Finanziell unterstützt durch
die Europäische Union
Europäisches Verbraucherzentrum Italien Büro Bozen

Verbrauchertelegramm Europa-Ausgabe Novëmber 2015

Beilage zur ladinischen Europa-Ausgabe Nr. 77 - Redaktion: Europäisches Verbraucherzentrum


COMERZ ELETRONICH

„WhatsApp Gold“: L'abonamënt é na trapolada

WhatsApp é un di sorvisc de messaje plü conesciüs y adorá. Chësta popolarité le fej deventé interessant sambëgn ince por trapoluns. Tröpes porsones che adora WhatsApp ciafa porchël ultimamënter n messaje olache al ti vëgn pité n pachet nü cun n gröm de funziuns suplementares interessantes: WhatsApp Gold. Mo metede averda: WhatsApp Gold n'esist nia! Por ciafé le pachet messess i utënc ti mené inant l'informaziun tres WhatsApp a diesc amisc. Pornanche ai á fat chësc ti vëgnel comané da destaché la conesciun wi-fi, sce ai é conliá cun chësta. Chësta oferta porta les consumadësses y i consumadus a dé dant so numer de fonin y chël de diesc d'atres porsones. Sce al vëgn spo cliché sön "jí inant" röion sön plates web desvalies olache al vëgn pité jüc da davagné y d'atri produc. Iló vëgn i utënc impizá da stlüje jö abonamënc a paiamënt. De plü informaziuns él da ciafé sön la plata internet de nüsc colegs dla Zentrala Consumadus Europeica Austria.


10 agn al sorvisc di consumadus europeics:

La rëi dles ZCE (ECC-Net) complësc i agn

L'ECC-Net (Euroepan Consumer Centres Network) é na rëi metüda adöm da 30 zentrales ti stac comëmbri dl'Uniun Europeica, tla Norvegia y Islanda, che ti pîta debann sostëgn y consulënza ales consumadësses y ai consumadus pro cumpres sura i confins fora. Chësta rëi é gnüda metüda sö dan da 10 agn dala Comisciun europeica en colaboraziun cun i governs de vigni stat comëmber. Danter le 2005 y le 2014 s'á indöt 650.000 consumadësses y consumadus adressé ales zentrales dla rëi ECC por damané do aiüt. Tröpes de chëstes zentrales esist bele te na forma o l'atra da 20 agn incá, insciö ince la ZCE da Balsan che á tut l'ocajiun da festejé chësc iubileum sciöche al alda, invian i rapresentanc di media a n gosté y fajon na relaziun ampla sön l'ativité fata. De plü informaziuns él da ciafé sön nosta plata internet.


Caje dl mëis
Tl mëis de novëmb
er unse ciafé tres nüsc colegs dla Zentrala Consumadus Europeica Germania na reclamaziun de n consumadú bavaresc che n'ê nia sté contënt cun i sis sbetri de na firma taliana conesciüda che al s'â cumpré. Do la pröma lavada á i sbetri dër dé ite scebëgn che le consumadú s'â tigní ales indicaziuns sön l'etichëta. La Zentrala Consumadus Europeica de Balsan s'á metü en contat cun l'aziënda taliana che á impröma fat la proposta da lascé analisé i sbetri lavá da sü esperc. Al'aziënda ti gnôl sambëgn le dübe che Kurt ne s'ess nia tigní ales indicaziuns dades dant sön l'etichëta di sbetri. Kurt indere n'orô nia avëi ciamó spëises implü por mené zoruch i sbetri y n'á porchël nia azeté chësta oferta. L'aziënda taliana n'orô nia lascé che le cliënt bavaresc foss malcontënt y porchël ti ára scrit fora n bon da cumpré ite trëi sbetri te öna dles filiales talianes dl'aziënda. Cun chësc gest n'él nia ma gnü acontenté le consumadú todësch, mo incomá ál na rajun implü por gní indô n iade tla Talia.