english 
deutsch 
italiano
Verbrauchertelegramm Europa-Ausgabe
Um monatlich über die Neuigkeiten im europäischen Verbraucherschutz informiert zu sein, abonnieren Sie kostenlos das Verbrauchertelegramm als Newsletter.JENÉ 2003
Redaktion: Zentrela Europeica Cunsumadëures Bulsan
SERVIJES FINANZIERES
Diretiva nueva dla UE sun i cuntrac finanzieres stipulei a distanza
Ai 23 de setëmber dl 2002 à l Cunsëi europeich finalmënter emanà la diretiva che regulamentea la cumerzialisazion a distanza de servijes finanzieres (Diretiva n. 2002/65). Coche n sà, ova la diretiva n. 1997/7 sun la vendudes a distanza stlut ora da si ciamp de aplicazion l setor di servijes finanzieres y daviadechël fova i cunsumadëures te chësc setor zënza defendura.La diretiva nueva ie da apliché a duc i cuntrac de natura finanziera (uel dì cuntrac bancares, de assegurazion y de nvestimënt) stripulei "a distanza", uel dì, per telefonn, per curespundënza, tres Internet y nsci inant.
La carateristica de majera mpurtanza dla diretiva nueva ie na ublianza de nfurmazion ampla a bën di/dla cunsumadëures: Dan stlù ju l cuntrat à i/la cunsumadëures la rejon de giaté nfurmazions detaliedes n cont dl ufrënt dl servisc, n cont dla sort y di cosc' cumplessives dl servisc dunfrì, n cont dla disposizions fischeles, dla dureda dl raport cuntratuel, dla rejon de rezeduda y nsci inant. Chësta nfurmazions y duta la cundizions dl cuntrat ti muessa uní comunichedes sun papir. Sce chësc ne ie nia puscibl per la tecnica de comunicazion adurveda (p.e. pra n cuntrat stipulà tres telefonn) ti à la nfurmazions da uní mandedes debota do la cuntlujion dl cuntrat.La diretiva vëija po danora n dërt de rezeduda de 14 dis a bën dl cunsumadëur. Per assegurazions de vita vel n dërt de rezeduda de 30 dis. Unica gota antia dal pont de ududa dl cunsumadëur: l dërt de rezeduda ne vel nia per duc chëi servijes finanzieres cun cosc' che depënd da flutuazions dl marcià finanzier coche per ejëmpl pra operazions de barat, marcei de azions y tiermuli, y nsci inant. Stluc ora ie nce cuntrac de assegurazions per viages y duc i cuntrac de assegurazion che à na dureda de manco de n mëns.
La diretiva 2002/65 muessa unì metuda tla pratica da duc i stati cumëmbri nchin ai 9 de utober dl 2004.
MAIADIVES
Maië zënza tëma: aspitan la nueva regulamentazion tl ciamp dla etichetes de maiadives!
Per i prim mënsc dl ann nuef iel da se aspité na mudazion dla diretiva sun la etichetura di maiadives, ajache l Cunsëi ova apurvà de nuvëmber dl ann passà, la pruposta relativa dla Cumiscion.La mudazion garantësc ai cunsumadëures dla UE na nfurmazion plu a puntin sun l cuntenut di maiadives. Nchin s'ën ne messova la cumpunëntes singules, defati, nia uní ndichedes sun la eticheta sce les fova pert de n ngredient che ne surpassova nia l 25% dl prodot finà. Chësta regula fova unida a valëi tl dërt comuniter dan plu de vint ani cun l fin de ne fé no crëscer a desmesura la lingia di ngredienc. N minova che l cunsumadëur cunescëssa la cumpunëntes de n ngredient cun deplù sustanzes y che l pudova perchël se mpensé che la sulza cuntenida tla papes ie metuda adum da versura y zucher.
Ma te chisc ultimi ani ie la produzion de maiadives deventeda for plu cumplicheda y l cunsum de prodoc bele njiniei a unì maiei (prodotti finiti/ Fertigprodukte) ie chersciù dassën. Daviadechël ie i cunsumadëures scialdi nteressei a cunëscer avisa la sustanzes singules di prodoc che i maia. Mbën: la disposizions nueves curespuend a chësc bujën nuef de nfurmazion: tl daunì messerà duc i ngredienc unì ndichei singularmenter sun la eticheta.
Chësta regulamentazion ie mpurtantiscima dantaldut per la persones che patësc de alergies. La perzentuela de chësta categoria de persones crësc for deplú (aldò dla assoziazions europeiches di alergics patësc bele l 8% di pitli y l 3% di granc de chësta patologia) y truepa alergies gauja reazions scialdi periculëuses. Per la persones alergiches iel perchël de gran mpurtanza pudëi liejer la ndicazions prezises y cumpletes sun la etichetes di maiadives, y chësc unirà finalmënter segurà tres la diretiva nueva.
L tiermul per la metuda n pratica dla diretiva ie bonamënter l scumenciamënt dl 2004.
L cunfront di priejes nuef ie unì ora!
Ala metà de dezëmber ie unì ora l cunfront di priejes nuef, laurà ora periodicamënter dal CEC (Zënter Europeich Cunsumadëures) de Bulsan n cunlaurazion cun la Arbeiterkammer Tirol. I dac dl cunfront ie da giapé diretamënter pra l CEC o sun la plata www.euroconsumatori.org. |
|
| software by endo7 |    |
EVZ
Brennerstraße3
I - 39100 Bozen
tel.: ++39 0471 980939
fax: ++39 0471 980239