english 
deutsch 
italiano
Verbrauchertelegramm Europa-Ausgabe
Um monatlich über die Neuigkeiten im europäischen Verbraucherschutz informiert zu sein, abonnieren Sie kostenlos das Verbrauchertelegramm als Newsletter.SETËMBER 2002
Redaktion: Zentrela Europeica Cunsumadëures Bulsan
ALIMENTAZION
Vënder prodoc Tahiti-Noni tla UE ie mo for ilegal!
Bele de merz dl ann passà ti à la ZCE cumetù ai/ala consumadëures de no cumpré prodoc Tahiti-Noni, che vën fai dal frut "morinda citrifolia". La rejon ie chëla che l ne ie mo mei unì lascià pro de importé y cundechël nianca de vënder l prodot ti paejes dla Union Europeica. Lascei pro po i prodoc permo unì canche l ie unì desmustrà che i ne ie nia de dann per la sanità dla persones.Aldò di produtëures possa la "morinda citrifolia" curé y varì uni sort de malaties: arteriosclerosa, tumores, diabetes, aviciuei al magon, malaties di renions, alergies, artritis, deprescions y prescion dl sanch auta. Bel fossel! Ma una na fazion ie segura: l tacuin devënta megher, ajache la buanda costa nchin a 51 Euro al liter.
La ZCE cunsiëia a duc/duta i/la consumadëures de renunzië al consum dl estrat de chësta planta, unfat sce tla forma de buanda o de piles, nchin che l prodot vën lascià pro dala UE.
VIAGË
Perdù l ticket de jol - mé da se dessené!
Chi che pierd si ticket de jol - unfat sce dan l viac o dan l jol de reviers - muessa tenì cont d'avëi de gran spëises o de messei se lascé ìte a na prozedura longia per l rembursamënt dla spëises dl ticket de jol. La cundizions ie defrëntes y depënd dala cumpania de jol y dal luech da chël che n pëia demez:Chiche pierd per ejëmpl n ticket dl'Alitalia per n jol naziunel muessa te uni cajo n cumpré n nuef - l priesc per l ticket perdù vën permò rembursà do n ann, y nce mé sce chësc ne ie propi nia unì adurvà. Pra joi internaziunei, alincontra, pon se damandé debota n ticket nuef paian n priesc fis de 50 US-Dollar.
Chësc vél nce per joi internaziunei dla Lufthansa; pra joi naziunei remplazea la linia de jol tudëscia l ticket mònce debant, sce n possa mustré su na copia dl ticket uriginel. Air Alps y AUA, alincontra, ne fej deguna defrënzia danter joi naziunei y joi internaziunei: tlo muessen te uni cajo dé sëura la perduda per giaté po remplazà l ticket a n priesc fis de 65 Euro. Plu saurí iel per chëi che jola cun n jol charter: l ticket perdù vën da chësta linies remplazà da n nuef zënza problemes y debant.
Nosc cunsëi: l ie de utl fé na fotocopia dl ticket de jol y de la tenì sù a pert dal uriginel per pudëi desmustré, tl cajo che n pierd l ticket, che n l à cumprà
JËUNANZA
"Ulon n auter consum" - Jëunes y jëuni de dut l mond rejona sun l consum sustenibl
Dan n valguna enes se à jëuni y jëunes de dut l mond ancuntà a Utrecht pra l cunvëni internaziunel Youth Action Summer 2002 per rujené de problemes de defendura dl ambient, de giustizia globala y valivanza dla chances. Ai jëuni y ala jëunes dl dauní ti stajova dantaldut a cuer de abiné azions y mesures cuncretes da pudëi realisé tla vita da uni dí per purté pro nsci a resolver i problemes globai dl mond. Tl e-zine www.yomag.net se pieta s'ën ai jëuni la puscibeltà de lauré inant sun chësta tematiches y de baraté ora si minonghes.Cajo dl mëns
Doi consumadëures ulova se nfurmé sun la homepage de n pitadëur tudësch de joi "last minute" per n tëmp curt de feries a Mallorca. N'ena plu tert - canche i doi ova bele urganisà y apustà si feries nzaul d'auter - ti ie unida te cësa na cubita per l'apusteda cun n nvit de paiamënt da pert dl urganisadëur di joi last minute. La ZCE à nrescì y abinà ora, che i doi consumadëures ova, da n pont de ududa giuridich, propi apustà l viac a Mallorca. L paiamënt dla spëises dl storno ne fova nia plu da schivé.La ZCE cunsiëia: sce vijiteis plates tl Internet de urganisadëures de viages y ne uileis nia apusté n viac - cialëde de tenì ìte Vosta ueia de sperimenté! N tlic cun l mouse ie assé per Ve lascé ìte te n cuntrat lient de uni viers!
 |
|
| software by endo7 |    |
EVZ
Brennerstraße3
I - 39100 Bozen
tel.: ++39 0471 980939
fax: ++39 0471 980239