Finanziell unterstützt durch
die Europäische Union
Europäisches Verbraucherzentrum Italien Büro Bozen

Telegram otober – Spezial comerz eletronich


Otober dl 2015: la ZCE de Balsan se conzentrëia sön le comerz eletronich
Por la Zentrala di Consumadus Europeica (ZCE) de Balsan é l'informaziun l'unica dërta erma di consumadus en materia de comerz eletronich, sides nazional che sura i confins fora,. Por alzé le numer de consumadus informá se conzentrëia la ZCE de Balsan tl mëis d’otober sön le comerz eletronich y publichëia comunicac stampa y na newsletter ma sön chësc argomënt. Implü ti á döes espertes dla ZCE splighé, tl cheder de n proiet organisé dal KVW de Balsan, a n valgügn seniors i dërc de che che cumpra tla rëi, les problematiches y les trapolades che vëgn dant plü sovënz y dantadöt co les tigní fora. Düc che che ó nen savëi deplü sön i consumadus & le comerz eletronich pó consulté a plata internet dla ZCE de Balsan.


"Chargeback" o co ciafé impó ciamó zoruch i scioldi
I ëis odü sön n portal de venüda todësch na roda da munt che ves plej dër, i la comanëis atira y i paiëis cun la cherta de credit. Mo che che s’l’á venüda ves lascia alsavëi do che i l’ëis paiada che la roda n’é nia plü desponibla y ves impormët da mëisc da ves rete i scioldi. Te chisc caji messëise assolutamënter valuté la poscibilité de n "chargeback". La condiziun dl chargeback é a vigni moda le paiamënt dl patüc o dl sorvisc tres cherta de credit. Dal momënt che tres de plü consumadus cumpra sön internet cun cherta de credit, á la Rëi dles Zentrales di Consumadus Europeiches (ZCE-Net) fat dl 2014 n'inrescida sön le chargeback ti singui stac dl'Uniun Europeica. I resultac de chësta inrescida é gnüs publicá por inglesc sön le sit de nüsc colegs dla ZCE dla Norvegia.


Cumpres online defora dal'UE – velel i medemi dërc?
Ëise cumpré online cialzá sön n portal de venüda svizer y i s’ëis intenü che le corú é daldöt atramënter dal vi de sciöche al pê sön les fotografies, o i cialzá ne se plej propi nia plü y i orëis fá avarëi osc dërt da se trá zoruch. Mo vára pa?
Cun la jüda en forza de jügn dl 2014 dla diretiva europeica nöia sön i dërc di consumadus (diretiva 2011/83/EU), é i dërc di consumadus dl'Uniun Europeica (cun lapró l’Islanda y la Norvegia) gnüs renforzá dassënn. La diretiva nöia á ince unifiché a livel europeich le termin por le dërt de se trá zoruch ti contrac stlüc jö a destanza, chël ó dí ince sce an cumpra online: ara se trata de 14 dis de calënder te düc i stac dl'UE (cina sëgn êl tla Talia 10 dis de laur). An mëss tigní cunt che chisc dërc vel ma por les cumpres tl'UE. De plü informaziuns sön la cumpra de patüc tl'UE vëgn dades dala ZCE de Balsan tres: tel. 0471-980939 – e-mail info@euroconsumatori.org.


Caje dl mëis
D’aurí dl 2015 á n consumadú talian comané n baghele sön na plata internet spagnola. Aladô dla descriziun por talian dl produt dêl toché lapró ince n ü por le trasport dl möt. N iade che le consumadú á ciafé le poch ál messü constaté che l'ü n’ê nia rové, porchël ál contaté l'aziënda spagnola. Chësta ti á lascé alsavëi che al ê gnü fat n fal tla descriziun dl produt por talian: ara ne dê nia contigní, sciöche la descriziun por spagnol, l'ü y á pité da ti rete 20 euro.
Le consumadú n’é nia sté a öna cun chësta soma ajache l'ü costa 100 euro y é jü dala ZCE de Balsan. I colegs dla ZCE Spagna, che á ciafé la pratica, á albü suzes: l'aziënda ti á retü al consumadú 100 euro por l'ü che al n’â nia ciafé!