english 
deutsch 
italiano
Verbrauchertelegramm Europa-Ausgabe
Um monatlich über die Neuigkeiten im europäischen Verbraucherschutz informiert zu sein, abonnieren Sie kostenlos das Verbrauchertelegramm als Newsletter.Verbrauchertelegramm Europa-Ausgabe Setëmber 2007
Beilage zur ladinischen Europa-Ausgabe Nr. 55 - Redaktion: Europäisches VerbraucherzentrumTrafich tl'aier I
Despusizions nueves per passajires cun handicap o muvibltà limiteda
Dai 26 de lugio dl 2007 ie jites n forza n valguna despusizions cuntenides tl Regulamënt CE 1107/2006 n cont dl trasport tl aier de persones cun handicap y cun muvibltà limiteda. L regulamënt vën aplicà sun duc i joi tl pië via, ntan l jol y tla ruveda ti areoporc di stac cumëmbri.Dai 26 de lugio ne daussserà la cumpanies de jol y la sozieteies de viac nia plu refudé de azeté na prenotazion per n jol o de lascé senté su na persona cun handicap o muvibltà limiteda; stluc ora da chësta despusizion ie i caji te chëi che la refudeda se porta pro dal respet dla ublianzes tla materia de segurëza stabilides dala normativa internaziunela, chemunitera o naziunela, o canche la dimenscions dl julier o de si purtelons ne lascia fisichmënter nia pro che persones cun handicap o muvibltà limiteda posse senté su. Te chësc cajo à la persona nteresseda la rejon de se damandé l rembursamënt dla zedula de jol o n jol auternatif.
La cumpania de jol messerà oradechël fé a na moda che l publich ebe azes ala normes de segurëza y vënie, n cajo, nfurmei n cont dla restrizions sun l trasport de persones cun handicap o muvibltà limiteda. I ufizies de viac à la medema ublianzes de nfurmazion per cie che reverda i viages y la vacanzes "all inclusive" - stluc ite i joi - che i urganisea, pieta y vënd.
Per passajires cun handicap y muvibltà limiteda vëijen danora mo d'autri miuramënc dla situazion: ai 26 de lugio 2008 jirà defati n forza la despusizions restëntes dl Regulamënt nunzià de sëura.
Trafich tl aier II
La ZCE anconta l'ënt naziunel dl'aviazion zevila (ENAC) de Bulsan y la sozietà de gestion dl areoport de Bulsan
Na gran pert pert dla lamentanzes che vën tratedes uni di dala zentreles europeiches per i cunsumadëures (ZCE) à da nfé cun l trasport tl aier. Chësc setor ie desciplinà dai regulamënc CE nr. 889/2002 (tardivanzes, danns, cufri perdui) y nr. 261/2004 (gran tardivanzes, cancelazions de joi o trasport negà). Oradechël à uni stat cumëmber numinà n organism respunsabl dl'aplicazion dl regulamënt nr. 261/2004 (national enforcement bodies - NEB). Tla Talia ie l organn numinà per chisc cuntroi l ENAC.L'ancunteda de lugio danter reprejentanc dla ZCE, dl ENAC de Bulsan y dla ABD, la sozietà de gestion dl areoport de Bulsan, ie stata na ucajion de barat de nfurmazions y de sperienzes.
La respunsables dl'ABD à spiegà coche les se cruzia di problems di passajires tl cajo de tardivanzes, cancelazions, trasporc neghei y problems liei ai cufri. Pervia che l mancia na reprejentanza dla cumpanies de jol pra l areoport de Südtirol, muessa mpede chësta la ABD se cruzië dla deficulteies di passijires.
Oradechël iel unì prejentà la Cherta di Servijes.
Dala statistiches relevedes dala ABD vëniel ora che i passajires dl areoport de Bulsan ie scialdi cuntënc cun i servijes pitei.
L respunsabl dl ENAC à ala fin mustrà coche l'aplicazion di regulamënc chemuniteres sun l trasport tl aier vën cuncretamënter controleda. L suzed defati nia dinrer che la cumpanies de jol ne respuend nia a slune assé y te na maniera sciche toca ala retlamazions che ti vën mandedes. Perchël vën chësta lamentanzes for plu suënz mandedes inant ala sëntes ENAC nteressedes (chëles dl areoport de partënza o de destinazion dl jol), acioche chësc organn cuntrolëie cërta viulazions dla cumpanies y aplicheie la straufoghes ududes danora.
Na bona cunlaurazion danter ZCE y NEB ie scialdi mpurtanta per pudëi ti judé ai passajires a fé valëi si dërc. Tres chësta ancunteda iel unì fat n prim var mpurtant de chësc viers.
Per nfurmazions plu detaliedes sun i doi Regulamënc chemuniteres n cont dla materia dl trasport tl aier y sun l'ativiteies dla ENAC: www.enac-italia.it.
Cajo dl mëns
Chësc mëns Ve prejentons n cajo lià al danejamënt de n cufer ntan n jol. Do che na cunsumadëura fova unida ora dl julier y jita a se tò l cufer àla messù cunstaté che chësc cufer fova danejà. Sambën iela jita pra la purtela dla retlamazions y à scrit ora l formular PIR (Property Irregularity Report) per dé sëura che l cufer ie unit danejà. Ruveda de reviers dala feries à la cunsumadëura pona mandà na lamentanza ala cumpania de jol se damandan la remburseda dl priesc dl cufer. Al fin de desmustré l dann fovela jita tla butëiga ulache la ova cumprà l cufer y se ova lascià valuté l dann dal buteghier. N regulamënt dla Cumenanza Europeica y la Cunvenzion de Montreal vëij danora per i caji de danejamënt, perduda o tardivanza tla cunseniazion di cufri che i cunsumadëures à la rejon de unì rembursei o ndenisei per l dann. Y nsci iela nce stata te chësc cajo: la cunsumadëura à giapà l rembursamënt per si cufer ruinà. |
|
| software by endo7 |    |
EVZ
Brennerstraße3
I - 39100 Bozen
tel.: ++39 0471 980939
fax: ++39 0471 980239