Finanziell unterstützt durch
die Europäische Union
Europäisches Verbraucherzentrum Italien Büro Bozen

Verbrauchertelegramm Europa-Ausgabe Decëmber 2019

Beilage zur ladinischen Europa-Ausgabe Nr. 94 - Redaktion: Europäisches Verbraucherzentrum


E-Commerce

Metede averda sce i cumprëis les scincundes da Nadé online!

La Zentrala di consumadus europeica (ZCE) y i esperc de Conciliareonline.it á arjigné ca n valgügn consëis d'ütl por che che cumpra ite online:
Ciaredeti sciöche al alda ala plata internet denanco cumpré. Él sön le sit internet informaziuns legales y le numer de CVA? Tleca pa les condiziuns generales de venüda? Sce la resposta é NOU, él damí lascé ester. Confrontede i prisc pro botëghes online desvalies. Sce le prisc é massa bun por ester vëi podessel sozede che i ne ciafëise nia le produt o ciafëise n produt falsifiché. Chiride fora na metoda de paiamënt le plü sigüda che ara vá, sciöche por ejëmpl la cherta de credit o Paypal. Anuzesse dles esperiënzes di atri utënc y liede les rezensciuns online denanco cumpré val'. Controlede atira do che i ëis ciafé osc poch, sce ci che i âse comané é intier, dërt y funzionëia. Documentede y lascedeti atira alsavëi al venditur por scrit sce al é gnü danejé le poch o le produt. Sce le produt comané ne ti corespogn nia a ostes aspetatives, anuzesse de osc dërt da se trá zoruch: i podëis l'eserzité te 14 dis dala consegnaziun.
Por de plü informaziuns sön l'argomënt pón jí sön le sit dla ZCE.


JORI

Le TAR dl Lazio anulëia sanziuns a Ryan Air y Wizz Air

L'autorité garanta por la concorënza y le marcé (AGCM) â straufé de forá dl 2018 les compagnies de jori low-cost Ryanair y Wizz Air, porvia de sües politiches sön le prisc dl trasport di gragn cufri a man (i trolley), ajache le prisc final dl jore, che n'â nia plü tla tarifa de basa n elemënt essenzial dl contrat de trasport di fligri, ê feter dagnora majer co la tarifa che gnô fora al scomenciamënt dl’apostaziun, cossa che fej plü ria la comparaziun cun i prisc dles atres compagnies che indere tol ite le cufer a man te so prisc de basa. Le TAR dl Lazio á sëgn anulé i provedimënc de sanziun y é rové ala conclujiun che les ofertes é tleres assá y che al vëgn splighé sciöche al alda les metodes scëmples da cumpedé adöm le prisc “en relaziun a le dé jö ince n secundo gran cufer canche an apostëia, dedô o canche an s’imbarchëia”.


IMPRËST D'AUTI

AGCM sanzionëia Goldcar

L'AGCM á straufé la compagnia de imprëst d'auti Goldcar che mëss sëgn paié 3.400.000 euro por pratiches comerziales nia iüstes. La compagnia ess proponü cun agressivité assiguraziuns suplementares ceres y ti ess fat paié, a che che ne cumprâ nia chëstes assiguraziuns, somes por de pici dagns “fates fora a caje sön la basa de criters generics de cuantificaziun dl dann”.


CAJE DL MËIS
N consumadú talian â aposté cotan danfora n jore da jí y gní por les Isoles Canaries por sües vacanzes da d'invern y - a pert - na nöt te n hotel zënza retüda di cosć. Do da val' edemes ti â la compagnia de jore irlandeja lascé alsavëi che sü jori ê gnüs straicá y che al ess podü chirí fora danter n ater jore dla compagnia da o por n'atra destinaziun, la retüda di scioldi o n jore de n'atra compagnia. Le consumadú á chirí fora la terza opziun, al á ciafé n ater jore cun d'atres compagnies y ti á damané ala compagnia da ti le paié. L'agenzia s'á refodé y ti á retü i scioldi paiá por i jori straicá. Le consumadú á aposté y paié instës i jori alternatifs plü cers pitá da d'atres compagnies y é jü dala Zentrala di consumadus europeica (ZCE) Talia, che ti á ortié le fascicul ala ZCE Irlanda. La ZCE Irlanda á contaté l'agenzia y ti á daidé recordé che sce le jore vëgn straiché, prevëiga le regolamënt sön i dërc di passajiers le dërt da chirí fora danter la retüda di scioldi y l'apostaziun de n ater jore. La ZCE é stada buna da baié sö la compagnia da ti rete al consumadú la desfarënzia dl prisc.