016 la dezijiun cheder dl Consëi dl'Uniun Europeica (2005/214/GAI) sön l'aplicaziun dl prinzip de reconescimënt reziproch de multes y straufunghes de scioldi ti stac che fej pert dl'Uniun Europeica. Ci che chësc ó concretamënter dí podëise lí sön nosta plata internet.


COMERZ ELETRONICH

Trapolades tres e-mail!
Al momënt se lascel adintëne tres plü cliëntes y cliënc che á ciafé e-mail manacioses da n navigadú online. Le mitënt dess ester "Content Solution GmbH", mo al pé che l'inom dl'aziënda se müdes tres indô. Atocá da chëstes e-mail é les porsones che s'á registré sön la plata internet www.maps-routenplaner.online. De plü informaziuns é da ciafé sön la plata internet de nüsc colegs dl'Austria.


Caje dl mëis
Deache l'isté n'é nia plü dër da lunc mëton bele man da se fá pinsiers sön co ester en forma por le bichini. Na consumadëssa á tut pert a na cura da tó jö de n'aziënda todëscia che fajô reclam cun le slogan “I te fajun gní sexy!” (“Wir machen Dich sexy!”). Ara á fat n abonamënt anual cun na cuota da paié vigni mëis y n renovamënt automatich ala fin dl ann. Ince sce la consumadëssa s'â tigní avisa a düc i consëis sportifs y alimentars ne n'ára nia arjunt le resultat dejidré. Insciö ti ára mené al'aziënda na lëtra de desdita dl abonamënt por schivé che l'abonamënt se renovass automaticamënter indô por n ann. L'aziënda indere ti á trat jö inant la cuota al mëis da süa cherta de credit y ti á renové l'abonamënt ciamó por n ann! Deache la consumadëssa ne n'é nia stada bona da stlarí la situaziun cun l'aziënda ára damané do l'aiüt dla Zentrala di Consumadus Europeica (ZCE) da Balsan che ti á mené inant le caje ala ZCE Germania. Le resultat dles tratatives é sté n compromis: la desdita dl abonamënt é gnüda azetada te na manira definitiva, mo deache la consumadëssa á ciafé consëis dietetics ince do che ara â desdit l'abonamënt ne n'á l'aziënda nia orü nen savëi da ti rete ince les cuotes al mëis che ti é gnüdes trates jö cina te chël momënt.