Finanziell unterstützt durch
die Europäische Union
Europäisches Verbraucherzentrum Italien Büro Bozen

Verbrauchertelegramm Europa-Ausgabe Novëmber 2016

Beilage zur ladinischen Europa-Ausgabe Nr. 77 - Redaktion: Europäisches Verbraucherzentrum


VACANZES Y IADI

Jore straiché o intardié: ci dërc ái pa?
Ajache al é tres de plü ënc che ti impormët ai consumadus tröc scioldi sciöche refata por jori straicá o intardiá, ó la ZCE Talia – ofize de Balsan stlarí n valgönes cosses. De plü informaziuns é da ciafé sön nosta homepage.


AUTI

Importaziun d’auti: les trëi domandes che vëgn fates plü sovënz
I auti á zënzater na gran importanza te nosta sozieté. Sovënz ti ciara tröc consumadus denanco cumpré n auto, sides nü co de secunda man, ince al marcé ester. Por dötes les domandes che reverda la cumpra de n auto foradecá é la Zentrala di Consumadus Europeica (ZCE) n punt de referimënt.
Danter merz y otober dl 2016 s’á la ZCE – ofize de Balsan cruzié de passa 70 domandes d’informaziuns sön l'esportaziun y importaziun de auti da y cuntra la Talia. Les domandes che ti é gnüdes fates ala Zentrala pó gní trates adöm te na top 3 che i ciafëis sön nosta homepage.


BREXIT

Tapes dl Rëgn Uní por s’un jí dal'UE
Al é le pröm iade che un di 28 stac mëmbri ó s’un jí dal'Uniun Europeica.
Domanda da s’un jí, negoziaziun, aprovaziun: al jará debojëgn de n valgügn agn. Le resultat dl referendum ne basta nia por s’un jí iuridicamënter dal'Ue. Por podëi s’un jí dal'Ue mëss le Parlamënt britanich aprové chësta dezijiun. N iade che i parlamentars britanics á azeté l'arbandon, gnarál apliché l'art. 40 dl Tratat de Lisbona, che regolamentëia l'arbandon de n paisc dal'Ue. Porchël mët man le termin de dui agn canche le Rëgn Uni ti lascia alsavëi al Consëi dl'Uniun europeica che al ó s’un jí dal'Uniun. Tratan chësc tëmp messarán sciacaré fora i detais dl arbandon y i raporc tl dagní cun i 27 stac mëmbri y stlü jö l'acordanza che alda lapró.
I ciafëis de plü informaziuns sön le sit de nüsc colegs dla ZCE Germania (por todësch).


Caje dl mëis
I signurs P. dl Belgio â aposté sciöche dagnora n’edema de vacanza tl Südtirol. N iade che ai ê rová te hotel, stanc y da na dërta fan dal iade, âi debota metü i cufri te ciamena y ê atira jüs tl salf tl’alzada a tera dl hotel a cëna. Canche ai ê indô jüs te ciamena âi ciafé na burta sorpresa: i lotri ê jüs te ciamena y ti â tut düc i ogec de valur che ai â te ciamena, chël ó dí l’ora y le tacuin de marca, la belijia, la tle dl auto y düc i documënc. Ai ê atira jüs ala reception por denunzié ci che al ê sozedü, mo le hotelier n’â nia orü surantó la responsabilité. N iade che ai ê indô rová a ciasa do che ai â denunzié che al ti ê gnü arobé le patüc, é le per P. jü dala Zentrala di Consumadus Europeica dl Belgio che ti á damané ala ZCE Talia da se cruzié. Ince sce le Codesc Zivil vëiga danfora che i hoteliers á la responsabilité de vigni deterioramënt, destrüta o sotraziun dl patüc porté adalerch dal cliënt te hotel (cina cënt iadi le prisc de locaziun dl cuartier al de), n’orô le hotelier nia i rembursé. Spo á le per P. metü a jí, cun l'aiüt dles döes Zentrales di Consumadus Europeiches, na small claim, chël ó dí le Prozedimënt dl'UE por i stritoc da na picia soma y á insciö ciafé zoruch 2.000 euro. Por nen savëi deplü sön: la small claim.