english 
deutsch 
italiano
Verbrauchertelegramm Europa-Ausgabe
Um monatlich über die Neuigkeiten im europäischen Verbraucherschutz informiert zu sein, abonnieren Sie kostenlos das Verbrauchertelegramm als Newsletter.AURIL 2002
Redaktion: Zentrela Europeica Cunsumadëures Bulsan
VIAGË
Feries spurzenedes: rejon de rembursamënt
Chësta ie la sentënza dla Sunieria Europea dl 12 de merz 2002. La dezijion ie unida tëuta per la plura de na familia austriaca contra n urganisadëur de viages tudësch, ajache ntan la feries te n club "all-inclusive" turch ova si muta giatà n drë mené ora dl vënter cun rejetamënt, y duta la familia ova messù cialé lessù y la secudië. Tla prima istanza ti ie ala familia mé unì dat pro n arbassamënt dl priesc dl viac, ma degun rembursamënt dl dann nia materiel - uel dì chël dla feries spurzenedes - pervia che l manciova la fundamënta de lege aldò. Tla segonda istanza ie i magistrac de cariera de Linz jic pra la Sunieria Europea. Chësta à purtà dant l argumënt, che la diretives euroées per viages "all-inclusive" veij danora n dërt de rembursamënt dl dann nia materiel. Oradechël à la sunieria europea cunstatà che l rembursamënt per la feries spurzenedes ie mé udù danora espressamënter cun lege te n valgun stati y che l mancë de chësc dërt te d'autri stati dla Union Europea purtëssa pro a na destursion grieva dla concurënza, davia che, aldò dla Cumiscion, ie danns nia materiei da cunstaté bendebo suvënz.Na tel interpretazion ie nce puscibla aldò dl articul 14 dla lege taliana sun i viages "all-inclusive", davia che nce te chësta lege rejónen de rembursamënt. L depënd s'ën dai giudesc coche i uel nterpreté l cajo.
DËRT
L recunescimënt dla patentes da oradecà ne ie nia for puscibl!
Da n pez incà se dà la Zentrela Consumadëures de Bulsan jù cun na tematica che te n tëmp de for majerà mubilità ie de gran nterés per i zitadins y la zitadines dl'Europa: l recunescimënt y la trascrizion de patentes.L problem reverda da una pert zitadines y zitadins da oradecà, che devënta residënc tla Talia, dal'autra pert zitadines y zitadins da tlo, che à fat la patent oradecà (per ejëmpl per rejons de studio). L recunescimënt dla patentes da oradecà se stiza sun l prinzip dl "tu per me y ie per te" y depënd da cie che ie unit fat ora danter i singuli stati. Chisc cuntrac à suënz rejons politiches y ie perchël sometui a mudamënc reguleres: na patent fata tla Slovenia possa per ejëmpl unì mudeda te na patent taliana zënza problemes nchin de lugio dl 2002 - cie che sarà dadedo ne sa (mo) deguni.
De mpurtanza particulera ie dantaldut l fat che na patent che ne possa nia unì mudeda te n stato vënie mudeda te n terzo stato per chël che l recunescimënt ie puscibl. Ejëmpl: Na patent fata ti Stac Unifiei dl'America (nia lasceda pro tla Talia) possa unì trascrì te na patent austriaca (danter l'America y l'Austria iel n cuntrat aposta), ma l'autoriteies talianes ne lascerà nia pro la trascrizion de chësta patent uriginalmënter americana!
CAJO DL MËNS
Trëi consumadëures jëuni ova apustà d'agost dl ann passà n viac pauscial tla Malaysia. Pert dl viac fova na jita te n bastimënt da Phuket a Singapur. Per chësta jita ova i jëuni apustà na cabina dopla y una singula. Per via che l ajënt de viac ne ova nia metù verda, fova ala fin mé da garat na cabina dopla. L fat ie debota unì dat sëura, ma l ne fova nia plu da nfé y perchël se à i trëi jëuni messù spartì ch'la cabina sëula.Trëi mënsc do che i fova unic de reviers à i jëuni giatà a reter i scioldi per la cabina singula apusteda. Ma per i consumadëures ne fova chësc nia assé: l ti manciova n rembursamënt per la cualità smendrida dl viac, che ti spitova zënzauter ai trëi jëuni. La ZCE à tëut sù cuntat cun l ajënt de viac per ti purté dant cie che i jëuni mpertendova. L urganisadëur dl viac se à desmustrà da plajëi: l à dat pro n smendrimënt dl 20% dla cualità dla feries y la soma curespundënta ti ie unida paiëda ora dan puech ai consumadëures.
 |
|
| software by endo7 |    |
EVZ
Brennerstraße3
I - 39100 Bozen
tel.: ++39 0471 980939
fax: ++39 0471 980239