Finanziell unterstützt durch
die Europäische Union
Europäisches Verbraucherzentrum Italien Büro Bozen

Verbrauchertelegramm Europa-Ausgabe Auril 2014

Beilage zur ladinischen Europa-Ausgabe Nr. 28 - Redaktion: Europäisches Verbraucherzentrum


DIRETIVA DI SORVISC

Vacanzes bun marćé tla Talia? Nia por zitadins talians

La familia Rossi da Balsan tol la dezijiun da jì d’isté en vacanza tla Puglia y va te na agenzia de iadi por apostè la vacanza chirida fora tl catalogh de n tour operator austriach. Prisc final: 2.618 euro por döes edemes cun ponsiun completa. Püć dis do la domanda de apostaziun ti lascia alsavëi le tour operator austriach al'agenzia che ai ne poi nia vëne tla Talia. Porvia de süa zitadinanza taliana ne po i consumadus nia apostè süa vacanza tl resort chirì fora.
Tl'UE n’é les descriminaziuns basades sön la residënza o zitadinanza nia amissibles, ater co sce al é criters ogetifs iustificà.
La Zentrala di Consumadus Europeica (ZCE) inviëia düć i consumadus, a chi che al ti é sozedü le medemo, da segnalè so caje cherdan sö le numer de telefonn 0471-980939 o ti ortian na e-mail a info@euroconsumatori.org a na moda da podëi ti ortié inant les segnalaziuns ales autoritês competëntes tla Talia y tl’Europa.


E-COMMERCE

Cumprè möbli de design on-line: i consëis dla ZCE por se stravardè da messëi aspetè tan dî

Ti ultimi tëmps n’él nia passè n’edema che n consumadù ne cherdass nia sö la Zentrala di Consumadus (ZCE) de Balsan, ajache al n’â assà da aspetè, por damanè assistënza por möbli comanà che al n’à mai ciafè. Ara se trata tres dla medema botëga on-line dër conesciüda, che fej n gran retlam tres banner o te revistes spezialisades de aredamënt y s’anüza dl sit a na moda formidabla da n punt de odüda comerzial. Le problem segnalè é tres le medemo: inće sce al vëgn dè dant avisa i tëmps de fornidöra, ne vëgni nia respetà dal’aziënda. Canche la scadënza dl terminn de fornidöra s’avijinëia, ciafa normalmënter i consumadus comunicaziuns dal sorvisc tliënć olache al vëgn lascè alsavëi che ai é tardis y che le terminn vëgn spostè de n valgügn mëisc.
Liede sön la plata internet dla ZCE cai che é üsc dërć te de te’ caji y co se stravardè bele denant co comanè val’.


IADI

Cumprè vacanzes tl discount: paridlé les ofertes!

Por sparagné cùmpron ite tl discount, chël sa pö düć. Mo sön i jorantins de riji y sossa en oferta él da n pez inće ofertes por jì en vacanza. Sparàgnon inće te chësc caje? De plü informaziuns él da ciafè sön la plata internet dla ZCE.


CAJE DL MËIS
Da Nadè dl 2012 â nosc consumadù ciafè sciöche scincunda n bonn por n jore da 100 euro da adorè te n ann. Do da n valgönes edemes ê nosc consumadù jü sön le sit dla compagnia irlandeja y â metü ite düć i dać damanà a pert le codesc dl bonn, mo impede la confermaziun d’apostaziun êl gnü sö n messaje de fal: “Le inom sön le bonn ne ti corespogn nia al inom dl passajier”. Le consumadù â porvè plü iadi da contatè le sorvisc tliënć, passan tröc minuć (bi ćers!) al telefonn, scrion e-mails y menan ćinamai na racomanada. Ala fin âl damanè aiüt ala Rëi dles Zentrales di Consumadus Europeiches (ECC-Net). La ZCE dl’Irlanda â contatè la compagnia y â naôta ciafè na resposta cun chëra che ara n’ê nia stada contënta: le bonn ne po nia gnì trasferì y ara ne va nia da l’adorè por apostè n iade por n’atra porsona. Le consumadù n’â mine porvè da apostè n jore por zacai d’ater.
Intatran êl passè n ann dala prenotaziun y le bonn ê oramai tomè. La ZCE dl’Irlanda â porimpò contatè la compagnia cun n screenshot dl messaje de fal sciöche proa; chësc iade à la compagnia finalmënter respognü spligan le dër problem: canche al ê gnü cumprè le bonn êl gnü metü ite adinfal döes lercs danter le inom y le cognom dl consumadù impede öna. Por chësta rajun n’ê le computer nia bun da reconësce le inom canche al ê gnü fat la prenotaziun mëton ite dërt le inom ma cun öna öna na lerch. La compagnia de fligri à indô dé fora le bonn cun n terminn nü: merz dl 2015, ti conzedon insciö a nosc consumadù da podëi finalmënter s’anuzé de süa scincunda da Nadè.